‹‹ ئون ئىككى مۇقام ›› نىڭ ئىچىدىكى ھەر بىر مۇقام ‹‹ چوڭ نەغمە ›› ، ‹‹ داستان ›› ، ‹‹ مەشرەپ ›› قاتارلىق ئۈچ بۆلەكتىن تەركىب تاپقان . بۇنىڭدىكى ‹‹ چوڭ نەغمە ›› يۈرۈشلۈك لىرىك ناخشا ، چالغۇ مۇزىكىلىرى ۋە ناخشا – ئۇسسۇل كۈيلىرىدىن ئىبارەت بولىدۇ . ‹‹ داستان ›› يۈرۈشلۈك ئېپىك ۋەقە ، چالغۇ مۇزىكىلىرىدىن شەكىللەنگەن يۈرۈشلەشكەن كۈي بولىدۇ . ‹‹ مەشرەپ ›› يۈرۈشلەشكەن ناخشا – ئۇسسۇل كۈيلىرىبولىدۇ .
‹‹ ئون ئىككى مۇقام ›› دىكى ھەر بىر مۇقامدا 20 دىن 30 غىچە مۇزىكىلىق كۈي بولىدۇ . ئورۇنلاش ۋاقتى ئىككى سائەتتىن ئۈچ سائەتكىچە بولىدۇ . ئون ئىككى يۈرۈش مۇقامدا ناخشا – مۇزىكىلىرى ، چالغۇ مۇزىكىلىرى ۋە ئۇسسۇل مۇزىكىلىرى ئۈچ يۈزدىن ئارتۇق . ھەممىسىنى ئورۇنلاپ بولۇشقا يىگىرمە نەچچە سائەت كېتىدۇ . ئۇنىڭ ئۈستىگە ھەر قايسى رايونلارغا تارقالغان مۇقام نۇسخىلىرى ئوخشاش بولمايدۇ . ئىلى ۋىلايىتىگە تارقالغان ‹‹ ئون ئىككى مۇقام ›› نىڭ ھەر بىر مۇقامىدا پەقەت ‹‹ مۇقەددىمە ›› بىلەن ‹‹ داستان ›› ، ‹‹ مەشرەپ ›› لا بولىدۇ . ‹‹ چوڭ نەغمە ›› دە ‹‹ مۇقەددىمە ›› دىن باشقا مۇزىكىلىق كۈيلەر يوقىلىپ كەتكەن .
( ‹‹ ئون ئىككى مۇقام ›› كىتابىدىن ئېلىندى )