جۇڭگو ئاخبارات ئاگېنتلىقى بېيجىڭ 21-سېنتەبىر تېلېگراممىسى : دۆلەت مۇداپىئە پەن-تېخنىكا سانائىتى ئىدارىسىنىڭ 21–سېنتەبىر خەۋەر قىلىشىچە ، دۆلىتىمىزنىڭ ئاي شارىنى تەكشۈرۈش 2–سۈنئىي ھەمراھى — ‹‹ ئاي پەرى — 2 ›› يەر شارىدىن 1 مىليون 720 مىڭ كىلومېتىر يىراقلىقتىن ( چوڭقۇر كائىناتتىن ) مۇۋەپپەقىيەتلىك ھالدا تۇنجى تۈركۈمدىكى ئىلمىي تەكشۈرۈش سانلىق مەلۇماتىنى يەتكۈزۈپ بەرگەن . نۆۋەتتە ، ‹‹ ئاي پەرى — 2 ›› ناملىق سۈنئىي ھەمراھنىڭ ئەھۋالى ناھايىتى ياخشى بولۇپ ، ئىتتىرىش كۈچى ھاسىل قىلىدىغان ماددا يەنە 115 كىلوگرام ئېشىپ قالغان .

مۇۋەپپەقىيەتلىك ئەۋەتىلگەن بۇ سانلىق مەلۇماتلار ‹‹ ئاي پەرى— 2 ›› ناملىق سۈنئىي ھەمراھنىڭ ئاي شارىدىن لاگرانژې L2 نۇقتىسىغا ئۇچۇپ بېرىش جەريانىدا ، قۇياش شامىلى ئىئون تەكشۈرۈش ئۈسكۈنىسى ، قۇياش يۇقىرى ئېنېرگىيەلىك زەرىچە تەكشۈرۈش ئۈسكۈنىسى ،  γ نۇر سپېكترومېتىر قاتارلىق ئۇچ خىل ئۈنۈملۈك ئۈسكۈنە ئارقىلىق ئېرىشىلگەن .

   تونۇشتۇرۇلۇشىچە ، ‹‹ ئاي پەرى— 2 ›› ناملىق سۈنئىي ھەمراھ  L2 نۇقتىسىدا 2012–يىل ئاخىرىغىچە ئايلىنىپ ، دۆلىتىمىز يېقىندا قۇرماقچى بولغان چوڭقۇر كائىنات كۈزىتىش ۋە كونترول قىلىش پونكىتىنى بوشلۇقتا ئۆلچەش ۋە نىشاننى تەكشۈرۈش بىلەن تەمىنلەپ ، دۆلىتىمىزنىڭ يىراقتىن كۈزىتىش ۋە كونترول قىلىش ئىقتىدارىنى يەنە بىر قېتىم دەلىللەيدىكەن .

   شۇنىڭ بىلەن بىر ۋاقىتتا ، ‹‹ ئاي پەرى — 2 ›› ناملىق سۈنئىي ھەمراھقا قاچىلانغان قۇياش شامىلى ئىئون تەكشۈرۈش ئۈسكۈنىسى ، قۇياش يۇقىرى ئېنېرگىيەلىك زەرىچە تەكشۈرۈش ئۈسكۈنىسى ، Xنۇر سپېكترومېتىر ، γ نۇر سپېكترومېتىر ، مىكرو دولقۇنلۇق تەكشۈرۈش ئۈسكۈنىسى قاتارلىقلار ئارقىلىق پارتلاش مۇمكىنچىلىكى بولغان قۇياش X نۇر سپېكترومېتىرى قاتارلىقلارنى كۈزىتىپ ، ئىلمىي سانلىق مەلۇماتقا ئىگە بولۇپ ، قۇياش–يەر بوشلۇق مۇھىتىغا بولغان تونۇشنى يۇقىرى كۆتۈرىدىكەن . 

   15–سېنتەبىر كەچتىن باشلاپ ، ‹‹ ئاي پەرى — 2 ›› ناملىق سۇنئىي ھەمراھ  يۇقىرىدا ئېيتىلغان ئۈنۈملۈك ئۈسكۈنىلەر ئارقىلىق يىغىلغان سانلىق مەلۇماتلارنى سېكۇنتىغا 750 كىلوبىت سۈرئەت بىلەن  يەر يۈزىگە ئەۋەتكەن بولۇپ ، ئۈچ سائەتتىن ئارتۇق ۋاقىتتا ئەۋەتكەن سانلىق مەلۇمات جەمئىي 7 مىڭ مىگابايتقا يەتكەن . بۇ يەر شارى بىلەن لاگرانژې L2  نۇقتىسى ئوتتۇرىسىدىكى بوشلۇق مۇھىتى تەكشۈرۈش سانلىق مەلۇماتى بولۇپ ، قۇياش –يەر بوشلۇق مۇھىتىغا بولغان تونۇشنى يۇقىرى كۆتۈرۈشتە ناھايىتى مۇھىم ئەھمىيەتكە ئىگە ئىكەن .

   25–ئاۋغۇست يېرىم كېچىدە ، ‹‹ ئاي پەرى — 2 ›› ناملىق سۈنئىي ھەمراھ 77 كۈن ئۈچۈش ئارقىلىق ، دۇنيادىكى تۇنجى ئاي شارى ئوربىتىسىدىن يولغا چىقىپ ، قۇياش–يەر لاگرانژې L2 نۇقتىسىنىڭ ئايلىنىش ئوربىتىسىغا توغرا كىرىشنى ئەمەلگە ئاشۇرغان ۋە مۇقىم ئايلىنىشنى ساقلاپ كەلگەن .