تاغدىكى سىرلىق دىلو

akpar510

	ئاق تۇگمە ئەڭ چۇڭ ئىسپات.. قانداق دىدىم؟؟؟؟

ansar1013

	مىنىڭچەقاتىل ئاشۇلارنىڭ ئىچىدىكى بىرسى ئەمەس

ArmanimⅡ

	قېنى داۋامىنى يوللاڭ ... داۋامىغا تەشنامىز .

erkinaz

	ھەممەيلەن كەينىگە قايتتى . مەن دىلنار ھەدىنى چاقىرىپ توختىتىۋالدىم . - نېمە ؟ - دېدى ئۇ . - تېلفونىڭىزنىڭ ھىساپلغۇچىسى بارمۇ ؟ - بار . - بېرىپ تۇرۇڭا ، مەن بىر نەرسە ھىسابلىۋالاي ، - دېدىم مەن . ئۇ تېلفوننى ماڭا بەردى . مەن تېلفوننى ئېلىپ ، ئىكرانىنى ئاچتىم . « دەرۋەقە شۇنداق ئىكەن . » دېدىم ئىچىمدە. بىر ھىسابنى ئىشلىۋىلىپ تېلفوننى ئۇنىڭغا قايتۇرۇپ بەردىم . ھەممىمىز رەنا ياتقان ئۆيگە يىغىلدۇق . كۆپچىلىكنىڭ ھەممىسى ماڭا نېمە دەركىن دەپ قاراپ تۇراتتى . - بىز بۇ يەرگە كەلگەندىن بېرى ، سىرلىق ئىشلار ئارقا - ئارقىدىن يۈز بەردى ، - دەپ گەپ باشلىدىم مەن ، - مەن ھازىر بۇ سىرلارنى بىر - بىرلەپ ئېچىپ بېرىمەن . 7 - رەناغا كېچىدە ھۇجۇم قىلغان ۋەقەدىن باشلاپ ، نادىر دوختۇرنىڭ ئۆلۈمىگىچە يۈز بەرگەن بارلىق ئىشلارنى قىلغان ئادەم دەل سىز ! - دەپ دىلنار ھەدىنى كۆرسەتتىم . ھەممەيلەننىڭ كۆزى ھەيرانلىق بىلەن ئۇنىڭغا تىكىلدى . دىلنار ھەدىنىڭ كۆزلىرى چەكچىيىپ كەتتى . - بۇ راستمۇ ؟ - دەپ سورىدى ساۋۇت مۇئەللىم . - بۇ قانداق مۇمكىن بولسۇن ؟ - دېيىشتى خۇرشىدە ھەدە بىلەن نۇسرەت ھەدە. - گەپنى ئاۋۋال ئەسقەر ئاكىنى قەستلەشتىن باشلايلى ،- دېدىم مەن ،- سىز ئىلگىرى بۇ يەرگە كېلىپ باققان ،سىز شۇ چاغدىلا مۇشۇ قېتىملىق قاتىللىقنى پىلانلىغان . يولغا چىقىشتىن ئىلگىرى پۇختا تەييارلىق قىلغان . تۈنۈگۈن سىز ئاۋۋال ئەسقەر ئاكا بىلەن يېرىم كېچىدە كۆرۈشۈشنى كېلىشىپ قويغان. مەن ئۇنىڭ سىزگە باشقىچە قارايدىغانلىقىنى سەزگەن ئىدىم . سىز بىر پىسخىك دوختۇرى بۇنى مەندىنمۇ ئېنىق سېزەلەيسىز . سىز دەل مۇشۇنىڭدىن پايدىلىنىپ ئۇنىڭ بىلەن كۆرۈشۈشنى قولغا كەلتۈردىڭىز . يېرىم كېچە بولغاندا سىز ئاستا ئورنىڭىزدىن تۇرۇپ ئۇ ياتقان ئۆيگە بېرىپ ئىشىكنى چەكتىڭىز . ئۇ ئىشىكنى ئاچتى . سىز ئۇ دىققەت قىلمىغان پەيتتىن پايدىلىنىپ ، ئالدىن تەييارلىۋالغان ئېتىل ئىفىرغا چىلانغان ياغلىقنى ئۇنىڭ بۇرنىغا تۇتتىڭىز . ئۇ ھوشىدىن كەتكەندىن كېيىن ، ئۇنى كارىۋاتقا يۆلەندۈرۈپ ئولتۇرغۇزۇپ ، پىچاق بىلەن ئۇنىڭ بىلىكىنىڭ تومۇرىنى كېسىۋەتتىڭىز . ئاندىن ئىشىكنى تاقاپ قويۇپ چىقىپ كەتتىڭىز. سىزنىڭ مەقسىدىڭىز ئۇنى ئۆزىنى ئۆلتۈرۈۋالغاندەك كۆرۈنۈش پەيدا قىلىش ئىدى. ئەمما ئۇنىڭ قېشىغا سىزدىن بۇرۇن بىرسى كىرىپ ئۇنى ئۇرۇپ يارىلاندۇرغانلىقىنى ئويلاپمۇ باقمىغان ئىدىڭىز . گەپ بۇ يەرگە كەلگەندە دىلنار ھەدىنىڭ چىرايىدا ھەيرانلىق ئىپادىسى ئەكس ئەتتى . ھەممەيلەن جىمجىت ئاڭلاپ تۇراتتى . - ئۇنىڭدىن بۇرۇن كىرگەن كىم ؟