ئۈرۈمچى كەچلىك گېزىتى خەۋىرى:
ئەنگلىيەلىك مۇتەخەسسىسلەر بىر گۇرۇپپا ئادەمنى ئۇخلاشتىن بۇرۇن ئىككى سائەت، يەنە بىر گۇرۇپپا ئادەمنى ئەتىگەندە ئورنىدىن تۇرغاندىن كېيىن 12 سائەت دەرس يادلاشقا ئورۇنلاشتۇردى، بۇ سىناقنى بىر مەزگىل داۋاملاشتۇرغاندىن كېيىن مۇنداق يەكۈن چىقاردى: «ئادەم ئۇخلاشتىن بۇرۇن يادا ئالغان بىلىم مەڭگۈ ئەستە تۇرىدىكەن، ۋاقتى كەلگەندە ئېنىق ئەسكە ئالالايدىكەن».
مۇتەخەسسىسلەر يەنە مۇنداق دېيىشتى: «ئەستە تۇتۇش ئىقتىدارىنىڭ يۇقىرى تۆۋەن بولۇشى چوڭ مېڭىدىكى سەقەنقۇر رايونىغا باغلىق، چۈنكى سەقەنقۇر رايونى مەخسۇس ئەستە تۇتۇش ۋە ئۆتكەن ئىشلارنى ئەسلەشكە مەسئۇل. ئادەم ئۇخلىغان ۋاقىتتا ئۆگەنگەن ئۇچۇرلار ئۈزلۈكسىز پارچىلىنىپ ھەم تاۋلىنىپ سەقەنقۇر رايونىنىڭ راۋان قوبۇل قىلىشىغا مۇيەسسەر بولىدۇ، شۇڭا بۇ ئەسلىمىلەر ئادەم ئويغانغاندىن كېيىن ھەر قاچان ئىشلىنىشكە تەييار تۇرىدۇ».
