مۇخبىرنىڭ شىنجاڭ ئۇيغۇر ئاپتونوم رايونلۇق خەلق ئىشلىرى نازارىتىدىن ئىگىلىشىچە، بۇ يىلنىڭ ئالدىنقى يېرىمىدا شىنجاڭ شەھەر-يېزا ئاھالىلىرىنىڭ داۋالىنىش ياردىمى مەبلىغىدىن 210 مىليون يۈەندىن كۆپرەك چىقىم قىلىپ، قىيىنچىلىقى بار 2 مىليون 118 مىڭ ئادەمنى نەپكە ئېرىشتۈرگەن. داۋالىنىش ياردىمى مەبلىغىنىڭ چىقىم قىلىنىش سوممىسى بىلەن قىيىنچىلىقى بارلارنىڭ نەپكە ئېرىشىش ئەھۋالى بويىچە تارىختىكى ئەڭ يۇقىرى رېكورت يارىتىلغان، نۆۋەتتە، داۋالىنىش ياردىمى پۈتۈن ئاپتونوم رايونغا ئومۇملاشتۇرۇلغان.

2006-يىلىدىن باشلاپ، شىنجاڭ ئۇيغۇر ئاپتونوم رايونى 27 ناھىيە، شەھەردە شەھەر ئاھالىلىرى داۋالىنىش ياردىمى تۈزۈمى سىنىقىنى يولغا قويغان. 2007-يىلى، داۋالىنىش ياردىمى تۈزۈمى تىز سۈرئەتتە ئاپتونوم رايوندا ئومۇملاشتۇرۇلغان. 5 يىلدىن كۆپرەك ۋاقىتتىن بۇيان، شىنجاڭ ئۇيغۇر ئاپتونوم رايونى داۋالىنىش مەبلىغى ياردىمىدىن 1 مىليارد 780 مىليون يۈەندىن ئارتۇق چىقىم قىلىپ، 12 مىليون 680 مىڭدىن ئارتۇق ئادەمگە داۋالىنىش ياردىمى بەرگەن.

ئاپتۇنۇم رايۇنلۇق خەلق ئىشلىرى نازارىتى تۆۋەن كاپالەت باشقارمىسىنىڭ باشلىقى لۇي زىشىياڭنىڭ  تونۇشتۇرۇشىچە، ئىجتىمائىي داۋالىنىش ياردىمى بۇ يىل شىنجاڭ ئۇيغۇر ئاپتونوم رايونى يولغا قويغان 22 نۇقتىلىق خەلق تۇرمۇشى ئەمەلىي قۇرۇلۇشىنىڭ بىرى ئىكەن. بۇ يىل شەھەر-يېزىلاردىكى تۆۋەن كاپالەت ئوبيېكتلىرى قاتارلىق قىيىنچىلىقى بار ئامما داۋالىنىش ياردىمىگە ئېرىشكەندىن باشقا يەنە، شىنجاڭ يەنە ياردەم بېرىدىغانلارنى كۆپەيتىپ، كىرىمى تۆۋەن ئېغىر كېسەللەر، ئېغىر مېيىپلار، كىرىمى تۆۋەن ياشانغانلار، تۇغما يۈرەك كېسىلى بىمارلىرى قاتارلىق ئالاھىدە قىيىنچىلىقى بار ئاممىنى كاپالەت دائىرىسىگە كىرگۈزگەن. شۇنىڭ بىلەن بىرگە، شىنجاڭ ئۇيغۇر ئاپتونوم رايونلۇق خەلق ئىشلىرى نازارىتى ئاپتونوم رايون بويىچە «سۇغۇرتىغا قاتنىشىشقا ياردەم بېرىش، ئامبۇلاتورىيەدە قۇتقۇزۇش، ئېغىر كېسەللەرنى قۇتقۇزۇش، ۋاقىتلىق قۇتقۇزۇش، پۇل ئىئانە قىلىپ قۇتقۇزۇش»دىن ئىبارەت بەش بىرلەشتۈرۈلگەن شەھەر-يېزا ئاھالىلىرى داۋالىنىش ياردىمى قېلىپىنى شەكىللەندۈرگەن. جايلاردىكى خەلق ئىشلىرى تارماقلىرى يەنە داۋالىنىش ياردىمىنىڭ خەلققە قولايلىق يارىتىش، نەپ يەتكۈزۈش سەۋىيەسىنى ئۆستۈرۈش ئۈچۈن، ياردەم بېرىش تەرتىپىنى ئاددىيلاشتۇرۇپ، داۋالىنىش ياردىمىنى باشقۇرۇشنى قېلىپلاشتۇرۇپ، نۇقتىلىق دوختۇرخانىلارنىڭ ھېساب قىلىش ۋە مۇلازىمەت، باشقۇرۇش قېلىپىنى كۈچلۈك ئىلگىرى سۈرگەن.

 ئۇندىن باشقا ئاپتونوم رايونلۇق خەلق ئىشلىرى نازارىتى بۇندىن كېيىن داۋالاش قۇتقۇزۇش مەبلىغىنىڭ ئىشلىتىلىش ئەھۋالىغا قارىتا نازارەتچىلىك تەكشۈرۈش خىزمىتىنى كۈچەيتىپ،مەبلەغنىڭ نەق جايىغا مۇۋاپىق ئىشلىتىلىشىنى ئىلگىرى سۈرىدۇ.