نۇرلۇق تورى خەۋىرى | لەگلەك تورى تەرجىمىسى: ئامېرىكا "نيۇ يورك ۋاقىت گېزىتى" تورىدا 9 – ئاينىڭ 11 – كۈنى خەۋەر قىلىنىشىچە، يېڭى بىر تەتقىقات نەتىجىسىدىن مۇنداق خۇلاسە چىقىرىلغان: جۇڭگو كومۇنېستىك پارتىيەسىنىڭ چىرىكلىككە قارشى تۇرۇش تەدبىرلىدىن بىرى – ئەمەلدارلارنى ئۆز يۇرتىدىن يىراق يەرلەرگە يۆتكەپ ۋەزىپىگە قويۇش سەۋەبىدىن بىر قىسىم ئەمەلدارلار ھېسسىي تۇرمۇش جەھەتتە زور قىيىنچىلىققا يولۇققان. نەتىجىدە ئۇلارنىڭ بىر قىسىمى ناشايان قىلىقلار بىلەن مەشغۇل بولۇشقا باشلىغان.

مەركېزى پارتىيە مەكتىپى ژۇرنىلى"ئۆگېنىش گېزىتى" دە، چىياۋ سۈي شىيانىڭ ھەمكارلىقىدا تاماملىنىپ ئىلان قىلىنغان بىر ئىلمىي ماقالىدە يېزىلىشىچە، 450 نەپەر ئەمەلدارغا قارىتا ئېلىپ بېرىلغان سېستىمىلىق تەكشۈرۈشتىن نەتىجىلىنىشىچە: "يىرىمدىن كۆپرەك ئەمەلدار ئىلگىرى – كېيىن بولۇپ ئۆزگە يۇرتلاردا ۋەزىپە ئۆتىگەن، ئوتتۇرىچە ئۆزگە يۇرتتا ۋەزىپە ئۆتەش مەزگىلى 5.5 يىل بولغان.75.6% ئەمەلدار ۋەزىپە ئۆتەش مەزگىلىدە ئائىلىسىدىكلەر بىلەن ئايرىلىپ تۇرغان."

ئىلگىرى پارتىيە مەكتىپىدە 16 يىل خىزمەت قىلغان شەندۇڭ پىداگوگىكا ئۇنۋېرىستىتى ئىقتىساد ئىنىستىتۇتىنىڭ مۇئاۋىن مۇدىرى چىياۋ سۈي شىيانىڭ دېيىشىچە، نۇرغۇن ئەمەلدارلارنىڭ چىرىكلىك قىلمىشلىرىغا قارىتا تەكشۈرۈش نەتىجىسىدە كۆپىنچىسى ئاشنا ئويناش قىلمىشلىرىغا چېتىلغان. بۇ ئەھۋال ئۇنىڭ "ئەمەلدارلارنىڭ ھەقىقىي تۇرمۇشى" نى تەتقىق قىلىش خىيالىنى پەيدا قىلغان.

چىياۋ سۈي شىيا ماقالىسىدە مۇنداق يازغان: "بىر قىسىم ئەمەلدارنىڭ ھېسسىي تۇرمۇش جەھەتتىكى قالايمىقانچىلىقلىرىنىڭ خىزمەت شارائىتى بىلەن زىچ مۇناسىۋىتى بار. ئۇزۇن مەزگىللىك ھىجران ئازابى غا تولغان تۇرمۇشنىڭ ھېسيات جەھەتتە ئېلىپ كەلگەن بېسىمى ئەمەلدارلارنىڭ ئائىلە تۇرمۇش كىرزىسلىرىدا سەل قاراشقا بولمايدىغان ئامىلدۇر".

ئۇ تاراتقۇلارنىڭ زىيارىتىنى قوبۇل قىلغاندا مۇنداق دېگەن:" ئەمەلدارلار ئۆزگە يۇرتلاردا ۋەزىپە ئۆتىمىگەندىمۇ، "ئۆيىنى ئۇنۇتقان" ھالدىكى خىزمەت رىتىمى ۋە ئۇسلۇبى ئۇلارنىڭ نورمال ھالەتتىكى ئائىلە تۇرمۇشىدىن يىراقلاپ، زىممىسىدىكى ئائىلە مەسئۇلىيىتىنى ئۇنۇتۇشىنى كەلتۈرۈپ چىقىرىدۇ. تەكشۈرۈش نەتىجىمىزدىن ئايان بولۇشىچە، پەقەت15%ئەمەلدارلا پەرزەنتلىرى ئۈچۈن ئاتا – ئانا يېغىنىلىرىغا قاتنىشالىغان. ئەڭ مۇھىمى، 20% ئەمەلدار ئەزەلدىن ئائىلىسىدىكىلەر بىلەن سىرتلارغا چىقىپ ئارام كۈنلىرىنى ئۆتكۈزۈپ باقمىغان".

