ھامىلە سوغۇقىنىڭ غىدىقلىنىشىغا بەك سەزگۈر بولىدۇ، شۇڭا ھامىلىدار ئاياللار سوغۇق ئىچىملىك ئىچسە، ھامىلىنىڭ بالىياتقۇدىكى ھەرىكىتى كۆپىيىپ كېتىدۇ. بۇ ھامىلىدارلاردىن «سوغۇق»تىن پەرھىز تۇتۇپ، ئۆزى ۋە ھامىلىنىڭ ساغلاملىقىغا زىيان سالماسلىقنى تەلەپ قىلىدۇ.
ئۇنىڭدىن باشقا، ئاياللار ھامىلىدار مەزگىلىدە ئاشقازان سوغۇق ۋە ئىسسىقىنىڭ غىدىقلىشىغا ناھايىتى سەزگۈر كېلىدۇ. مارۇژنا ياكى كولاغا ئوخشاش سوغۇق يېمەكلىكلەر بىلەن كۆپ ھەپىلەشكەندە، ئاشقازان ۋە ئۈچەيدىكى قان تومۇرلار يىگىلەپ، ئاشقازان كىسلاتاسىنىڭ ئاجرىلىشى ئازىيىپ، ھەزىم قىلىش ئىقتىدارى چېكىنىدۇ، ئۇزاق داۋام قىلسا ئاشقازان كېسىلى پەيدا بولىدۇ.
مۇھىم نۇقتا شۇكى، ھامىلىدارلارنىڭ بۇرۇن، يۇتقۇنچاق ۋە كېكىردەكلىرىدىكى نەپەس يولى شىللىق پەردىسىگە قان تولۇۋالىدۇ ياكى سۇلۇق ئىششىق پەيدا بولىدۇ، سوغۇق ئىچىملىك قان تولۇۋالغان تومۇرلارنى تېخىمۇ يىگىلىتىپ، قاننىڭ ئايلىنىشىنى ناچارلاشتۇرىدۇ، بۇنىڭ نەتىجىسى گال ۋە باش ئاغرىش، ھەتتا يۆتەل بولىدۇ، ئېغىرلاشسا يۇقىرى نەپەس يولى يۇقۇملىنىدۇ، بادامسىمان بەز ياللۇغلىنىدۇ.