- دېدى ساۋۇت مۇئەللىم ، ئۇنىڭ چىرايى بىرنەرسىنى بىلگەندەك تۇيۇقسىز ئۆزگەردى ،- ئەخمەتجان .... - دەل شۇ ،- دېدىم مەن ،- ئۇ دىلنار ھەدىدىن خېلىلا بۇرۇن ئۇنىڭ قېشىغا كىرگەن . ئەسقەر ئاكا ئۇنى دىلنارمىكى دەپ ئويلاپ ئىشىكنى ئاچقان . ئەخمەتجان مۇئەللىم تۈنۈگۈن چۈشتىن كېيىن داستىخان ئۈستىدە ئۇنىڭ بىلەن تاكاللىشىپ قالغان ئىش ئۈچۈن ئۇنى ئىزدەپ كىرگەن ، پاراڭنىڭ كونكىرت مەزمۇنىنى بىلمىسەممۇ ، ئۇلارنىڭ ئارىسدا بىر مەنپەئەت توقۇنۇشى بولغانلىقى ئىنىق . ئۇلار يەنە تاكاللىشىپ قالغان. ھەتتا ئەتتىگەنكىدىنمۇ بەكرەك قاتتىق تاكاللاشقان . ئۇلار ئۇرۇشۇپ قالغان بولۇشىمۇ مۇمكىن . ئارىلىقتا ئەخمەتجان مۇئەللىم ئەسۋاپ ساندۇقىنىڭ قېشىغا يىقىلغان ، بۇ چاغدا ئەسقەر ئاكا كارىۋاتنىڭ بېشىدىكى ياستۇق ئاستىدىن پىچاقنى ئالماقچى بولۇپ ، كەينىگە بۇرۇلغان . ئەخمەتجان مۇئەللىم ئەسۋاپ ساندۇقىدىن چوڭ كۇلۇچنى ئېلىپ ، ئۇنىڭ كەينىدىن ئۇنىڭ بېشىغا بىرنى سالغان . ئەگەر ئۇ ئۇنداق قىلمىغاندا ئۆلىدىغىنى چوقۇم ئەخمەتجان مۇئەللىم بولاتتى . ئەسقەر ئاكا شۇ زامات يەرگە يىقىلغان . ئەخمەتجان مۇئەللىمىنىڭ غەزىپى بېسىلىپ ، ئۆزىگە كەلگەندە ، ئۇنىڭ يەردە مىدىرلىماي ياتقانلىقىنى كۆرگەن ، شۇنىڭ بىلەن ئۇنى ئۆلۈپتۇ دەپ ئويلاپ قالغان . ئۇ قورقۇپ كېتىپ ، ئەسقەر ئاكىنىڭ يانچۇقىدىن ماشىنىنىڭ ئاچقۇچىنى ئېلىپ ماشىنىنى ھەيدەپ قېچىپ كەتكەن . - ئەسلى مۇنداقكەندە ،- دېدى مۇرات ئاكا ،- ئەسقەرمۇ ئۇنى ئۆلتۈرمەكچى بولۇپتىكەن، قانداق ئاغىنە ئۇلار ؟ - بۇ پۈتۈنلەي پۇل ، مەنپەئەت سەۋەبىدىن ،- دېدىم مەن . - كېيىنچۇ ؟ - دېدى ساۋۇت مۇئەللىم . - ئەسقەر ئاكا بىردەم ھوشسىز ياتقاندىن كېيىن ، دىلنار ھەدە كېلىشتىن بىر نەچچە مىنۇت ئىلگىرى ھوشىغا كەلگەن ۋە دەرھال بېرىپ ئوچۇق قالغان ئىشىكنى تاقىۋەتكەن . ئاندىن ئۇ بېشىنىڭ يېرىلغىنىنى بىلىپ سومكىسىدىن دورىلىق پىلاستىرنى چىقىرىپ چاپلىۋالغان . شۇ چاغدا دىلنار ھەدە ئىشىكنى چەككەن . ئۇ يەردە تۇرغان كۇلۇچنى پۇتى بىلەن تېپىپ كارىۋات ئاستىغا كىرگۈزۈۋېتىپ ، ئىشىكنى ئاچقان . كېيىنكى ئىشلار بايا مەن دېگەندەك بولغان . - بوپتۇ ، شۇنداقمۇ دەيلى ،- دېدى دىلنار ھەدە بىر خىل تەمكىنلىك بىلەن ،- مەن ئىشىكنى قانداق قىلىپ ئېتىپ قويغاندىمەن ؟ مېنى سېھىر ئىشلەتكەن دىمەيدىغانسىز ؟ - بۇ راستلا سېھىر ئىشلەتكەنگە ئوخشىشىپ كېتىدۇ ،- دېدىم مەن ،- ئىشىك بىر قاناتلىق ئىشىك ، ئىشىك لوكىسى يانغا تاقىلىدىغان لوكا . ئۇ مايلاپ سىلىقلاشتۇرۇپ قويۇلغان . ئىشىكتە بىرمۇ يوچۇق يوق . دېرىزىمۇ ئىچىدىن تاقاق، يەنە كېلىپ ئۇنىڭدا قىلچە ئېچىلغانلىق ئالامىتى يوق . دەسلەپ مەنمۇ بۇنىڭغا بىرەر سېھىر ئىشلەتكەن بولسا كېرەك دەپ ئويلغان ئىدىم . ئەمما كېيىن ئويلىسام بۇ بەك ئاددى بىر ئىش ئىكەن . مەن توختىۋىلىپ ھەممەيلەنگە قارىدىم . ئۇلار ئاغزىمغا قاراپ تۇراتتى . - تېز دىمەمسەن ؟- دېدى ئابدۇقەييۇم بىتاقەت بولۇپ . - سىلەر ئىشىكىنىڭ بەك نېپىز ئىكەنلىكىگە دىققەت قىلدىڭلارمۇ ؟- دېدىم مەن ،- خۇددى شەكىلگە قىلىپ قويغان ئىشىككە ئوخشاش ئىنتايىن نېپىز تاختاي ئىشلىتىلگەن . - ئۇنداق بولسا نېمە بوپتۇ ؟- دېدى ساۋۇت مۇئەللىم ،- ئىشىك ھەرقانچە نېپىز بولسىمۇ بۇزۇلمىغان تۇرسا . دىلنار ھەدە سەل خاتىرجەمسىزلىنىشكە باشلىدى . - سىلەر مىخنى ئۇسسۇل ئوينىتىپ باققانمۇ ؟- دېدىم مەن ، - ئەگەر ئۈستەلنىڭ ئۈستىگە بىرتال مىخنى قويۇپ ئاستىدا ماگنىتنى ھەركەتلەندۈرسەك مىخ ماگنىتقا ئەگىشىپ ئۇسۇل ئوينايدۇ . - ھە، بىلدىم ، - دېدى ئابدۇقەييۇم،- ئۇ ماگنىت ئىشلىتىپتۇ . ھەجەپ ئەقلىمگە كەلمەپتۇ . - بىراق بۇنىڭغا ئىنتايىن چوڭ ماگنىت كېتەر ،- دېدى ساۋۇت مۇئەللىم. - شۇنداق ، يەنە كېلىپ كۈچلۈك ماگنىت كېتىدۇ ،- دېدىم مەن ،- بۇ ئادەتتە بىز فىزىكا دەرسىدە تەجىربىدە ئىشلىتىدىغان تاقىسىمان ماگنىتتىنمۇ كۈچلۈك بولۇشى كېرەك . - ئۇنداق ماگنىتنى تېپىش شۇنداق ئاسانمۇ ؟