خەلقئارا لىنىيەسى خەۋىرى : شۇ يەر ۋاقتى 14-سېنتەبىر گېرمانىيە پايتەختى بېرلېندا چوڭ كۆلەملىك يىغىلىش ئۆتكۈزۈلدى ، گېرمانىيە زۇڭلىسى مېركېل يىغىلىشتا يەھۇدىيزمغا قارشى تۇرۇشقا ئېتىراز بىلدۈرۈش نۇتۇقى سۆزلەپ ، گېرمانىيەدىكى ھەرقايسى ساھەرلەرنى يەھۇدىيلارغا قارشى تۇرۇشتىن ۋاز كېچىپ ، يەھۇدىيلارنىڭ قانۇنىي ھوقۇق-مەنپەئەتىنى قوغداشقا چاقىردى .

شۇ يەر ۋاقتى 14-سېنتەبىر چۈشتىن كېيىن سائەت 3:00 لەردە ، بېرلىن براندېنبۇرگ دەرۋازىسى ئالدىدا 6000 دىن ئارتۇق كىشى يىغىلىپ ، يەھۇدىيزمغا قارشى تۇرۇشقا ئېتىراز بىلدۈرۈش يىغىلىشى ئۆتكۈزدى . گېرمانىيە زۇڭلىسى مېركېل ۋە زۇڭتۇڭ گائۇك بۇ قېتىمقى يىغىلىشقا قاتناشتى . مېركېل يىغىلىشتا نۇتۇق سۆزلەپ مۇنداق دېگەن ، مەن فېدېراتسىيە ھۆكۈمىتىنىڭ نامىدىن گېرمانىيە ۋە ياۋروپادىكى ھەرقانداق شەكىلدىكى يەھۇدىيزمغا قارشى تۇرۇشنى ئەيىبلەيمەن . مەن يەھۇدىيلارنى يەكلەيدىغان بارلىق قىلمىشلار ۋە گەپ-سۆزلەرگە قايتۇرما ھۇجۇم قىلىمەن . بىز يەھۇدىي قېرىنداشلار ، قوشنىلار ۋە ئىشداشلارغا شۇنداق ۋەدە بېرىمىزكى ، گېرمانىيە سىلەرنىڭ ئۆيۈڭلار .

شۇنىڭ بىلەن بىر ۋاقىتتا ، مېركېل مۇنۇلارنى بىلدۈرگەن ، گېرمانلار بۇ تارىخنى ئۇنتۇپ قالماسلىقى ھەمدە قانلىق قىرغىنچىلىقتا قازا قىلغان قېرىنداشلاردىن ئاشكارا ئەپۇ سورىشى كېرەك . بىز ياشلار ۋە چوڭلارنىڭ تېخىمۇ كۆپ ئاممىۋى يىغىلىش ئۆتكۈزۈشىگە ئىلھام بېرىمىز . بىز تېخىمۇ زور مەبلەغ سېلىپ مائارىپنى ياخشىلايمىز ھەمدە خاتىرە ئابىدىسى قۇرۇپ چىقىمىز . ئاشۇ قاباھەتلىك مەنزىرىنى ۋە ئەسلىمىنى گېرمانىيە تارىخىنىڭ بىر بۆلىكى دەپ بىلىپ ، ئەۋلادمۇ ئەۋلاد جاۋابكار بولۇشىمىز كېرەك .

ئىگىلىنىشىچە ، مەزكۇر يىغىلىشنى قوللىغان گېرمانىيە فېدېراتسىيە پارتىيەسى ، سوتسىيال دېموكراتلار پارتىيەسى ، گرىن پارتىيەسى ، ئەركىن دېموكراتلار پارتىيەسى ، سولچىل پارتىيە قاتارلىق سىياسىي پارتىيە-گۇرۇھلاردىن باشقا يەنە گېرمانىيە پۇتبولچىلار بىرلەشمىسى ، گېرمانىيە پۇتبول A دەرىجىلىكلەر بىرلەشمە مۇسابىقىسى ، گېرمانىيە ئولىمپىك تەنھەرىكەت بىرلەشمە جەمئىيىتى قاتارلىق تەشكىلاتلارمۇ بار .