شىنخۇا تورى بېيجىڭ 15-سېنتەبىر تېلېگراممىسى: 15-سېنتەبىر ، تۆمۈريول مىنىستىرلىقىدىن ئىگىلىنىشىچە ، تۆمۈريول تارماقلىرى مۇلازىمەت سۈپىتىنى تېخىمۇ يۇقىرى كۆتۈرۈش ئۈچۈن ، بېلەت قايتۇرۇش ھەققىنى تۆۋەنلىتىش ، تېز پويىز بېلىتىنى توردا سېتىش ، تۆمۈريول مۇلازىمەت تېلېفونىنى بىرلىككە كەلتۈرۈش قاتارلىق خەلققە قولايلىق يارىتىدىغان ئۈچ تۈرلۈك يېڭى تەدبىرنى ئوتتۇرىغا قويغان .
25-سېنتەبىردىن باشلاپ ، پويىز بېلىتىنى قايتۇرۇش ھەققى تۆۋەنلىتىلىدىكەن . يېڭى بېلەت قايتۇرۇش بەلگىلىمىسىدە مۇنداق دېيىلگەن : پويىز قوزغىلىشتىن بۇرۇن ، بېلەت قايتۇرۇش ھەققى ئەسلىدىكى ھەر بىر بېلەت باھاسىنىڭ %20 ىدىن %5 كە تۆۋەنلىتىلدى .بېلەت قايتۇرۇش ھەققىنىڭ ئەڭ تۆۋەن چېكى ئىككى يۈەن قىلىپ بېكىتىلدى .
سېنتەبىرنىڭ ئاخىرلىرىدىن بۇرۇن پۈتۈن مەملىكەتتىكى تېز پويىزلارنىڭ بېلىتى ئىنتېرنېتتا سېتىلىدىكەن .
يولۇچىلارنىڭ بېلەت سېتىۋېلىشىغا قولايلىق يارىتىش ئۈچۈن ، تۆمۈريول تارماقلىرى پۈتۈن مەملىكەتتىكى خېرىدار مۇلازىمەت تېلېفونىنى ‹‹ 12306 ›› گە بىرلىككە كەلتۈرىدىكەن ھەمدە مۇلازىمەت تەرتىپى ۋە مۇلازىمەت ئۆلچىمىنى تېخىمۇ ئىلگىرلىگەن ھالدا تەرتىپكە سېلىپ ، يولۇچىلارنى ئەلا مۇلازىمەت بىلەن تەمىنلەيدىكەن .
يولۇچىلار مەملىكەتلىك تۆمۈريول خېرىدار مۇلازىمەت مەركىزىنىڭ تور بىكىتى (www.12306.cn) گە چىقىپ ياكى ‹‹12306›› تېلېفونىغا ئۇرۇپ پويىزنىڭ ۋاقتى ، بېلەت باھاسى ، قالدۇق بېلەت سانى قاتارلىق ئۇچۇرلارنى ئىگىلىسە بولىدىكەن . بۇنىڭدىن باشقا تۆمۈريول خېرىدار مۇلازىمەت مەركىزى ئاپتوماتىك ئاۋازلىق تېلېفون ، ئادەملىك تېلېفون ۋە www.12306.cn تور بېكىتىنىڭ خېرىدارلار خەت ساندۇقى قاتارلىق ۋاستىلەر ئارقىلىق ئەرز، مەسلىھەت سوراش ۋە تەكلىپ پىكىر قوبۇل قىلىدىكەن .