- دېدى مۇرات ئاكا . - ھازىرقى زاماندا پۇل بولسا نېمىنى تاپقىلى بولمايدۇ ؟- دېدىم مەن ، - يەنە كېلىپ ماگنىت يا خەتەرلىك بۇيۇم بولمىسا . - توغرا دېدىڭىز ،- دېدى دىلنار ھەدە يەنىلا تەمكىنلىك بىلەن ،- سىزنىڭ ئېيىتقىنىڭىزدەك قىلسا ، بۇ ئىشلار قىلىش تامامەن مۇمكىن . بىراق بۇ سىزنىڭ پەرىزىڭىز ، سىزنىڭ ئىسپاتىڭىز يوق . - مەندە ئىسپات بار ،- دېدىم مەن ئۇنىڭغا . - سىز ماگنىتنى تاپقان تەقدىردىمۇ مېنىڭ ئىكەنلىكىنى ئىسپاتلىيالمايسىز ،- دېدى دىلنار ھەدە. - سىز يانفۇنىڭىزنى چىقىرىپ كۆپچىلىككە كۆرسىتىپ باقامسىز ؟- دېدىم مەن . ئۇ يانفۇنىنى چىقىرىپ ئىكرانىنى ئېچىپ توختاپ قالدى . - ئاخىرى بايقاپسىز-دە ،- دېدىم مەن ، - سومكىڭىزدا ماگنىت ساقلىغانلىقتىن ، كۈچلۈك ماگنىت مەيدانى تەسىرىدە ، يانفۇنىڭىزنىڭ ئىكرانىنىڭ رېڭى بىنورمال بولۇپ قالغان . يەنە نېمە گېپىڭىز بار ؟ - مېنىڭ تېلفۇنۇم بۇرۇنلا مۇشۇنداق بولۇپ قالغان ،- دېدى دىلنار ھەدە ئىتتىكلا . - ئەمىسە نېمىشقا ھازىرغىچە رېمنۇت قىلدۇرمىدىڭىز ؟- دېدىم مەن . - ۋاقتىم چىقمىدى ،- دېدى ئۇ ،- ئۇنى رېمنۇت قىلدۇرۇش – قىلدۇرماسلىق ئۆزۈمنىڭ ئەركىنلىكى . - سەن بۇلارنى قانداق بىلدىڭ ؟- دېدى ساۋۇت مۇئەللىم . - مەنمۇ باشتا بىلەلمىگەن ئىدىم ،- دېدىم مەن ،- چۈنكى نادىر دوختۇر ، ئەخمەتجان مۇئەللىم ، نۇربىيە ھەدە ، خۇرشىدە ھەدە، نۇسرەت ھەدە ، مۇرات ئاكا قاتارلىق ئالتە ئادەمنىڭ ئەسقەر ئاكا بىلەن ئاداۋىتى بار ئىدى . گۇماندارلار ھەقىقەتەن كۆپ ئىدى . دەسلەپتە رەنا كېچىدە ئۇخلاۋاتقاندا ھۇجۇمغا ئۇچرىغاندا ، مەن ئۇنى تۈنۈگۈن گۈلمېرەنىڭ شورپىنى قەستەن رەنانىڭ پۇتىغا تۆكۈۋەتكەن ئىشىغا بىرلەشتۈرۈپ ئويلىۋاپتىمەن. لېكىن رەنانىڭ ئىككىنچى قېتىم ھۇجۇمغا ئۇچرىشىدىن كېيىن ،مەن « بۇ قاتىلنىڭ قىلغان ئىشى . رەنا بىرەر ئىشنى سېزىپ قالغانلىقتىن ، ئۇنىڭغا ھۇجۇم قىلغان » دەپ ئويلىدىم . بىرىنچى قېتىملىق ھۇجۇم كېچىدە ، ئاياللار ياتقان ئۆيدە يۈز بەرگەن ، بۇنىڭدىن شۇ مەلۇمكى ، قاتىل ئاياللار ئارىسىدا. بۇنىڭ بىلەن تەكشۈرۈش دائىرىسى كىچىكلىدى . - رەناغا ھۇجۇم قىلغىنىمۇ دىلنار دىمەكچىمۇ سەن ؟- دېدى نۇربىيە ھەدە . - شۇنداق ، بايا مەن ئېيتقاندەك ، رەنا ھەر ئىككى قېتىم ھۇجۇمغا ئۇچرىغاندا ، مەن دىلنار ھەدىدىن قىلچە گۇمانلانمىغان ئىدىم . بىرىنچى قېتىم ، گۈلمىرەدىن گۇمانلاندىم . ئىككىنچى قېتىم گۇمانلىق كىشى ئۈچ ئىدى . ئۇ چاغدا دىلنار ھەدە سەي قورۇۋاتاتتى، شۇڭا ئۇ قازان بېشىدىن ئايرىلالمايتتى . نۇربىيە ھەدە ھاجەتكە كەتكەن . خۇرشىدە ھەدە بىلەن نۇسرەت ھەدە سىرتقا چىقىپ كەتكەن . قالغانلارنىڭ ھەممىسى ئۆيدە ئىدى . شۇڭا شۇ ۋاقتتا گۇۋاھچىسى يوق بۇ ئۈچ ئايال ئەڭ گۇمانلىق ئىدى. مەن بىردەم توختاپ گىلىمنى قىرىپ قويدۇم . - سىز ھەممەيلەندىن گۇمانلىنىپ يۈرۈپسىزدە ،- دېدى خۇرشىدە ھەدە. - شۇنداق ، ھەربىر ئادەمنى نەزەردىن ساقىت قىلماسلىق ، رازۋېتچىكلارنىڭ پىرىنسىپى ، - دېدىم مەن ،- تاكى مەن زۇلپىيەنىڭ بىر ئېغىز گېپىنى ئاڭلىغۇچە دىلنار ھەدىدىن قىلچە گۇمانلانمىغان ئىدىم . - قايسى گېپىمنى ؟