رۇبائىيلار!

ئەركمان

ئەل گويا مۇستەھكەم بىر قورام تاشتۇر،
دىل مېھرى بىر دۇنيا، ئەقلى ھەم شاشتۇر.
ئەل-يۇرتتىن ئايرىلساڭ باسار پالاكەت،
يول توغرا بولمىسا كىممۇ قاياشتۇر؟

ئەركمان

ئەي دوستۇم ئەل ئۈچۈن جاننى پىدا ئەت،
ئەر دېسەڭ ئكزۈڭنى كۆرسەت جاسارەت.
ئەل بىر كۈن ئاھ ئۇرۇپ سالمىسۇن سەندىن،
كەلگۈسى ئەۋلادقا بولما شىكايەت.

ئەركمان

نەقەدەر ئازغۇنلۇق ئۆزىن بىر دېمەك،
ئۇلۇغلار نەسەبى، پۇشتى-پىر دېمەك.
كىيگىنىڭ بولسىمۇ سۇلتانلىق تونى،
تون بۆلەك، ئىنسانلىق ھېكمىتى بۆلەك.

ئەركمان

ئاگاھ بول، كۆز قاراڭ ئېقىپ كەتمىسۇن،
ئۆمرۈڭگە نەپسىڭ ئوت يېقىپ كەتمىسۇن.
ئەل-يۇرتنىڭ غېمى ۋە خىزمىتىدە بول،
لەنەتنىڭ مىقىنى قېقىپ كەتمىسۇن.

ئەركمان

تاغلارنى زېمىننىڭ قوزۇقى دەپ بىل،
ئەل مېھرىنى ھاياتلىق ئوزۇقى دەپ بىل.
ناھەقنى يار قىلىپ، ھەقنى چەيلىسەڭ،
ئۆزۈڭنى ئىنساننىڭ بۇزۇقى دەپ بىل.

ئەركمان

ئەلگە بال بولغىنكى، نەشتىرى بولما،
مەلئۇننىڭ يولباشچى، مەشئىلى بولما.
گەر بىراۋ بۆك دېسە باشنىمۇ قوشۇپ،
ئېپكېلەر سەركەردە-نۆكىرى بولما.

ئەركمان

بىر كۈنچە بولسىمۇ ياشا يول تېپىپ،
ئۆمرۈڭنى خوراتما بارنى يەپ يېتىپ.
ئىنسان ئۇ تەييارغا يارالماس ئەسلا،
ئۆتمىگىن ئۆزگىنىڭ قولىغا بېقىپ.

ئەركمان

ئۆزۈڭنى ئويلىماي چىقارما قۇيۇن،
چاغلىما ۋەياكى ھاياتنى ئويۇن.
ئۆتكەن كۈن، قىلمىشنىڭ ھېسابى باردۇر،
بىلىپ قوي قىسمەتنىڭ ئارقىنى ئۇزۇن.

ئەركمان

كۆڭۈلغە ئاراملىق شارابىڭنى ئىچ،
بەختتۇر كۈنلەرنى ئۆتكۈزمەك تىنچ.
تىغىنى بىھۇدە تاشقا ئۇرغۇچە،
ياخشىدۇر غىلابتا تۇرغىنى قىلىچ.

ئەركمان

ھەمىشە تۇرغايمۇ سۇلىرىڭ ئېقىپ،
بۇ دۇنيا ئانىدەك ساڭىلا بېقىپ؟
بىلگىنكى، قاچىدۇ بەزىدە قۇيۇن
ھاياتلىق شېخىڭدىن غوراڭنى قېقىپ.