ئۇكرائىنا كرىزىسى ۋە رۇسىيە-غەرب مۇناسىۋىتىدىكى جىددىيچىلىكنىڭ ئېشىشى، ھىندىستان دىپلوماتىيەسىگە خىرىس ئېلىپ كېلىشى مۇمكىن. رۇسىيەنىڭ جۇڭگوغا يېقىنلىشىپ، غەرب بېسىمىنى يەڭگىللىتىشكە ئەگىشىپ، ھىندىستاننىڭ ئاسىيا ۋە باشقا رايونلاردىكى سىياسىي پائالىيەتلىرىنىڭ كۆلىمى چەكلىمىگە ئۇچرىشى مۇمكىن.

يېرىم ئەسىردىن بۇيان، ھىندىستان-رۇسىيە مۇناسىۋىتى خىلمۇ-خىل سىناق ۋە ئەگرى-توقايلارنى بېسىپ ئۆتتى. ھىندىستان بىلەن رۇسىيە، خۇددى جۇڭگو بىلەن پاكىستاندەك تولۇق ھەمكارلىق مۇناسىۋىتىدە ئىدى. نەچچە ئون يىلدىن بۇيان، جۇڭگو بىلەن چېگرىداش ۋە چەكلىك كۆلەمدە چېگرا تالىشىش ئۇرۇش ئېلىپ بېرىپ باققان جۇڭگودىن ئورتاق ھەزەر ئەيلەش، ھىندىستان-رۇسىيە مۇناسىۋىتىنىڭ مۇھىم بىر سەۋەبى بولۇپ كەلگەن ئىدى.

ئالدىنقى ئەسىرنىڭ 80-يىللىرى، ھىندىستان ۋە رۇسىيە ، جۇڭگو بىلەن بولغان مۇناسىۋىتىنى نورماللاشتۇرغان بولسىمۇ، جۇڭگونىڭ ئىستراتېگىيە غەرىزىگە بولغان ھوشيارلىقىنى ساقلاپ كەلگەن ئىدى. ئۆتكەن 20 يىلدا، جۇڭگونىڭ ئەمىلى كۈچى تېز سۈرئەتتە ئاشتى، بۇ، ھىندىستان بىلەن رۇسىيەنى بىر-بىرىگە تېخىمۇ يېقىنلاشتۇردى.

تاكى بۈگۈنكى كۈندە، جۇڭگو بىلەن رۇسىيە ئوتتۇرىسىدىكى ئىقتىسادى، بىخەتەرلىك ۋە سىياسىي مۇناسىۋەتلەرنىڭ كۆرۈنەرلىك قويۇقلىشىشى ھىندىستان ئۈچۈن بىر مەسىلە بولدى. چۈنكى رۇسىيە، ھىندىستانغا قارىغاندا جۇڭگوغا بەكرەك ئېغىپ كەتكەن ئىدى. ھەتتا ھىندىستانغا ئالاھىدە ئېتىبار قىلىدىغان موداپىئە ساھەسىدىمۇ، جۇڭگو رۇسىيەنىڭ مۇھىم شېرىكىگە ئايلاندى.

بۇ ھەپتىدە، زىيارەتكە كەلگەن جۇڭگو باش مىنىستىرى بىلەن كۆرۈشكەن رۇسىيە پرېزدېنتى، جۇڭگو بىلەن رۇسىيە «تەبىئىي شېرىك، دوست ۋە قوشنا» دېدى. رېئاللىق بۇنىڭغا يول قويماسلىقى مۇمكىن، چۈنكى ئىككى قوچقارنىڭ بېشى بىر قازاندا قاينىمايدۇ. جۇڭگو-رۇسىيە مۇناسىۋىتىنى چۈشىنىدىغانلار بۇنى ئوبدان بىلىدۇ. ستالىن بىلەن ماۋ زېدوڭ ئەينى ۋاقىتتا ھەربىي ئىتتىپاق قۇرىدىغانلىقىنى جاكارلىغان، ئەمما 50-يىللارنىڭ ئاخىرىدا، چىقىشالماي ئۆز يولىغا ماڭغان. جۇڭگو-سوۋېت مۇناسىۋىتىنىڭ يامانلىشىشى ۋە جۇڭگو-ھىندىستان چېگرا ئۇرۇشى سەۋەبلىك، ھىندىستان بىلەن رۇسىيەنىڭ ئىستراتېگىيىلىك ھەمكارلىق مۇناسىۋىتى تۇرغۇزۇشىغا سەۋەب بولغان.

ئەمەلىي سىياسەت مەنتىقىسى نۆۋەتتىكى جۇڭگو-رۇسىيە شېرىكلىك مۇناسىۋىتىنىڭ چوڭقۇرلۇقىغا چەك قويىدۇ دېسەك، ئامېرىكا ۋە ياۋروپا رۇسىيەنى جۇڭگو تەرەپكە ئىتتىرىشنى قارار قىلغاندەك تۇرىدۇ. 15 يىل بۇرۇن، پايدىلىق ئورۇنغا ئېرىشىش ئۈچۈن، رۇسىيە بىلەن جۇڭگو تۇنجى قېتىم ئىتتىپاق تۈزگەن، غەرب ئەللىرى رۇسىيەنى جازالايمىز ۋە يېگانە قالدۇرىمىز دەۋاتقان بۈگۈنكى كۈندە، بۇ ئىتتىپاق ئىستراتېگىيىلىك تاللاش بولۇپ قېلىشى مۇمكىن.

جۇڭگو بىلەن رۇسىيەنىڭ يېقىنلىشىشغا ئەگىشىپ، ھىندىستان چوقۇم بېسىم ھېس قىلىدۇ. ھىندىستان، جۇڭگونىڭ رۇسىيەنىڭ مۇھىم شېرىكى بولىدىغانلىقى، رۇسىيە بىلەن بولغان ھەمكارلىقنىڭ جۇڭگو ئۈچۈن ئامېرىكا بىلەن بولغان كۈچ ئېلىشىشىدا پايدا ئېلىپ كېلىدىغانلىقىنى ئوبدان بىلىدۇ. ھىندىستان، رۇسىيە بىلەن دۈشمەنلىشىپ ئامېرىكا بىلەن ھەمكارلىشالمايدۇ، شۇنداقلا كۈنسېرى كۈچىيىۋاتقان جۇڭگو-رۇسىيە ھەمكارلىقىنىڭ ئەگىشىپمۇ ماڭالمايدۇ.