- دېدى زۇلپىيە ئويلانغان ھالدا. - بايا بىز چۈشتىكى تاماق توغرىلىق سۆزلەشمىدۇقمۇ ؟- دېدىم مەن ئۇنىڭغا ئەسلىتىپ ، - سىز شۇ چاغدا سەي پىشماستىن بۇرۇن سۇ قۇيۇۋېتىپتۇ دېدىڭىز . - توغرا ، مەن شۇنداق دېگەن،- دېدى زۇلپىيە ،- بىراق بۇ گەپنىڭ بۇ ئىش بىلەن نېمە ئالاقىسى بار ؟ - ئالاقىسى ئىنتايىن چوڭ ،- دېدىم مەن ،- تۈنۈگۈن شۇنداق ئوخشىتىپ تاماق ئېتەلىگەن ئادەم بۈگۈن نېمىشقا سەينى خام قورۇيدۇ ؟ چۈنكى ئۇ سەينىڭ ئۇ قازان بېشىدىن كەتكەن ۋاقىتتا ، سەينىڭ كۆيۈپ كېتىشىدىن ئەنسىرەپ بالدۇر سۇ قۇيۇۋەتكەن . - ھە ، مۇنداقكەندە ،- دېدى رەنا . - شۇنداق ، دىلنار ھەدە دەل شۇ چاغدا بېرىپ ، سىزنى پەسكە ئىتتىرىۋەتكەن ،- دېدىم مەن ،- مەن ئۇنىڭ سىلەرنىڭ ئۇيەردە ئىكەنلىكىڭلارنى قانداق بىلىپ ، ۋاقىتنى قانداق توغرا مۆلچەرلەپ ، دەل ۋاقتىدا يېتىپ بارالىغاندۇ دەپ ئويلىغان ئىدىم . كېيىن بىلدىم ، ئۇ بىر پىسخولوگىيە مۇتەخەسسىسى ، گۈلمېرە ئىككىڭلار ئايرىم كۆرۈشۈشنى دېيشىۋاتقاندا ئۇ سىلەرگە دىققەت قىلغان ۋە سۆزۈڭلارنىڭ مەزمۇنىنى بىلىۋالغان . ئاندىن كۆپچىلىك قايتىپ كەلگەندە ئىككىڭلارنىڭ ئۇلارنىڭ ئارىسىدا يوق ئىكەنلىكىڭلارنى كۆرۈپ ، سىلەرنى چوقۇم پاراڭلىشىۋېتىپتۇ ، دەپ پەرەز قىلغان . ئاندىن نۇربىيە ھەدە ھاجەتكە كەتكەن ۋاقتتىن پايدىلىنىپ ، تۆپىلىككە قاراپ ماڭغان . ئەلۋەتتە ئۇ ھاجەتكە بارمىغان تەقدىردىمۇ ، ئۇ بىرەر بانا بىلەن ئۇنى باشقا يەرگە بۇيرۇۋىتەتتى . ئۇ مۇشۇ تەرەپكە ماڭسام سىلەرنى ئۇچرىتالايمەن دەپ ئويلىغان . يېرىم يولدا قايتىپ كېلىۋاتقان گۈلمېرەنى كۆرۈپ يوشۇرنىۋالغان . سىزنىڭ يالغۇز قالغىنىڭىز ئۇنىڭ تەلىيى ئىدى . شۇنىڭ بىلەن سىزنىڭ كەينىڭىزدىن تۇيدۇرماي كېلىپ ، ياردىن ئىتتىرىۋەتكەن . ئاندىن تېز سۈرئەتتە قازان بېشىغا قايتىپ كېلىپ ، ھىچ ئىش بولمىغاندەك داۋاملىق تاماق ئەتكەن . - سىزنىڭ يەنىلا يېتەرلىك ئىسپاتىڭىز يوق ،- دېدى دىلنار ھەدە . - سىزنىڭ شۇ ۋاقىتتا قازان بېشىدىن ئايرىلمىغىنىڭىزغا كىم گۇۋاھ بولالايدۇ ؟ - دېدىم مەن . ئۇ زۇۋان سۈرمىدى . باشقىلار ئۇنىڭغا قاراپ ھەيرانلىقتا قېتىپ قالغان ئىدى . - مەن ئەسلى بالدۇرراق ھەقىقىي ئەھۋالىنى ئاشكارلاپ ، كۆپچىلىككە سىزدىن ھېزى بولۇشنى ئېيتماقچى ئىدىم . لېكىن يەنىلا بىرقەدەم كېچىكىپ قېلىپ ، نادىر دوختۇرنىڭ ئۆلۈشىگە سەۋەبچى بولۇپ قالدىم ،- دېدىم مەن ئۆكۈنگەن ھالدا . - ئۇنى قانداق ئۆلتۈرۈپتىمەن ؟- دېدى دىلنار ھەدە ،- قېنى بۇنى بىر ئاڭلاپ باقاي . - سىز ئاۋۋال نادىر دوختۇرغا ئېيتىدىغان ئىنتايىن مۇھىم گېپىڭىز بارلىقىنى ، ئۇنىڭ سىزنى ئەسقەر ئاكا ياتقان ئۆينىڭ كەينىدە ساقلاپ تۇرۇشىنى ، باشقىلارنىڭ كۆرۈپ قالماسلىقىنى ئېيتتىڭىز . شۇنىڭ بىلەن ھەممە چوڭلار سىرتقا چىقىپ ، كەتكەندە ئۇنىڭغا بەلگە بەردىڭىز ۋە چىقىپ كەتتىڭىز. نادىر دوختۇر ھەممەيلەن چىقىپ كەتكۈچە كۈتۈپ تۇرۇپ ، ئاندىن ئەسقەر ئاكىنىڭ ئۆيىنىڭ ئارقىغا بارغان . ئۇ ئۇيەردە سىزنى بەش - ئالتە مىنۇت ساقلىغان. چۈنكى ئۇ تۇرغان يەردە ئىككى قېتىم تاماكا كۈلى چۈشكەن. چوڭلار بىردەم ماڭغاندىن كېيىن ، ھەممىسى ئۆزى خالىغان تەرەپكە كېتىشكەن، سىز بۇ ۋاقتتا ، قايتىپ كېلىپ ، ئەسقەر ئاكا ياتقان ئۆينىڭ كەينىگە باردىڭىز . ئۇ يەردە ئەسقەر ئاكىنى ھوشسىزلاندۇرغان ئۇسۇلدا ، ئېتىل ئېفىر بىلەن دوختۇرنى ھوشسىزلاندۇردىڭىز .