ئۈرۈمچى كەچلىك گېزىتى خەۋىرى:
قىش پەسلىدە تۇغۇتلۇق ئاياللارنىڭ قىرقىنى سالامەت چىقارمىقى خېلى تەس. بىر قىسىم ئاياللار قىشتا ھەدىدىن زىيادە قېلىن كىيىنىۋالىدۇ، ئەمما ئۆي ئىچىنىڭ ئىسسىپ، سوۋۇپ تۇرۇشى بىلەن ئاسانلا زۇكام بولۇپ قالىدۇ. ئۇنداقتا قىرقى ئىچىدىكى ئاياللار قىش پەسلىدە نېمىلەرگە دىققەت قىلىشى كېرەك؟
ئۈرۈمچى شەھەرلىك ئانا-بالىلار ساقلىقنى ساقلاش دوختۇرخانىسىنىڭ دوختۇرى مۇخبىرىمىزغا مۇنداق دېدى: قىش پەسلىدە قىرقى ئىچىدىكى ئايالغا نىسبەتەن ئۆينى پاكىز، نەمخۇش ھەم ئىلمان تۇتۇش ناھايىتى مۇھىم. ئۆي تېمپراتۇراسى 20-25سېلتسىيە گرادۇس ئەتراپىدا بولسا مۇۋاپىق.
ئادەتتە پار يوق ئۆيلەردە ھاۋا تەڭشىگۈچ ياكى توك پارۋاي ئارقىلىق ئۆي ئىچىنىڭ تېمپېراتۇرىسىنى تەڭشىسە بولىدۇ. ئادەتتە ئۆي ئىچىنىڭ نەملىكى %50-%65 ئەتراپىدا بولسا مۇۋاپىق. ئادەتتە ھامىلدارلىق مەزگىلىدە بەدەندە يىغىلىپ قالغان بىر قىسىم سۇيۇقلۇقلار قىرقى ئىچىدە ئاستا ئاستا ئاجرىلىپ بەدەن سىرتىغا چىقىرىدىغان بولغاچقا، بۇ مەزگىلدە بەدەن كۆپ تەرلەپ، كىيىم-كېچەك ئاسان مەينەت بولىدۇ، شۇڭا بەدەننىڭ پاكىزلىقىنى ساقلاش ئۈچۈن پات پات يۇيۇنۇپ، كىيىم-كېچەكلەرنى ئالماشتۇرۇپ تۇرۇشى كېرەك. ئادەتتە تۇغۇپ بىر ھەپتىدىن كېيىن يۇيۇنسا ئەڭ ياخشى. يۇيۇنغاندا سۇنىڭ تېمپېراتۇرىسىغا ئالاھىدە دىققەت قىلىش، مۇنچىنىڭ تېمپېراتۇرىسى 20 گىرادۇس ئەتراپىدا بولسا مۇۋاپىق.
قىش پەسلىدە سىرت سوغۇق، ئۆي ئىچى ئىسسىق، شۇڭا ۋاقتى-ۋاقتىدا ئۆينىڭ ھاۋاسىنى ئالماشتۇرۇپ تۇرۇشتىن باشقا، ئورۇن كۆرپىلەرنىڭ بەك قېلىن بولۇپ كەتمەسلىككە دىققەت قىلىش لازىم. يوتقان نېپىزرەك بولۇشى، شۇنداقلا يوتقان كۆرپىگە ھاۋا ئۆتۈش تۇرىدىغان چىگە، پاختا رەختلەرنى تاللاپ ئىشلىتىش كېرەك.
بۇنىڭدىن سىرت، قىرقى ئىچىدە ئىسسىقلىق مىقدارى يۇقىرى شۇنداقلا ئاسان ھەزىم بولىدىغان تاماقلارنى ئىستېمال قىلىش بىلەن بىللە، كۆپرەك سۇ ئىچىپ بەدەننىڭ ئەسلىگە كېلىشنى ئىلگىرى سۈرۈپ، سۈت مىقدارىنىڭ يېتەرلىك بولۇشىغا كاپالەتلىك قىلىش لازىم. تۇغۇتتىن كېيىن بەدەن ئاجىزلاپ ئاسان قان قېتىش كېلىپ چىقىدۇ، شۇڭا ئېشىپ قالغان مۇزدەك تائام ۋە سوغۇق كېلىدىغان تائاملارنى قەتئىي يېمەسلىك كېرەك. چاچنىڭ تازىلىقىغىمۇ ئەھمىيەت بېرىش، چاچنى يۇيۇپ تاراپ بېرىش كېرەك.
دېمەك، بۇ مەزگىلدە كۈتۈنۈش بىلەن مۇۋاپىق يەڭگىل ھەرىكەتلەرنى بىرلەشتۈرۈپ ئېلىپ بارغاندا، قىرقىنى ياخشى چىقىرىپلا قالماي بەدەن شەكلىنىمۇ تېز ئەسلىگە كەلتۈرەلەيدۇ.
