5- ئاينىڭ 22 - كۈنى چۈشتىن كېيىن شىنجاڭ ۋاقتى سائەت 3:00 تە ، جۇڭگو B دەرىجىلىكلەر بىرلەشمە مۇسابىقىسىنىڭ 6 - ئايلانما مۇسابىقىسى ئوينالدى . شىنجاڭ كوماندىسى ساھىبخان مەيداندا بېيجىڭ سەنگاۋ كوماندىسىنى كۈتىۋالدى . نەتىجىدە شىنجاڭ كوماندىسى ئاۋال بىر توپ كەتكۈزۈپ قويۇپ ، ئارقىدىن ئىككى توپ كىرگۈزۈپ 2 - 1 نەتىجە بىلەن غەلبە قىلدى . بۇ مەيدان غەلبىدىن كېيىن شىنجاڭ كوماندىسىنىڭ ئومۇمىي نومۇرى 14 نومۇرغا يىتىپ ، بىرلەشمىدە داۋاملىق 1 - ئورۇندا ماڭماقتا . مۇسابىقىنىڭ ئالدىنقى مەيدانىدا بېيجىڭ سەنگاۋ كوماندىسى بىر توپ كىرگۈزىۋالدى . كېيىنكى مەيداندا شىنجاڭ كوماندىسى كۈچلۈك ھۇجۇملارنى تەشكىللەپ بىر نوقتا توپ تىپىش پۇرسىتىگە ئېرىشتى ، بۇ توپنى شىنجاڭ كوماندىسىنىڭ سابىق كاپىتانى 5 - نومۇرلۇق پەرھات كىرگۈزۈپ نەتىجىنى تەڭلەشتۈردى ، ئوغلانلىرىمىز ھۇجۇمنى بوشاشتۇرماي يەنە بىر بۇلۇڭ توپ پۇرسىتىدىن پايدىلىنىپ 10 - نومۇرلۇق ئەخمەتجان بىر توپ كىرگۈزۈپ شىنجاڭ كوماندىسىنى ئۆز مەيدانىدىكى تۇنجى غەلبىگە ئىرىشتۈردى .
بۇ مەيدان مۇسابىقىگە كىرگەن تاماشىبىنلارنىڭ سانىمۇ ئالدىنقى قېتىملىق ساھىبخان مەيداندىكى تاماشىبىنلارنىڭ سانىدىن ئېشىپ كەتكەن بولۇپ ، نەق مەيداندا 45000 ئەتراپىدا تاماشىبىن بۇ مەيدان مۇسابىقىنى كۆرگەن ، بەلكىم ئالدىنقى قېتىملىق رىكورتنى يەنە بىر قېتىم يېڭىلىۋىتىشى مۇمكىن ئىكەن .