مەن ئۇنىڭ ئاغزىدىن تېخى ھاۋا تولۇق تارقاپ كېتەلمىگەن ئېتىل ئېفىرنىڭ پۇرىقىنى سەزدىم . ئاندىن ئۇنىڭ پۇتىدىن تۇتۇپ سۆرەپ ئاپىرىپ يارلىققا تاشلىۋەتتىڭىز . نادىر دوختۇرنىڭ دۈمبىسى بىلەن بېشى سىز سۆرىگەن ۋاقىتتا توپىغا مىلىنىپ كەتكەن . - ناھايىتى ياخشى تەسەۋۋۇر بولدى ، - دېدى دىلنارھەدە كۈلۈپ تۇرۇپ ،- سورايدىغىنىم يەنە شۇ ، ئىسپاتىڭىز بارمۇ ؟ تولۇق ئىسپات تېپىلغۇچە بۇ دېگەنلىرىڭىزنىڭ ھەممىسى پەرەز خالاس . - ھەقىچان سىز ئېتىل ئېفىر بىلەن قولياغلىقنى ئاللىقاچان بىرتەرەپ قىلىۋەتتىڭىز . لېكىن مەندە يەنە بىر ئىسپات بار ، سىز ئالدىراشچىلىقتا تېخى دىققەت قىلماپسىز دە، - دېدىم مەن ،- چاپىنىڭىزنىڭ ئەڭ ئاستىدىكى تۈگمىسى قېنى ؟ ئۇ ئىتتىك چاپىنىغا قارىدى ، ئاستىدىكى تۈگمە چۈشۈپ قالغان ئىدى . - بۇ ئەتتىگەنلا چۈشۈپ قاپتىكەن ،- دېدى ئۇ ،- نېمە بولدى ؟ تۈگمە چۈشۈپ قالسىمۇ بولمامدۇ ؟ مەن قولياغلىقىمنى ئېلىپ ، ئىچىپ كۆرسەتتىم . ئىچىدە بايا مەن تېپىۋالغان تۈگمە بار ئىدى . - بۇنى مەن نادىر دوختۇر چۈشۈپ كەتكەن يارنىڭ ئاستىدىن تېپىۋالدىم . سىزنىڭ تۈگمىڭىز ئىكەن. بۇنى نادىر دوختۇر ھوشىدىن كېتىشتىن بۇرۇن ئۈزۈۋالغان . - مېنىڭ بولۇشى ناتايىن ، جاھاندا ئوخشاش تۈگمىلەر جىققۇ ؟ ئۇ يارلىقنىڭ ئاستى بۇرۇن بۇ يەردە ئادەم بار چاغدىن تارتىپلا ئەخلەت تۆكۈدىغان جاي . بىرەر تۈگمە تېپىلىپ قېلىشى ھىچقانداق ئەجەپلىنەرلىك ئەمەس ،- دېدى دىلنار ھەدە . - سىز بۇ تۈگمىگە ئوبدانراق قاراڭ ،- دېدىم مەن ،- كۆيۈپ سارغايغان ئىزى بارمىكەن ؟ ئېسىمدە قېلىشىچە ، تۈنۈگۈن سىزنىڭ چاپىنىڭىزنىڭ تۈگمىسى تاماكا قالدۇقىدا كۆيۈپ سارغىيىپ قالغان ئىدى . - شۇنداقمۇ ؟ ئەمىسە راست مېنىڭ تۈگمەم ئىكەن - دېدى دىلنار ھەدە تەمتىرىمەستىن ،- ئەتتىگەن ئۆينى سۈپۈرگەندە ئەخلەت بىلەن بىللە تۆكۈلۈپ كەتكەن ئوخشايدۇ . ئۇ ئاسانلىقچە ئىقرار بولىدىغاندەك قىلمايتتى . تەمكىنلىكى بولسا ئادەمنىڭ جېنىغا تېگەتتى . - سىزگە ئېنىق ئىسپاتنى كۆرسەتمىگۈچە بولدى قىلمايدىغان ئوخشايسىز ھە ؟- دېدىم مەن كۈلۈپ ، - سىز بايا تۈگمە ئەتتىگەن چۈشۈپ قالغان دېدىڭىزمۇ ؟ - شۇنداق ،- دېدى ئۇ ،- ئۇنداق بولسا نېمە بوپتۇ ؟ - جۈرئەت سىن ئاپپاراتىنى ئەكىلە ،- دېدىم مەن جۈرئەتكە . ئۇ ئاپپاراتنى ئەكىلىپ بەردى . مەن ئۇنى مەن غېنىنى ئىزدەپ ماڭغان چاغدىكى ۋاقىتقا ياندۇردۇم . ئاندىن ئۇنىڭغا كۆرسىتىپ تۇرۇپ قويۇپ بەردىم . ئايۋاندا ھەممە چوڭلار ئولتۇرغان كۆرۈنۈش چىقتى . كۆرۈنۈش دىلنار ھەدىگە كەلگەندە مەن توختىتىپ ، چوڭايتىپ كۆرسەتتىم . - بۇنىڭغا ئوبدانراق قاراڭ ،- دېدىم مەن ، - ئەتتىگەن چۈشۈپ قالغان تۈگمە بۇۋاقىتتا يەنە تۇرىدىغۇ ؟ سىن ئاپپاراتىدا ئۇنىڭ ئەڭ ئاستىدىكى تۈگمىسىنىڭ بارلىقى ئېنىق كۆرۈنۈپ تۇراتتى . - ئەمدىغۇ ئىقرار بولارسىز ؟ -دېدىم مەن ئاپپاراتنى جۈرئەتكە قايتۇرۇپ بېرىپ . ئۇ بېشىنى تۆۋەن سېلىپ جىمىپ كەتتى . - راسىتلا سىزما ؟- دېدى نۇربىيە يىغلاپ تۇرۇپ ، - سىز نېمىشقا ئۇلارنى ئۆلتۈرىسىز ؟ - مېنىڭچە بۇنىڭ سەۋەبى تۈنۈگۈن ماشىنىدىن چۈشكەندە ئۇنىڭ سومكىسىدىن چۈشۈپ قالغان سۈرەتتە بولۇشى مۇمكىن ،- دېدىم مەن ،- مەن ئۇ سۈرەتنى چالا – پۇلا كۆرۈپ قالغان . سۈرەتتە ئۇنىڭ بىلەن بىر كىچىك بالا بار ئىكەن . مېنىڭچە ئۇ بالا ئۇنىڭ ئىنىسى . غېنىنىڭ ماڭا ئېيتىپ بەرگىنىگە ئاساسلانغاندا ، ئەسقەر ئاكا بۇرۇن ماشىنا ھەيدەۋېتىپ ، دىققەتسىزلىكتىن ئۇنىڭ ئېنىسىنى سوقۇۋەتكەن ، دوختۇرخانىغا ئاپارغان بولىسمۇ ، قۇتقۇزۇش ئۈنۈم بەرمەي ئۆلۈپ كەتكەن . - ئەمىسە ئۇ نېمىشقا رەناغىمۇ قەست قىلىدۇ ؟- دېدى زۇلپىيە . - رەسىم چۈشۈپ قالغاندا رەنا ئۇنىڭغا يېقىن يەردە ئىدى . شۇڭا ئۇ رەنانى سومكىدىكى ماگنىتنى كۆرۈپ قالدى دەپ قالغان . گەرچە رەنا ئۇنىڭغا قىلچە دىققەت قىلمىغان بولسىمۇ ، ساقچىلار سوراق قىلغاندا رەنانىڭ ئېسىگە كېلىپ قېلىپ ئېيتىپ قويۇشىدىن ئەنسىرىگەن . ئۇنىڭ رەناغا قايتا - قايتا ھۇجۇم قىلىشىدىكى سەۋەبمۇ شۇ . - سىز راستلا بەك يامانكەنسىز ئۇكام ، - دېدى دىلنار ھەدە ، - ماشىنىدا كەلگۈچە ، سىزدىن ئەنسىرىگەن ئىدىم ، ئويلىغىنىمدەك بولدى . ئىشلار سىز ئېيتقاندەك ، قىلچە خاتاسى يوق . ئۇ ئىككى ئەبلەخ مېنىڭ ئېنىمنىڭ جېنىغا زامىن بولدى . - بىزگە بۇ ئىشلارنى سۆزلەپ بىرەمسىز ؟- دېدىم مەن . - ھامىنى سىلەر ھەممىنى بىلىپ بولدۇڭلار ،- دېدى ئۇ ،- سىلەرگە ئۇ ئىككىسىنىڭ قىلغان – ئەتكەنلىرىنى سۆزلەپ بېرەي . شۇ چاغدا سىلەرمۇ ئۇلارنىڭ ئۆلۈمگە لايىق ئىكەنلىكىنى بىلىپ قالىسىلەر . - قۇلىقىمىز سىزدە . ھەممىمىزنىڭ دىققىتى ئۇنىڭغا بۇرالدى .ئۇ دېرىزە ئالدىغا بېرىپ ، كۆزلىرىنى يىراققا تىكتى . ئۇ سۆزلەشتىن ئىلگىرى ، بۇرۇنقى ئىشلارنى ئوبدانراق ئېسىگە ئېلىۋالماقچى بولغاندەك قىلاتتى . ئۇ سومكىسىدىن رەسىمنى ئېلىپ ئۇزاق قارىدى ، قولى بىلەن رەسىمنى سىيلىدى ، ئاندىن گەپ باشلىدى : - ئىنىمنىڭ ئىسمى مۇختەر ، كۆزلىرى چاقناپ تۇرىدىغان ، ئەقىللىق ، ھۇشيار بالا ئىدى . ئۇ باشلانغۇچ مەكتەپتىن باشلاپ ، ئۆزىنىڭ شېئىر يېزىش تالانتىنى نامايەن قىلىشقا باشلىغان ئىدى . ئۇ تولۇقسىز ئوتتۇرا مەكتەپكە چىققاندا ، ئۇنىڭ شېئىرلىرى ژۇرناللاردا بېسىلدى . پۈتۈن ئۆيىمىزدىكىلەر ئۇنىڭدىن شۇنداق پەخىرلىنەتتۇق . ئۇنىڭغا ئىنتايىن ئامراق ئىدۇق . ئۇ ئۆزىمۇ شۇنداق رايىش بالا ئىدى . كىم كۆرسە مەستلىكى كېلەتتى . دەل شۇنداق بولغانلىقىدىن ئۇنىڭغا كۆز تەگدى ،- دىلنار ھەدە بىردەم توختىۋالدى ، - بۇنىڭدىن بەش يىل بۇرۇن ، ئۇ تولۇقسىز ئوتتۇرىنىڭ 2- يىللىقىغا چىققان ۋاقىتتا ، مەن ئىچكىرىگە ئاسپىرانتلىققا ئوقۇشقا كەتتىم . ئۇزۇن ئۆتمەيلا ئۇنىڭ ئۆلۈم خەۋىرىنى ئاڭلىدىم ، ئۇ قاتناش ھادىسسىگە ئۇچراپتۇ . مېڭەمدىن تۈتۈن چىقىپ كەتتى . دەرھال رۇخسەت سوراپ قايتىپ كەلدىم ، يولدا كەلگۈچە كۆزۈمدىن ياش قۇرۇمىدى . تېزراق قايتىپ ، ئۇنىڭ يۈزىنى بولسىمۇ ئاخىرقى قېتىم كۆرۈۋېلىشنى ئويلايتتىم . شۇنداقتىمۇ ئۇنىڭ يۈزىنى كۆرەلمىدىم . ئۇنى ئەسقەرنىڭ ماشىنىسى سوقۇۋېتىپتۇ . ئەينى ۋاقىتتا مەنمۇ باشقا ھېچقانداق ئويدا بولمىغان ئىدىم . « بۇ بىر ھادىسە ، ھەركىم ئۆز پىشانىسىگە پۈتۈلگەننى كۆرىدۇ » دەپ ئويلىغان ئىدىم . شۇنىڭ بىلەن مەن ئوقۇشۇمنى داۋاملاشتۇردۇم . ئاسپىرانتلىقنى تۈگىتىپ ، چەتئەلگە ئوقۇشقا چىقتىم . بۇ جەرياندا ئۇنى ھەرۋاقىت ئېسىمدىن چىقارمىدىم . كېيىن قايتىپ كېلىپ ، شەھەرلىك پىسخولوگىيدىن مەسلىھەت بېرىش ئورنىدا ئىشلىدىم . كۈتۈلمىگەندە ، ئەسقەر ئىنىسىنى داۋالىتىش ئۈچۈن مەسلىھەت سوراپ كېلىپ قالدى . مەن ئۇنى بىر كۆرۈپلا تونۇدۇم .