شىنخۇا ئاگېنتلىقى تېلېگراممىسى : ئەنگىلىيە باش ۋەزىرى كامىرون بىلەن ئىران زۇڭتۇڭى روھانىي 24-سېنتەبىر ب د ت نىڭ نيۇيوركتىكى باش ئىشتابىدا كۆرۈشتى . بۇ ئىككى دۆلەت رەھبەرلىرىنىڭ 30 نەچچە يىلدىن بۇيان تۇنجى قېتىم كۆرۈشۈشى ھېسابلىنىدۇ .

ئىگىلىنىشىچە ، بۇ قېتىمقى كۆرۈشۈش ئەنگىلىيەنىڭ ب د ت دا دائىمىي تۇرۇشلۇق ۋەكىللەر ئۆمىكى ب د ت باش ئىشتابىدا تەسىس قىلغان ئىشخانىسىدا ئۆتكۈزۈلگەن . روھانىي بىلەن كامىرون بىرلىكتە خاتىرە سۈرەتكە چۈشكەن .

شۇ كۈنى چۈشتىن كېيىن ، ب د ت خەۋپسىزلىك كېڭىشى چەت ئەللەردىكى تېررورىزم ئىدىيەسىدە جەڭ قىلغۇچىلار مەسىلىسى توغرىسىدا يۇقىرى دەرىجىلىكلەر يىغىنى ئۆتكۈزگەن . ئانالىزچىلارنىڭ قارىشىچە ، غەرب ئىراننىڭ ئىراق ۋە سۇرىيە چېگرىسىدىكى تېررورلۇق تەشكىلاتقا زەربە بېرىشنى قوللىشىغا ئېرىشىشنى ئۈمىد قىلىدۇ .

ئىراننىڭ يادرو مەسىلىسى يېڭى بىر نۆۋەتلىك سۆھبىتى 19-ئۆكتەبىر نيۇيوركتا قايتا باشلىنىدۇ . ئىران يادرو مەسىلىسىدىكى ئالتە دۆلەت ( ئامېرىكا ، ئەنگىلىيە ، فىرانسىيە ، رۇسىيە ، جۇڭگو ۋە گېرمانىيە ) ئىران بىلەن ئىراننىڭ يادرو مەسىلىسى توغرىسىدا ئومۇميۈزلۈك كېلىشىم ھاسىل قىلىپ سۆھبەت ئۆتكۈزىدۇ .

1979-يىلدىن بۇيان ، ئەنگىلىيە ۋە ئىران رەھبەرلىرى ئەزەلدىن يۈز تۇرانە كۆرۈشۈپ باقمىغان . ئۆتكەن ئىككى يىلدىن كۆپرەك ۋاقىتتىن بۇيان ، ئەنگىلىيە بىلەن ئىراننىڭ بىۋاستە دىپلوماتىيە مۇناسىۋىتى بىر مەزگىل ئۈزۈلۈپ قالغان . بۇ يىل 20-فېۋرال ئەنگىلىيە بىلەن ئىران ئىككى دۆلەتنىڭ بىۋاستە دىپلوماتىيە مۇناسىۋىتىنى رەسمىي ئەسلىگە كەلتۈرگەن .