ئاۋىستىرالىيە ‹كۈنىدىلىك تېلىگرامما گېزىتى› نىڭ 15-دېكابىردىكى خەۋىرىگە قارىغاندا، سېدنىي شەھىرىدىكى قەھۋەخانىدا ئادەم تۇتقۇن قىلىش ۋەقەسى يۈز بېرىپ سەككىز سائەت ئۆتكەندىن كېيىن، قەھۋەخانىدىكى تۇتقۇنلاردىن بەشەيلەن ئاللىقاچان قېچىپ چىققان، بىر نەپەر قوراللىق يەنە قەھۋەخانىدا نۇرغۇن تۇتقۇنلارنى كونتىرول قىلماقتا. ئۇنىڭدىن باشقا ‹بۈگۈنكى سېدنىي› ئاخبارات تورىنىڭ خەۋىرىگە قارىغاندا، تېخى ھازىرلا بىر نەپەر جۇڭگولۇقلار پۇشتىدىن بولغان سىتۇدېنت قىز قەھۋەخانىدىن قېچىپ چىققان.

ئىگەللىنىلىشىچە، شۇ يەر ۋاقتى 12-ئاينىڭ 15-كۈنى ئەتىگەن سائەت 9 دىن 45 مىنۇتلار ئۆتكەندە، سېدنىي شەھىرىدىكى Lindt cafe ناملىق بىر قەھۋەخانىدا تۇتقۇن قىلىش ۋەقەسى يۈز بەرگەن بولۇپ، تۇتقۇن قىلغۇچىلار بىلەن ساقچىلار ئالتە سائەتتەك تىركەشكەندىن كېيىن، ئاۋىستىرالىيە ساقچى تەرەپ ئاخبارات ئېلان قىلىش يىغىنى ئېچىپ، ساقچى تەرەپنىڭ ئاللىقاچان تۇتقۇن قىلىۋالغۇچىلار بىلەن ئۇچراشقانلىقىنى، قەھۋەخانىدىكى ئۈچ نەپەر تۇتقۇننىڭ ئاللىقاچان قويۇپ بېرىلگەنلىكىنى ئېيتقان. ئىگەللىنىلىشىچە، بۇ قېتىم قويۇپ بېرىلگەن ئۈچ نەپەر تۇتقۇن ئىچىدە 60 نەچچە ياشلاردىكى ئەر خېرىدار، يەنە بىر نەپەر ياشراق كەلگەن ئەر خېرىدار شۇنداقلا يەنە بىر نەپەر قەھۋەخانا خادىمى بار ئىكەن.

شۇ يەر ۋاقتى چۈشتىن كېيىن سائەت 5 تىن بۇرۇن، يەنە ئىككى نەپەر ئايال تۇتقۇن قەھۋەخانىدىن قېچىپ چىققان بولۇپ، نەق مەيداندا ساقلاپ تۇرغان ئاخبارات ۋاستىلىرىنىڭ خەۋەر قىلىشىچە، قەھۋەخانىدىن قېچىپ چىققان بىر ئايال نەق مەيداندا بۇيرۇق كۈتۈپ تۇرغان ساقچىلارنىڭ قۇچىقىغا يېقىلىپ چۈشكەن ھەم قورققىنىدىن يىغلاپ كەتكەن. ‹ بۈگۈنكى سېدنىي › ئاخبارات تورىنىڭ خەۋىرىگە قارىغاندا، قېچىپ چىققان بۇ ئىككى ئايالنىڭ ئىككىلىسى مەزكۇر قەھۋەخانىنىڭ خادىمى بولۇپ، ئۇلارنىڭ ئۇچىسىدا قەھۋەخانىنىڭ پەرتۇقى تارتىقلىق ئىكەن. ھازىرغا قەدەر بۇ قەھۋەخانىدىن جەمئىي بەش نەپەر تۇتقۇن قېچىپ چىقتى.

لېكىن ئاۋىستىرالىيە ‹كۈنىدىلىك تېلىگرامما گېزىتى› نىڭ خەۋىرىدە ئېيتىلىشىچە، ئۇنىڭ ئالدىدا قېچىپ چىققان ئۈچ نەپەر تۇتقۇنمۇ باندىتلار قويۇپ بەرگەن ئەمەس بەلكى ئۆزلىرى قېچىپ چىققان دەپ قارالغان.

بۇنىڭدىن سەل بۇرۇن ئېلىپ بېرىلغان ئاخبارات ئېلان قىلىش يىغىنىدا ئاۋىستىرالىيە ساقچى تەرەپ ئىپادە بىلدۈرۈپ، ھازىرچە قەھۋەخانىدىكى تۇتقۇنلار ئىچىدە ئۆلۈپ-يارىلىنىش ئەھۋالىنىڭ كۆرۈلمىگەنلىكىنى، لېكىن ھازىرغىچە يەنىلا باندىتلار تەرىپىدىن قانچە ئادەمنىڭ تۇتقۇن قىلىۋىلىنغانلىقىنىڭ ئېنىق ئەمەسلىكىنى ئېيتقان. ساقچى تەرەپنىڭ ئېيتىشىچە، باندىتلار تەرىپىدىن تۇتقۇن قىلىنغانلارنىڭ سانى ھەرگىزمۇ ئاخبارات ۋاستىلىرى خەۋەر قىلغاندەك ئۇنچىۋالا كۆپ ئەمەس بولۇپ، ئەڭ كۆپ بولغاندىمۇ 30 ئادەم تۇتقۇن قىلىنغان بولۇشى مۇمكىن ئىكەن، بۇنىڭ ئالدىدا ئاخبارات ۋاستىلىرى خەۋەر بېرىپ، قەھۋەخانىدا ئەڭ ئاز دېگەندىمۇ 40 تىن 50 كىچە ئادەمنىڭ تۇتقۇن قىلىنغانلىقىنى، بۇنىڭ ئىچىدە 10 دىن ئارتۇق قەھۋەخانا خادىمىنىڭ بارلىقىنى، 30 دىن ئارتۇق خېرىدارلارنىڭ بارلىقىنى ئېيتقانىدى.