« ئىنىمنىڭ جېنىغا زامىن بولغان دەل مۇشۇ ئادەم . » دەپ ، ئىچىمدە ئۇنىڭغا ئۆچمەنلىك قوزغالدى. شۇنداقتىمۇ ئۇنىڭغا بىلىندۈرمىدىم . ئۇ مېنى تونۇمىدى . بەش يىل بۇرۇنقى ئۇ ئىش ئۇنىڭ ئېسىدىن تامامەن چىقىپ كەتكەندەك ئىدى . مەن ئىنىمنىڭ ئۆلۈمىنىڭ شۇ قەدەر قەدىرسىز بولۇپ قالغانلىقىدىن ئىنتايىن ئىچىناتتىم . مەن غېنىنى ھەرجەھەتتىن تەكشۈرۈپ كۆردۈم . ئۇنىڭ ئىلگىرى روھىي – ھالىتى نورمال بولۇپ ، بۇنداق بولۇپ قالغىنىغا بەش يىلچە بوپتۇ . مەن ئۇنىڭغا بىر ئىش قاتتىق تەسىر قىلىپ شۇنداق بولۇپ قالغانلىقىنى پەملىدىم . مەن چەتئەلدە بىمارنى يېرىم ئۇيقۇ ھالەتتە داۋالاشنى ئۆگەنگەن ئىدىم . بۇنداق ئۇسۇلدا ئۇنىڭدىن گەپ سورىغاندا ، ئۇ ھەممىنى ئېيتىپ بېرەتتى . شۇنىڭ بىلەن ، ئۇنىڭ كېسەللىك سەۋەبىنى بىلگىلى بولاتتى . بىر كۈنى مەن بارلىق تەييارلىقىنى پۈتكۈزۈپ ، ئۇنى يېرىم ئۇيقۇ ھالىتىدە داۋالىدىم . ئۇنىڭدىن نۇرغۇن سوئال سورىدىم . ئۇنىڭ جاۋابلىرىدىن بەش يىل ئىلگىرىكى ھادىسىنىڭ ھەقىقىي ئەھۋالىنى بىلدىم ،- دىلنار ھەدىنىڭ كۆزلىرى غەزەپكە تولدى ، كۆزلىرىدىن بولسا ياش ئېقىۋاتاتتى ،- ئەينى ۋاقىتتا ماشنا ھادىسىسى بولغاندا ، غېنىمۇ ماشىنىدا ئىكەن ، ئىنىمنى دوختۇرخانىغا ئاپارغاندىمۇ بىللە ئىكەن ، ئۇ ئەسقەر بىلەن نادىرنىڭ پاراڭلىرىنى ئوغۇرلۇقچە ئاڭلاپ قاپتۇ . ئىنىم ئەسلى ھايات قالىدىكەن ، ئۇنى قۇتقۇزغىلى بولىدىكەن . ئەمما ، ئەسقەر ئۇنى بىر ئۆمۈر بېقىش مەسئۇلىيتىدىن قورقۇپ ، ئوپراتسىيگە كىرىدىغان نادىرنى سېتىۋالغان . ئوپراتسىيە نادىرنىڭ قەستەن خاتالىق ئۆتكۈزۈشى بىلەن مۇۋاپىققىيەتسىز بولغان . ئۇلار پۇل ، مەنپەئەت ئۈچۈن ئىنىمنىڭ ياش جېنىغا زامىن بولدى . ئۇلارنى ھەرگىز كەچۈرگىلى بولمايدۇ . بىز جىمىپ كەتتۇق . ئادەملەر نېمە بولۇپ كەتكەن ھە ؟ ھەممەيلەننىڭ كاللىسدا گويا شۇ سوئال ئەكس ئېتىۋاتقاندەك ، ئويغا چۆمگەن ئىدى . مەن خىيالدىن ئويغانغاندا ، تۇيۇقسىز دىلنار ھەدىنىڭ قولىدا بىر پىچاقنىڭ پەيدا بولۇپ قالغانلىقنى سەزدىم . - سىز نېمە قىلماقچى ؟ پىچاقنى تاشلاڭ ! - دېدى مۇرات ئاكا . - مەن ئىككى ئادەمنى ئۆلتۈردۈم ، بەرىبىر تېرىك قالمايمەن ،- دېدى دىلنار ھەدە پىچاقنى گېلىغا تەڭلاپ ،- ئىنىمنىڭ قىساسىنىمۇ ئالدىم ،ئىككى زىيانداشنى يوقاتقانلىقىم ئۈچۈن ھەرگىز ئۆكۈنمەيمەن . - توختاڭ ... ئۇنداق قىلماڭ ! - پىچاقنى تاشلاڭ ! ھەممەيلەن جىددىيلىشىپ توۋلىشىپ كەتتى . - تولا ھەققانىيەتنى قوغدىغۇچى قىياپىتىگە كىرىۋالماڭ ! - دېدىم مەن ۋارقىراپ ،- ئەگەر سىز راستلا ھەققانىيەتنى قوغدىماقچى بولسىڭىز ، نېمىشقا ئوچۇق – ئاشكارا ئىش قىلمايسىز ؟ سىز ئاشكارلىنىپ قىلىشتىن قورقۇپ ، مۇشۇنداق چەت يەرگە كېلىپ قاتىللىق قىلىشنى پىلانلىدىڭىز ، ھەم ئاشكارلىنىپ قىلىشتىن قورقۇپ ، ھىچقانداق گۇناھى بولمىغان رەنانى ئىككى قېتىم قەستلىدىڭىز . ئەمەلىيەتتە ، سىزنىڭمۇ ئۇ ئىككەيلەندىن ھىچقانداق پەرقىڭىز قالمىدى ! بۇ گەپنى ئاڭلاپ ئۇ لاسسىدە بولۇپ ، ئولتۇرۇپ قالدى ، قولىدىن پىچاقمۇ چۈشۈپ كەتتى . - كەچۈرۈڭ ! - دېدى ئۇ رەناغا قاراپ يىغلاپ تۇرۇپ . خاتىمە ئەتىسى سائەت ئونلاردا ساقچىلارنىڭ ماشىنىسى يېتىپ كەلدى . شوپۇر ئۇستام كېچىلەپ توختىماي يول مېڭىپ ، يېرىم كېچىدە مەھەللىگە بېرىپتۇ . ئاراممۇ ئالماستىن ساقچىغا مەلۇم قىپتۇ . ساقچىلار