جۇڭگو خەۋەر تورى 7-ئاينىڭ 30-كۈنى خەۋەر قىلىدۇ: چەتئەل خەۋەرلىرىگە ئاساسلانغاندا، داۋالاش خادىملىرى دېيىشىچە، ئىسرائىلىيە ئارمىيىسى 7-ئاينىڭ 30-كۈنى غەززەنىڭ شىمالىدىكى بىر ب د ت نىڭ مەكتىپىنى بومباردىمان قىلىپ، 20 ئادەمنىڭ ئۆلىشىنى كەلتۈرۈپ چىقارغان.
7-ئاينىڭ 30-كۈنى ئىسرائىلىيەنىڭ غەززەگە ھاۋادىن ھۇجۇم قىلىشى 23-كۈنىگە قەدەم قويدى. غەززدىكى جىددىي مۇلازىمەت تارمىقىنىڭ باياناتچىسى قۇدرەنىڭ دېيىشىچە، بۇ مەكتەپ جابارىيە مۇساپىرلار لاگىرىغا جايلاشقان، ھازىر پاناھلىنىش ئورنى قىلىنماقتا.

غەززە سەھىيە تارماقلىرى دېيىشىچە، ئىسرائىلىيە ئارمىيىسىنىڭ ئۇرۇش ئايروپىلانلىرى ۋە تانكىلىرى 7-ئاينىڭ 30-كۈنى غەززەدىكى كۆپلىگەن نىشانلارغا داۋاملىق ھۇجۇم قىلغان، غەززەنىڭ جەنۇبىدىكى خان يۈنۈس شەھىرىدە 8 ئادەمنى پارتلىتىپ ئۆلتۈرۈۋەتكەن، شىمالدا 13 ئادەمنى پارتلىتىپ ئۆلتۈرگەن، ئۇلارنىڭ بىرى بوۋاق ئىكەن.

بۇ قېتىمقى توقۇنۇشتا ئىسرائىلىيە غەززەدىكى دوختۇرخانا ۋە ب د ت نىڭ ئەسلىھەلىرىنى توپقا تۇتۇپ، خەلقئارا جەمئىيەتنىڭ قاتتىق ئەيىبلىشىگە ئۇچرىدى. ب د ت نىڭ باش كاتىپى بان كىمۇن ئىسرائىلىيەنىڭ بومباردىمان قىلىش قىلمىشىدىن چۆچىگەنلىكىنى بىلدۈرگەن، بۇ قىرغىنچىلىق قىلمىشىنى دەرھال توختىتىشنىڭ زۆرۈرلىكىنى كۆرسىتىپ بەردى.