رۇبائىيلار!

ئەركمان

(ئاپتورنىڭ ئىسمىنى ئەڭ ئاخىردا دەيمەن، دېيىشتىن بۇرۇن تېپىۋالغۇچىلارغا سوۋغاتلىق بېرىمەن، چۈنكى كىتاب ئوقۇش يىلىدا سىزنىڭ بىلمەي قېلىشىڭىز مۇمكىن ئەمەس)

(كۈندە بىر كۇبلېت)
ئاپەتتۇر ئۆزگىنىڭ رىزقىنى يېمەك،
بىرىنىڭ بىرىدە قالماستۇر، دېمەك.
مەگەركىم جاھانغا خوجا بولساڭمۇ،
يېگىنىڭ ھالالمۇ، ئويلىشىڭ كېرەك.

ئەركمان

بىراۋغا كۈچۈكتەك ئەركىلەپ كەتمە،
ئۆزگىنىڭ باغىدا سەگىدەپ كەتمە.
ھەر لوقما يېگىنىڭ ئەجرىڭدىن بولسۇن،
ھارامغا دۈم چۈشۈپ، پەتىلەپ كەتمە.

ئەركمان

ياز كېتىپ پەسىلنىڭ كەلگەندە قىشى،
شۇ يازغا تارتىشىپ مۇڭلىنار كىشى.
كۈن-ئاينى ئۆتكۈزۈپ تەلپۈنۈش بىلەن،
قۇرۇيدۇ تۇيدۇرماي يۈرەك بېغىشى.

ئەركمان

قۇلاق سال نېمە دەر ئەلنىڭ دانىشى،
ئەلنى دەپ ئۆتكەننىڭ ئاغرىماس بېشى.
تارىخنىڭ دارىغا ئېسىلغاي بىر كۈن،
ئەل-يۇرتنى قاقشىتىپ جان باققان كىشى.

ئەركمان

ئەل كۆڭلى بىر دېڭىز شاۋقۇنسىز دېمە،
نە قىلسام كۆتۈرەر ئۈن-تىنسىز دېمە.
پەقەتلا سەن ئۈچۈن تۇغۇلماس قۇياش،
ئۆمرۈڭنى ئۆتىدۇ ھېچ تۈنسىز دېمە.

ئەركمان

مەيلى قىل ئىلتىجا يا ئۈمىد گاھى،
ساڭىلا باقمايدۇ پەلەكنىڭ رايى.
ئۆتكۈنچى دەۋرگە بولساڭمۇ باشبۇغ
ۋە لېكىن قوۋمىڭغا بولمىغىن ئاسىي.

ئەركمان

ھەر كىمگە مۇقەددەس تۇغۇلغان ۋەتەن،
ۋەتەندىن ئايرىلساڭ كىيگىنىڭ كېپەن.
قۇي خۇشنۇد شارابىڭ ئىچەي بىرقەدەھ،
ۋەتەننىڭ ئىشقىدا يانسۇن بۇ بەدەن.

ئەركمان

بولسىمۇ بۇ جاھان سەيلىگاھ سىياق،
ئەمەستۇر ھېچ كىشى غۇسسەدىن يىراق.
بۇلبۇلمۇ سايراپلا ئۆتمەس جاھاندىن،
چۈشەنسەڭ، ساڭىمۇ ھايات ئەشۇنداق.

ئەركمان

ئۆزۈڭلا ئۆتەمسەن شاھانە ياشاپ،
بۇ ئانا تۇپراقنىڭ يىلىكىن شوراپ؟
يادىڭدا بولمىسا ئەل-يۇرتنىڭ غېمى،
قانچىلىك باي بولغىن، ئۇ نۆلگە ھېساب.

ئەركمان

قولنىڭمۇ پاكىزى سۇدىلا ئەمەس،
نى قول بار بىر ئۆمۈر ھارامدىن كەلمەس.
بەزىلەر قالسىمۇ سەكراتقا چۈشۈپ،
كۆڭلىدىن كەتمەيدۇ ھارامغا ھەۋەس.