دەرھال يولغا چىقىپ ، ئۇنىڭ يول باشلىشى بىلەن ، كانغا كەپتۇ . بىز ساقچىلارغا دىلنار ھەدە بىلەن ماددى ئىسپاتلارنى تاپشۇرۇپ بەردۇق . بۇنىڭ ئارىسىدا دىلنار ھەدىنىڭ ئىقرارى ئېلىنغان سىن ئاپپاراتىمۇ بار ئىدى . ساقچىلار تەكشۈرۈشنى تۈگەتكەندىن كېيىن ، بىزمۇ ساقچىلار بىلەن بىرگە تاغدىن قايتىپ كەلدۇق . رەنا دەرھال دوختۇرخانىغا ئاپىرىلدى . ئۇنى ياتاققا ئالدى . ئەمما ئۇنىڭ سول قولى سۇنغاندىن باشقا چوڭ چاتاق يوق ئىدى . - رەنا يوق ئىچىڭ پۇشۇپ قالىدىغان بولدى –دە ،- دېدى ئابدۇقەييۇم مەن مەكتەپكە كەلگەن ۋاقىتتا . - بولدى چېقىشمىغىن ، - دېدى مەن،- ئۇنىڭ ئىنتىھانىغا دەخلى يېتىپ قالمىسىلا بولاتتى . - ئاڭلىسام، دىلنار ھەدە سوتلىنىش ئالدىدا ئىكەن، ئەخمەتجان مۇئەللىممۇ ئۆزىنى مەلۇم قىپتۇ. قارىغاندا بۇ دېلو مۇشۇنداق ئاياغلاشقان ئوخشايدۇ،- دېدى ئابدۇقەييۇم ،- بۇ دېلونى قالتىس پاش قىلىۋەتتىڭ – دە ، ساڭا بالىلارلا ئەمەس ، ساۋۇت مۇئەللىممۇ قايىل بولدى . - ئەمەلىيەتتە ، مەن يەنىلا كۆپ خامكەنمەن ،- دېدىم مەن ،- كېيىنكى قاتىللىقنى بولسىمۇ توسۇپ قالالىغان بولسام ياخشى بولغان بولاتتى . - ئۇنداق بولسا نېمە بوپتۇ ؟ - دېدى ئابدۇقەييۇم ،- ئۇ ئۆلۈمگە لايىق ئىكەن ئەمەسمۇ؟ - بۇ دېگىنىڭ توغرا بولمىدى ،- دېدىم مەن ئۇنىڭغا رەددىيە بېرىپ ،- بىرسىنىڭ ئۆلۈشكە تېگىشلىك ياكى تېگىشلىك ئەمەسلىكىنى بىز بەلگىلىيەلمەيمىز . ھاياتلىقنىڭ قانچىلىك قىممەتلىك ئىكەنلىكىنى بىلەمسەن ؟ بىر ئادەمنىڭ تۇغۇلۇپ چوڭ بولۇپ قاتارغا قوشۇلۇشى ئاسان ئىشمۇ ؟ شۇڭا يىنىكلىك بىلەن بىر جانغا زامىن بولماسلىق كېرەك . - توغرا ئېيتتىڭ ،- دېدى ئابدۇقەييۇم . غېنى قېشىمىزغا كەلدى ، ئۇ ئىشلاردىن كېيىن خېلى ياخشى بولۇپ قالغان ئىدى . - كېلەر يىلى مەنمۇ ئالىي مەكتەپكە ئىنتىھان بېرىمەن ،- دېدى ئۇ ماڭا قاراپ،- سىلەر بارغان مەكتەپكە بارسام دەيمەن . - ياخشى بوپتۇغۇ ،- دېيىشتۇق بىز بىر ئېغىزدىن ،- تېرىشىقىن ئەمىسە . - سەن ھازىر قايسى مەكتەپكە كىردىڭ ؟- دېدى ئابدۇقەييۇم ئۇنىڭغا قاراپ . ئۇ جاۋاپ بەرمەي كېتىپ قالدى. - ئۇنىڭ كېسىلى تېخى تازا ساقىيىپ كېتەلمەپتۇ ،- دېدى ئابدۇقەييۇم ئۇنىڭ كەينىدىن قاراپ . - راست دەيسەن ،- دېدىم مەن ،- ئاشۇ ئىشلاردىن كېيىن ، بىز ساقلارنىڭ نېرۋىسىمۇ ئانچە نورمال ئەمەس بولۇپ قالدى . - شۇنداق ،- دېدى ئابدۇقەييۇم كۈلۈپ ،- ئۇنداق ئىشلارغا ئادەمنىڭ نېرۋىسى راستلا چىدىمايدىكەن . ئۇنداق ئىشلارغا كۆپرەك ئۇچراپ قالسام ، ساراڭ بولغۇدەكمەن . - ئۇنداق ئىشلار ئەڭ ياخشىسى ئەمدى يۈز بەرمىسۇن ،- دېدىم مەن . بىز سىنىپقا كىرىپ كەتتۇق . 2009-يىلى 1 – ئاي ، قەشقەر . تامام.

zapar80

	ئاخىرى تۇگىدى

zapar80

	ئەجرىڭىزگە كۆپ رەخمەت  .   داۋاملىق مۇشۇنداق ياخشى تىمىلىرىڭىزنى كۆرۇشكە تەقەززامەن.

abduwali0997

ansar1013

	ھەنىم بولسا يەنە ئاخىرى بار دىمەي تۈگىتىۋەتتىڭىز رەھمەت سىزگە ئاخىرى ياخشى ئاخىرلىشىپتۇ.

سەۋېر

	ئەجەپ يېزىپ قويىدىكەن....

zulayha

	بۇنىڭ بىر توقۇلما بولۇشىنى ئۈمۈت قىلىپ قالدىم . پاھ، كەلگۈسىدىكى ئۇيغۇر ۋولمىستىن بىرىنى تېزراق چوڭ بولسىكەن دىدىم ھەم . تېما ئىگىسىنىڭ تىرىشچانلىقى بىلەن بۇ تېما ئوقۇرمەنلىرىنى ساقلىتىپ قويماي تاماملاندى . تەشەككۈرلىرىم بولسۇن سىزگە.