ئۈرۈمچى كەچلىك گېزىتى خەۋىرى:
ھازىر بازارلاردا سېتىلىۋاتقان گىرىم بۇيۇملىرىنىڭ تۈرى ناھايىتى كۆپ بولۇپ، ئۇلارنىڭ تەركىبى بىرقەدەر مۇرەككەپ، ئەگەر گىرىم بۇيۇملىرى بەك ئۇزاق تۇرۇپ قېلىپ، ساقلاش ۋاقتىدىن ئېشىپ كەتسە ياكى ئاغزى ئېچىلغاندىن كېيىن ئىشلىتىلمەي بەك ئۇزاق تۇرۇپ قالسىمۇ سۈپىتى ئاسانلا ئۆزگىرىپ كېتىدۇ. ئۇنداقتا سۈپىتى ئۆزگەرگەن گىرىم بويۇملىرىنى قانداق پەرقلەندۈرۈش كېرەك؟
تەركىبىدە ھەسەل، ئاقسىل، ۋىتامىن قاتارلىق ئوزۇقلۇق ماددىلار بىرقەدەر كۆپ گىرىم بۇيۇملىرىنىڭ ساقلىنىش ۋاقتىمۇ بىرقەدەر قىسقا بولۇپ ئۇزاق تۇرۇپ قالسا ياكى ياخشى ساقلانمىسا ئوڭايلا سۈپىتى ئۆزگىرىپ قالىدىكەن. سۈپىتى ئۆزگەرگەن گىرىم بۇيۇملىرىنىڭ رەڭگى، شەكلى پۇرىقى ۋە رولى بىردەك ئۆزگەرگەچكە، ئۇنى يۈزگە سۈركىگەندە، تېرىنى غىدىقلاپ، تېرىدە ئاسانلا ئەكس تەسىر پەيدا قىلىدىكەن. سۈپىتى ئۆزگەرگەن گىرىم بۇيۇملىرىغا تۆۋەندىكى بىرقانچە جەھەتتىن قاراپ ھۆكۈم قىلغىلى بولىدىكەن.
غەيرىي پۇراق بولىدىكەن؛ رەڭگى دۇغسىمان كۈلرەڭ بولۇپ قالىدىكەن؛ شەكلى ئۆزگىرىپ، رولى يوقايدىكەن.
گىرىم بۇيۇملىرى سۈپىتىنىڭ ئۆزگىرىپ قېلىشىدىن ساقلىنىش ئۈچۈن ئۇنى سېتىۋالغان ھامان ئىشلىتىش، ئۇزاق ساقلىماسلىق كېرەك. يىل ئاتلىغان گىرىم بۇيۇملىرىنىڭ سۈپىتى ئۆزگەرمىگەن تەقدىردىمۇ ئۇنىڭ رولى ئاجىزلىشىپ كېتىدىكەن.
