ئاسىيا كىندىكى تورى خەۋىرى،8-ئاينىڭ 1-كۈنىدىن 10 ئاينىڭ 31-كۈنىگىچە،ئۈرۈمچى شەھەرلىك ئۆسۈملۈك باغچىسىنىڭ بېلەت باھاسى ئەسلىدىكى 5 يۈەندىن 40 يۈەنگە ئۆسىدۇ،چۈنكى ئۆسۈملۈكلەر باغچىسىدا «دىنوزاۋر كۆرگەزمىسى» قىلماقچى بولغانلىقى ئۈچۈن. لېكىن بۇنى نۇرغۇنلىغان شەھەر ئاھالىسى قوبۇل قىلالمىدى.ھەتتا بېزىلەر ئاسىيا كىندىكى تورىنىڭ مۇنبىرىدە يازما ئېلان قىلىپ بۇ قېتىمقى بىلەت باھاسىنىڭ ئۆسۈشىنىڭ مۇۋاپىق بولغان-بولمىغانلىقى توغرىسىدا مۇنازىرىلەشتى.
      7-ئاينىڭ 31-كۈنى تورداش لاۋخې201107 مۇنداق دېدى: ئۆسۈملۈكلەر باغچىسى 8-ئاينىڭ 1-كۈندىن باشلاپ «دىنوزاۋر كۆرگەزمىسى»قىلىمىز دەپ ئەسلىدىكى 5 يۈەنلىك بېلەتنى 40 يۈەنگە چىقىرىپتۇ،10-ئاينىڭ 31-كۈنى ئاندىن 10 يۈەنگە چۈشىدىكەن. بۇ تېمىغا 130 نەچچە توردا ئەگىشىپ ھەر خىل ئىنكاسلارنى قايتۇردى. مۇتلەق كۆپ قىسىم تورداشلار مەركىزى شەھەردە،مۇتلەق كۆپ قىسىم باغچىلارنىڭ ھەقسىز بۆلىشى ئاستىدا ئۆسۈملۈكلەر باغچىسىمۇ ھەقسىز قىلىنماستىن بەلكى باھاسى بەك يۇقىرى بولۇپ كەتكەن،ئەسلى مۇنداق بولماسلىقى كېرەك دەيدۇ.
       بىر تورداش مۇنداق دەيدۇ : « مەن 7-ئاينىڭ 31-كۈنى ئۆسۈملۈك باغچىسىغا بارغانتىم،ئۇ يەردە بىرقانچە يۇقىرى تېخنىكىدا ئوخشىتىپ ياسىغان بىر قانچە دىنوزاۋرلارنى كۆردۈم،ئۇلارنى لاتا بىلەن ئوراپ قويۇپتۇ. ».
      lcm ئىسىملىك بىر تورداش مۇنداق دەيدۇ : « مېنىڭچە،دىنوزاۋر دېگەن ئۆسۈملۈك باغچىسى بىلەن ئانچە مۇناسىۋىتى يوق نەرسە،ئەگەر گۈل كۆرگەزمىسى ياكى ئۆسۈملۈك بىلەن مۇناسىۋىتى بار بىرەر ئىش قىلغان بولسا ئاندىن چۈشىنىشكە بولاتتى. » .
     ئىسمى رەڭلىك كۈل بولغان تورداش مۇنداق دەيدۇ : «مۇنداق قىممەت باھا مەركىزى شەھەردە ئەزەلدىن كۆرۈلۈپ باقمىغان،مېنىڭچە بۇنى ئاسمان پەلەك باھا دېسە ئارتۇق كەتمەيدۇ. » .
     8-ئاينىڭ 1-كۈنى چۈشتە،مۇخبىر ئۆسۈملۈك باغچىسىغا كېلىپ ئىشىكنىڭ يېنىغا چاپلاپ قويغان ئۇقتۇرۇشنى كۆردى. بىر قانچە سەيلە-ساياھەت قىلغۇچىلارنىڭ بېلەت باھاسىنى سوراپ قويۇپلا ئارقىسىغا ئۆرۈلۈپ كېتىپ بارغانلىقىنى كۆردى ۋە بىر بالا يېتىلىۋالغان ئايالنىڭ: « تۈنۈگۈن تېخى 5 يۈەن دېگەنتىڭلا ،بۈگۈن بىراقلا 40 يۈنگە ئۆستۈرۈپسىلەر، بەك قىممەت بولۇپ كېتىپتۇ . » دەپ سۆزلىگىنىنى ئاڭلىدى.
      مۇخبىر ئىگىلىشىچە،8-ئاينىڭ 1-كۈنى ئادەتتە مىڭلاپ ئادەم كىرىدىغان بۇ باغچىغا بۈگۈن ئاران 140 ئادەم 40 يۈەندىن بېلەت ئېلىپ كىرگەن. ئىسمىنى ئاشكارىلاشنى خالىمىغان بىر خىزمەتچى خادىم : « بېلەت باھاسى ئۆستى،كىرىدىغان ئادەم ماس ھالدا ئازلىدى،بىزنىڭ ئالدىن پەرەز قىلغىنىمىزدەك بولدى. » دېدى.
      بۇ مەسىلىگە ئۈرۈمچى شەھەرلىك تەرەققىيات،ئىسلاھات كومىتېتىدىكى مەسئۇل خادىملار چۈشەنچە بېرىپ مۇنداق دېدى:«بۇ بېلەت باھاسىنىڭ ئۆستۈرۈلۈشى ئەمەس،پەقەت كۆرگەزمىنىڭ بېلەت ھەققى،ھازىر ھەر قانداق يەردە كۆرگەزمە قىلسا بېلەت ئېلىپ كىرىدۇ،ئۆسۈملۈك باغچىسىدا دىنوزاۋر كۆرگەزمىسىمۇ شۇنىڭ ئىچىدە. »، بۇ كىشى يەنە مۇنداق دېدى: « بۇ كۆرگەزمىگىمۇ جىق مەبلەغ سېلىندى،سېلىنغان مەبلەغگە قارىغاندا ھازىرقى بېلەت باھاسىنى قىممەت ئەمەس، مۇۋاپىق دېيىشكە بولىدۇ. » .