ماتېرىيال سۈرەت : ئامېرىكا زۇڭتۇڭى ئوباما 2011-يىلى مەملىكەتلىك تېلېۋىزىيە نۇتقى سۆزلەپ ، ‹‹ئەلقائىدە›› نىڭ كاتتىبېشى ئوساما بىن لادېننىڭ ئېتىپ ئۆلتۈرۈلگەنلىكىنى جاكارلىدى

جۇڭگو ئاخبارات تورى ، 30-ئۆكتەبىر تېلېگراممىسى : چەت ئەل تاراتقۇلىرىنىڭ خەۋەر قىلىشىچە ، شۇ يەر ۋاقتى 29-ئۆكتەبىر ئامېرىكا فوكس تېلېۋىزىيە ئىستانسىسى ئۆزلىرى سۈرەتكە ئالغان ، ‹‹ئەلقائىدە›› نىڭ ئاتامانى بىن لادىننى ئېتىپ ئۆلتۈرگەن ئامېرىكا دېڭىز يىلپىزى زەربىدارلار ئەترىتىدىكى ئەسكەر تەسۋىرلەنگەن ھۆججەتلىك فىلىمنى كېلەر ئايدا تېلېۋىزىيەدە تارقىتىدىغانلىقىنى جاكارلىغان .

خەۋەردە دېيىلىشىچە ، ‹‹بىن لادېننى ئۆلتۈرگەن ئەر›› ناملىق بۇ ھۆججەتلىك فىلىم ئىككى قىسىمغا بۆلۈنگەن بولۇپ ، 11-، 12-نويابىر كۈنلىرى قويۇلىدىكەن . پىروگرامما گۇرۇپپىسىنىڭ ئېيتىشىچە ، فىلىمدا دېڭىز يىلپىزى زەربىدارلار ئەترىتىدىكى بۇ ئەرنىڭ قانداق تەربىيەلىنىشلەردىن كېيىن ئامېرىكىدىكى ئەڭ قابىل ئەسكەرگە ئايلانغانلىقى ، قانداق قىلىپ ‹دېڭىز ئەرۋاھى نەيزىسى ›› ھەرىكىتىگە قاتناشقانلىقى ھەم ۋەزىپە ئىجرا قىلىش جەريانىدا ‹‹ئەلقائىدە›› نىڭ كاتتىبېشى بىن لادېننى قانداق ئېتىپ ئۆلتۈرگەنلىكى قاتارلىقلار تونۇشتۇرۇلىدىكەن .

پىروگرامما گۇرۇپپىسى ئاخبارات ئېلان قىلىش يىغىنىدا يەنە ، بۇ ھۆججەتلىك فىلىمدىكى ئەسكەرنىڭ بىن لادېننى ئېتىپ ئۆلتۈرۈش جەريانى ، بىن لادېن ھاياتىدىكى ئاخىرقى دەقىقىلەر قاتارلىق مەزمۇنلار ئەزەلدىن سىرتقا ئاشكارىلىنىپ باقمىغانلىقىنى ئېيتقان .

ئامېرىكا دېڭىز يىلپىزى زەربىدارلار ئەترىتى 2011-يىلى 2-مايدا پاكىستانغا يوشۇرۇنچە كىرىپ ، ‹‹ئەلقائىدە›› نىڭ كاتتىبېشى بىن لادېننى ئېتىپ ئۆلتۈرگەن . ھەرىكەت مۇۋەپپەقىيەتلىك تاماملانغاندىن كېيىن ، ئامېرىكا زۇڭتۇڭى ئوباما دۇنيا ئەھلىگە بۇ خەۋەرنى جاكارلىغان .