ئامېرىكىدىكى ئاخبارات ۋاستىلىرى يېقىندا ئېلان قىلغان خەۋەردە مۇنداق دېيىلدى: ھاۋاي ئۇنىۋېرسىتېتىدىكى مۇتەخەسسىسلەرنىڭ قارىشىچە، ياپونىيەدە يۈز بەرگەن دېڭىز تاشقىنى سۈپۈرۈپ ماڭغان 25 مىليون توننا ئەخلەت دېڭىز دولقۇنلىرىغا ئەگىشىپ شىمالىي ئامېرىكىغا قاراپ كېتىۋېتىپتۇ، بۇ نەرسىلەر ئەڭ كېچىككەندىمۇ 2014-يىلى ئامېرىكىنىڭ كالىفورنىيە دېڭىز ساھىلىگە يېتىپ بارىدىكەن. بۇ ئەخلەتلەرنىڭ ئارىسىدا بىنالارنىڭ قالدۇقلىرى، پارچىلانغان پاراخوتلارنىڭ ئەسكىلىكلىرى بار، ۋاقتى كەلگەندە بۇ نەرسىلەر ئامېرىكىنىڭ ئالياسكا ئىشتاتىدىن تارتىپ مېكسىكىغىچە بولغان 7000 كىلومېتىرلىق دېڭىز قىرغىقىنى قاپلايدۇ.

خەۋەردە يەنە مۇنداق دېيىلدى: ساھىلىغا يەتكەن بۇ ئەخلەتلەرنىڭ كالىفورنىيە بىلەن ئالياسكىغا نۇرغۇن ئاۋارىچىلىك تېپىپ بېرىدىغىنى ئېنىق. ۋاقتى كەلگەندە بۇ ئەخلەتلەر يەنە تىنچ ئوكياننىڭ ئېقىنىغا ئەگىشىپ، ئادەمنى بىزار قىلىدىغان ئەخلەت ئارىلىنى بەرپا قىلىشىمۇ مۇمكىن. تەتقىقاتچى خافنا مۇنداق دېدى: «رۇسىيەنىڭ بىر پاراخوتى ھونولۇلۇدىن قايتىپ كېلىۋاتقان يول ئۈستىدە دېڭىز تاشقىنى سۈپۈرۈپ ماڭغان ئەخلەتلەرنى كۆرگەن. بىزدە قورقۇنچ پەيدا قىلىش خىيالى ئەسلا يوق، ئەمما ئۇلارنىڭ قايتىپ كېلىشىنى تامامەن ياخشى ئىش دەپمۇ ئېيتالمايمىز».