30-مارت ئۈرۈمچى شەھىرىدە بىر كۈن ھاۋا بۇلۇتلۇق بولۇپ، كەچتە يامغۇر يېغىشقا باشلىدى.
ئۈرۈمچى شەھەرلىك مېتېئورولوگىيە ئىستانىسىسىنىڭ مەلۇماتىغا ئاساسلانغاندا، 31-مارت ئۈرۈمچى شەھەر رايونىدا ئوتتۇراھال ۋە قاتتىق يامغۇر يېغىپ، ئاندىن ئوتتۇراھال ۋە قاتتىق قارغا ئۆزگىرىدىكەن، ئەڭ يۇقىرى تېمپېراتۇرا 4 سېلتسىيە گىرادۇس، ئەڭ تۆۋەن تېمپېراتۇرا نۆلدىن تۆۋەن 5 سېلتسىيە گىرادۇس بولىدىكەن. كەلگۈسى ئۈچ كۈن ئىچىدە ئۈرۈمچى شەھىرىنىڭ كۆپ قىسىم جايلىرىدا قار-يامغۇرلۇق ھاۋارايى سەۋەبلىك تېمپېراتۇرا كۆرۈنەرلىك تۆۋەنلەيدىكەن. شەھەر رايونى، مىچۈەن-كۆكتاغ رايونىدا ئوتتۇراھال ۋە قاتتىق يامغۇر يېغىپ، كېيىن قارغا ئۆزگىرىدىكەن، جەنۇبىي شەھەر ئەتراپى ۋە يۇقىرىقى تاغنىڭ تاغلىق رايونلىرىدا قاتتىق قار ياغىدىكەن، يۇقىرىدا ئېيتىلغان رايونلاردا 4 بال غەربىي شىمال ئۆتكۈنچى شامىلى چىقىدىكەن، بۇ ھەپتىدىكى ئەڭ تۆۋەن تېمپېراتۇرىمۇ نۆلدىن تۆۋەن 7 سېلتسىيە گىرادۇس ئەتراپىغىچە تۆۋەنلەيدىكەن.
سوغۇق ھاۋا ئېقىمىنىڭ ئۇدا تەسىرى سەۋەبىدىن، 30-مارت سائەت 17:30 ئۆتكەندە ئۈرۈمچى شەھەرلىك مېتېئورولوگىيە ئىستانىسىسى سوغۇق ئېقىم كۆڭ رەڭلىك سىگنالى، ئۈششۈك سېرىق رەڭلىك سىگنالى، يوللارنى مۇز تۇتۇش سېرىق رەڭلىك سىگنالى چىقارغان.
ئۇنىڭدىن سىرت، ئاپتونوم رايونلۇق مېتېئورولوگىيە ئىستانىسىسىنىڭ مەلۇماتىغا ئاساسلانغاندا، 31-مارت كۈندۈزدىن 2-ئاپىرىلغىچە شىمالىي شىنجاڭنىڭ كۆپ قىسىم جايلىرى، تەڭرىتېغىنىڭ تاغلىق رايونلىرى، قومۇلنىڭ شىمالىي قىسمىدا ئازراق ۋە ئوتتۇراھال يامغۇر ياغىدىكەن ياكى يامغۇر قارغا ئۆزگىرىدىكەن، ئىلى دەريا ۋادىسى، تارباغاتاي، شىخودىن فۇكاڭغىچە بولغان شىمالىي شىنجاڭدىكى تەڭرىتېغىنى بويلىغان جايلار، تەڭرىتېغىنىڭ تاغلىق رايونلىرى قاتارلىق قىسمەن جايلاردا قاتتىق يامغۇر ئارىلاش قار ياكى قار ياغىدىكەن.