iPhoneئوقنى توسۇۋېلىپ جاننى قۇتقۇزۇپ قالدى

 يان تېلىفۇن ياندىن ئايرىماي ئېلىپ يۈرىدىغان زۆرۈر قورالغا ئايلىنىۋاتقان مۇشۇ كۈنلەردە ئۇ سىزنى ھەرخىل كۆڭۈل ئېچىش ئىقتىدارلىرى تەمىنلىگەندىن باشقا يەنە زۆرۈر تېپىلغاندا  سىزنىڭ ھاياتىڭىزنى قۇتقۇزۇپ قالالىشى مۇمكىن . نوكىيا تېلىفۇنىنىڭ ئېتىلغان ئوقنى توسۇۋالغانلىق ۋەقەسى يۈز بەرگەندىن كېيىن يېقىندا يەنە بىر HTC EVO 3D تېلىفۇنىنىڭ ئوقنى توسۇۋالغانلىق خەۋىرى تارقالغان . بۈگۈن لوس-ئانژىلىس ساقچى ئىدارىسىدە يەنە مۇشۇنىڭغا ئوخشاش ۋەقەدىن بىرسى يۈز بەردى . بىراق بۇ قېتىم ئوقنى توسۇۋالغىنى تېلىفۇننىڭ ئۆزى بولماستىن بەلكى ئالما تېلىفۇننىڭ توك قاچىلاش سىمى ئىكەن .

  ئىگىلىنىشىچە ، لوس-ئانژىلىس ساقچى ئىدارىسىنىڭ بىر ساقچىسى قارا-نىيەتلەر بىلەن قوراللىق ئېتىشقان ، شۇ چاغدا ئۇنىڭ ئىشتىنىنىڭ كەينى يانچۇقىدا ئالما يانفۇننىڭ توك قاچىلاش سىمى بولۇپ ، دەل مۇشۇ سىم ئۇنىڭ ساغرىسىغا تېگىدىغان بىر پاي ئوقنى توسۇپ قالغان . تەكشۈرۈش نەتىجىسىدىن مەلۇم بولىشىچە ئۇنىڭ ساغرىسى يىنىك دەرىجىدە يارىلانغان بولۇپ ، توك قاچىلاش سىمىنىڭ ھەقىقەتەن ئوقنىڭ زەربىسىنى زور دەرىجىدە ئاجىزلاتقانلىقى مەلۇم بولغان .

   نۆۋەتتە لوس-ئانژىلىس ساقچى ئىدارىسى Twitter ئارقىلىق بۇ ۋەقەنى جەمئىيەتكە ئاشكارىلىغان بولۇپ ، نۇرغۇن تورداشلار چاقچاق قىلىپ سۆز قالدۇرۇپ ئالما شىركىتىنىڭ بۇ ھادىسىدە »يارىلانغان« توك قاچىلاش سىمىنى ھەقسىز ئالماشتۇرۇپ بېرىدىغان بەرمەيدىغانلىقىنى سورىغان .