| تەڭرىتاغنىڭ ئىچكىرىسىگە قاپسىلىپ قالغانلار قۇتقۇزۇۋېلىندى |
مەنبە:تەڭرىتاغ ئويغۇر تورى 2010-يىلى28-ئۆكتەبىر
قۇتقۇزۇش خىزمىتىدىن بىر كۆرۈنۈش
ۋاڭ شىنخوڭ خەۋىرى : مۇخبىرىمىزنىڭ شىنجاڭ ئۇيغۇر ئاپتونوم رايونلۇق جىددىي قۇتقۇزۇش ئىشخانىسىدىن ئىگىلىشىچە، شىنجاڭ ھەربىي رايونى مەلۇم قىسىمى قار – شىۋىرغان تۈپەيلىدىن تەڭرىتاغنىڭ ئىچكىرىسىگە جايلاشقان تېكەس ناھىيەسى قارادالا يېزىسىغا يېقىن جىلغىدا قاپسىلىپ قالغىنىغا ئالتە كۈن بولغان جۇڭگو قاتناش لايىھەلەش ئاكادېمىيەسىنىڭ ئۈچ ئىنژېنېرىنى تىك ئۇچار ئايروپىلان بىلەن قۇتقۇزۇشقا ئاتلىنىپ، 27 – ئۆكتەبىر سائەت 14 تە قۇتۇلدۇرغان. ھازىر قۇتۇلدۇرۇلغان بۇ ئۈچ ئىنژېنېرنىڭ سالامەتلىكى ياخشى ئىكەن.
ۋەقە يۈز بەرگەندىن كېيىن، شىنجاڭ ئۇيغۇر ئاپتونوم رايونلۇق پارتكومنىڭ مۇئاۋىن شۇجىسى، شىنجاڭ ئۇيغۇر ئاپتونوم رايوننىڭ رەئىسى نۇر بەكرى يوليورۇق بېرىپ، ئىنچىكە تەشكىللەپ، ئىلمىي قۇتقۇزۇپ، قامىلىپ قالغانلارنىڭ ھاياتىي بىخەتەرلىكىگە كاپالەتلىك قىلىشنى تەلەپ قىلدى.
ئاپتونوم رايونلۇق خەلق ھۆكۈمىتى بەنگوڭتىڭىنىڭ مۇئاۋىن مۇدىرى، شىنجاڭ جىددىي قۇتقۇزۇش باش ئەترىتىنىڭ مۇئاۋىن باشلىقى ئېلى ئىسمائىل تونۇشتۇرۇپ مۇنداق دېدى: 27 – ئۆكتەبىر سائەت 9 دا، شىنجاڭ ھەربىي رايونى مەلۇم قىسىمى بىر تىك ئۇچار ئايروپىلاننى غۇلجىغا ئەۋەتتى، تىك ئۇچار ئايروپىلان سائەت 11 دىن 30 مىنۇت ئۆتكەندە غۇلجا ئايرودۇرۇمىغا قونۇپ، جىددىي قۇتقۇزۇشقا كېرەكلىك يېقىلغۇ تولۇقلىغاندىن كېيىن، سائەت 12 دە ئىنژېنېرلار قاپسىلىپ قالغان جايغا باردى، تىك ئۇچار ئايروپىلان تىك يار ئارىسىدا پەس ئۇچۇپ،سائەت 13 تىن 15 مىنۇت ئۆتكەندە قاپسىلىپ قالغانلارنى تاپتى، شۇ ۋاقىتتا يەر يۈزىدىكى قارنىڭ قېلىنلىقى بىر مېتىردىن ئاشىدىغان بولغاچقا، تىك ئۇچار ئايروپىلان بوشلۇقتا پىرقىراپ توختاپ قاپسىلىپ قالغان ئۈچ ئىنژېنېرنى مۇۋەپپەقىيەتلىك قۇتۇلدۇردى. ئاندىن، تىك ئۇچار ئايروپىلان بۇ ئۈچ ئىنژېنېرنى ئېلىپ ئۈرۈمچىگە ئۇچۇپ، ئۇلارنى دوختۇرخانىغا يەتكۈزدى.
ئىگىلىنىشىچە، بۇ ئۈچ ئىنژېنېر لىنىيەنى بويلاپ ئاپتونوم رايوننىڭ 12 – بەش يىللىق يىرىك پىلانىدىكى مۇھىم تاشيول قۇرۇلۇشىنى تەكشۈرۈش ئۈچۈن، 17 – ئۆكتەبىر غۇلجىدىن يولغا چىققان ئىكەن. 21 – ئۆكتەبىر كەچتە قار – شىۋىرغانغا ئۇچراپ، تېكەس ناھىيەسىنىڭ قارادالا يېزىسىغا يېقىن جىلغا ئىچىدە قاپسىلىپ قالغان. بۇ قېتىمقى تەكشۈرۈشكە قاتناشقان جۇڭگو قاتناش لايىھەلەش ئاكادېمىيەسىنىڭ مۇتەخەسسىسلەر گۇرۇپپىسىدا جەمئىي ئالتە كىشى بولۇپ، قالغان ئۈچ كىشىنىڭ بىرسى يارىلىنىپ قالغاچقا، 21 – ئۆكتەبىر مۇددەتتىن بۇرۇن قايتىپ كەتكەن ئىكەن.
بۇ يىل كىرگەندىن بۇيان، شىنجاڭنىڭ شىمالىي قىسمىدا كۆپ قېتىم ئاز كۆرۈلىدىغان قار – شىۋىرغانلىق سوغۇق ھاۋارايى ۋە قار كۆچكۈنى كۆرۈلدى، ئالتاي، تارباغاتاي، ئىلى قاتارلىق جايلاردا ئاممىنىڭ قاپسىلىپ قېلىش ۋەقەسى كۆپ قېتىم يۈز بەردى. ئاپتونوم رايون بۇنىڭغا تېزلىكتە ئىنكاس قايتۇرۇپ، جىددىي قۇتقۇزۇش مېخانىزمىنى يولغا قويۇپ، شىنجاڭ ھەربىي رايونى مەلۇم قىسىمىنىڭ زور كۈچ بىلەن ماسلىشىشى ئارقىسىدا، قاپسىلىپ قالغان 2000 دىن ئارتۇق كىشىنى مۇۋەپپەقىيەتلىك قۇتۇلدۇردى.
قۇتقۇزۇۋېلىنغان ئۈچ ئىنژېنېر
| [ئاپتورى: مەنبەسى: ۋاقتى: 2010-10-28 13:54:44 ئۇقۇلۇشى: 113 قېتىم] |
|
