ئالداپ كېتىلگىنىگە 12 يىل بولغان قىز يەنيەن 3-فېۋرال چۈشتىن بۇرۇن شىئەن شەھەرلىك جامائەت خەۋپسىزلىكى ئىدارىسى ليەنخۇ تارماق ئىدارىسى جىنايى ئىشلار رازۋېدكا ئەترىتىدە ئاتا-ئانىسى بىلەن يۈز كۆرۈشتى. بۇنىڭدىن ئىلگىرى ئۆزىنىڭ كېلىپ چىقىش ئەھۋالىنى بىلمەيدىغان يەنيەن ئۆز ئاتا-ئانىسىنى تاپقاندىن كېيىن ئىنتايىن خۇشال بولدى. يەنيەن ئۆز ئاتا-ئانىسى بىلەن بىرگە ياشاشنى خالايدىغانلىقىنى، لېكىن باققان ئاتا-ئانىسىنىمۇ داۋاملىق يوقلاپ تۇرىدىغانلىقىنى بىلدۈردى.

جامائەت خەۋپسىزلىكى ليەنخۇ تارماق ئىدارىسى ساقچىلىرى باشقا بىر ئالداپ سېتىش دېلوسىنى تەكشۈرۈش جەريانىدا 6 نەپەر جىنايەت گۇماندارىنى تۇتقان. سوراق قىلىش جەريانىدا جىنايەت گۇماندارى ۋاڭ xx قىزىنىڭ ئۆز قىزى ئەمەسلىكىنى، بەلكى ئالداپ كېلىنگەنلىكىنى ئېيتقان.

ۋاڭ xx نىڭ ساقچىلارغا ئېيتىپ بېرىشىچە، 2004-يىل ئاخىرىدا ئۇ شىئەن شەھىرى بېيلىن رايونى بېيشاپو كەنتىدىكى بىر كۆكتات بازىرىنىڭ ھاجەتخانىسى ئالدىدا يەنيەننىڭ يالغۇز ئويناۋاتقانلىقىنى كۆرۈپ، ئۇنى ئالداپ كەتكەن. كېيىن ۋاڭ xx يەنيەننى ئېلىپ يەنچاڭ ناھىيەسىدىكى ئۆيىگە ئېلىپ كېتىپ، ئالدىنقى يولدىشى بىلەن بىرگە تۇرمۇش كەچۈرگەن.

2005-يىل ئىيۇلدا ۋاڭ xx خۇڭمياۋپودىن يەنە بىر قىزنى ئالداپ كېلىپ، ئۇنىڭغا شياۋشى (ئەسلى ئىسمى چېڭ xx) دەپ ئىسىم قويغان. ۋاڭ xx ئالدىنقى يولدىشى بىلەن ھېسسىيات جەھەتتە كېلىشەلمەي، يەنيەننى ئېلىپ خۇاڭلىن ناھىيەسى ديەنتۇ بازىرىغا كېتىپ تۇرمۇش كەچۈرگەن. 2008-يىل 20-ئىيۇلدا ۋاڭ xx چېڭ xx نى شىڭ xx، مېڭ xx ئەر-ئايالغا سېتىۋەتكەن. 2015-يىل 22-يانۋاردا ۋاڭ xx ساقچىلار تەرىپىدىن تۇتۇلغان، چېڭ xx ساقچىلار تەرىپىدىن قۇتقۇزۇۋېلىنغان.

ۋاڭ xx تۇتۇلغاندا يەنيەن لوچۇەن ناھىيەسىدىكى بىر ساتراچخانىدا ئىشلەمچىلىك قىلىۋاتقان ئىكەن، مەخسۇس دېلو گۇرۇپپىسىدىكىلەر ئۇنى شىئەنگە قايتۇرۇپ كەلگەن. قان تەكشۈرۈش، DNA تەكشۈرۈش قاتارلىق جەريانلاردىن كېيىن يەنيەن ئائىلىسىدىكىلەر بىلەن ئاخىرى جەم بولغان.