چىرىكلىكنى ئازايتىش مەقسىتىدىكى، پارتىيەنىڭ ئەمەلدارلارنى تونۇش – بىلىش، قوللىغۇچىلىرى بولمىغان ناتونۇش رايۇنلارغا ئورۇنلاشتۇرۇش بەلگىلىمىسى ئۇلارنىڭ ئائىلىسىدىن ئۇزاق مەزگىللىك ئايرىلىپ تۇرۇشۇنى كەلتۈرۈپ چىقارغان.
چىياۋ سۈي شىيانىڭ تەكشۈرۈشىگە ئاساسلانغاندا، 94.8% ئەمەلدار دائىم "قاتتىق بېسىم " ھېس قىلىدىكەن، بۇنىڭ ئىچىدە 49% ئەمەلدارنىڭ ئىيتىشىچە ئۇلار "يۇقىرى ياكى ناھايىتى يۇقىرى بولغان خىزمەت بېسىمى" غا بەرداشلىق بېرىپ كەلگەن ئىكەن.63.2% ئەمەلدارنىڭ ئاساسلىق بېسىمى ئائىلە تۇرمۇشىنىڭ قالايمىقانچىلىقىدىن كەلگەن.

ئەمەلدارلارنىڭ ئائىلە تۇرمۇشى قانچىلىك بېسىمغا ئۇچىراۋاتقان بولۇشىدىن قەتئىينەزەر، جۇڭگو كومۇنىستىك پارتىيەسى ئەمەلدارلارنىڭ چىرىكلىك قىلمىشىلىرىنى جازالاشتا يەنىلا قاتتىق جازالاش لۇشىيەنىدە تۇرۇپ كەلگەن. "ئاشنا ئويناش" تىن ئىبارەت چىرىكلىك قىلمىشىغا بولغان ئېنىقلىما ۋە جازانى تېخىمۇ ئايدىڭلاشتۇرۇپ،ئىلگىرىكى "ئەخلاقى بۇزۇلۇش" دەپ ئاتىلىپ كەلگەن قىلمىش ئۈستىگە قويغان.

"جىڭخۇا گېزىتى" يېقىندا خەھەر قىلىشىچە، 2012 – يىلى يىىل ئاخىرىدىن باشلاپ بۇ يىلى 9 – ئاينىڭ 5 – كۈنىگىچە پۈتۈن مەملىكەتتە جەمئىي 241 نەپەر چوڭ – كىچىك ئەمەلدار "ئاتتىن چۈشۈرۈلۈپ" ئەدىلىيە ئورۇنلىرىغا تاپشۇرۇلغان. بۇنىڭ ئىچىدە 48 ئادەم مۇناسىۋەتلىك تەكشۈرۈش ئورگانلىرى تەرىپىدىن چوقۇم بىنورمال ئەر – ئايال مۇناسىۋىتى بار دەپ بېكىتىلگەن. يىرىمىدىن ئازراق، يەنى 19 ئەمەلدارنى "چوقۇم ئاشنا ئوينىغان" دەپ ئېنىق بىكىتكەن. ئۇلارنىڭ ئىچىدە 13 نىڭ ئاز دېگەندە 3 تىن ئاشنىسى بولغان.

تاراتقۇلار دۆلەتلىك مەمۇرىي ئىنىستىتۇتى پروفېسسورى ۋاڭ يۈ كەي نىڭ سۆزىنى نەقىل قىلىپ: "18 – نۆۋەتلىك خەلق قۇرۇلتىيىدىن بىرى، ئاشنا ئويناش ۋە بىنورمال ئەر – ئايال مۇناسىۋەتلىرى تۇرمۇش ئىستىلى مەسىلىسى بولۇپلا قالماستىن، ئاللىبۇرۇن چىرىكلىككە قارشى تۇرۇشتىكى مۇھىم نوقتىغا ئايلاندى"دېگەن.