نەچچە يىلنىڭ ئالدىدا كۆچمە خەۋەرلىشىش كارخانىلىرى ئابونتلارنىڭ ھەر قېتىملىق ئۇرغان تېلېفونىدىن ھەق ئالاتتى، ئەمما كۆپ ساندىكى ئابونتلارغا چەكسىز تور ئېقىمى سوۋغا قىلاتتى. سانلىق مەلۇمات ئېقىم مىقدارىنىڭ پارتلاش خارەكتىرىدە ئېشىشىغا ئەگىشىپ، سۆزلىشىش ۋە ئۇچۇر يوللاش مىقدارى بارا-بارا تۆۋەنلەپ بارغان، كۆچمە خەۋەرلىشىش كارخانىلىرىنىڭ تىجارەت ئەندىزىسى بولسا بىر يۈز سەكسەن گىرادۇس بۇرۇلۇش نۇقتىسىغا كېلىپ قالغان، يېڭى ئەندىزىدە كۆپ ساندىكى يانفون ئابونتلىرىغا چەكسىز سۆزلىشىش ۋە ئۇچۇر يوللاش سوۋغا قىلىنىدۇ، ئەمما ئىشلەتكەن سانلىق مەلۇمات ئېقىم مىقدارىغا ھەق تۆلەيدۇ. ئامېرىكىدا كۆچمە خەۋەرلىشىش كارخانىلىرىنىڭ تىجارەت ئەندىزىسىنى ئۆزگەرتىش خىزمىتى ئاللىبۇرۇن ئاخىرلاشقان. تىجارەت ئەندىزىسىنى ئۆزگەرتىش بىلەن بىرگە، كۆچمە خەۋەرلىشىش كارخانىلىرى يەنە يۇقىرى كىرىم سەۋىيىسىنى ساقلاپ قالغان.

بازار تەكشۈرۈش شىركىتى Consumer Intelligence Research Partners نىڭ بىر تۈرلۈك تەتقىقاتىدا بايقىلىشىچە، كەسىپ ئەندىزىسىنى ئۆزگەرتىش جەھەتتە Verizon شىركىتى ئەڭ ياخشى ئۇسۇلدا ئېلىپ بارغان بولۇپ، بۇ شىركەتتە چەكسىز ئېقىم مىقدارىدىن بەھرىمەن بولىدىغان ئابونتلارنىڭ سانى ناھايتى ئاز، ھەر ئايدا 100 دوللاردىن كۆپ يانفون ھەققى تۆلەيدىغان ئابونتلارنىڭ نىسبىتى ئەڭ كۆپ ئىكەن. Verizonشىركىتىنىڭ ئەقلى ئىقتىدارلىق يانفون ئابونتلىرىدىن كىرىدىغان كىرىمى ئىنتايىن يۇقىرى بولۇپ، يەنە بىر قىسىم ئابونتلار باشقا ئۈسكۈنىلەردە Verizon شىركىتىنىڭ سانلىق مەلۇمات مۇلازىمىتىنى ئىشلىتىدىكەن .

500 نەپەر ئامېرىكىلىق ئابونتنى تەكشۈرۈش نەتىجىسىدىن مەلۇم بولىشىچە، تەخمىنەن %51ئەتراپىدىكى Verizon ئابونتىنىڭ ئايلىق يانفون ھەققى 100 دوللاردىن ئېشىپ كېتىدىكەن، بۇنىڭ ئىچىدىكى %14 ئابونتنىڭ ئايلىق يانفون ھەققى 200 دوللاردىن ئېشىپ كېتىدىكەن. تەكشۈرۈش نەتىجىسىدىن يەنە مەلۇم بولىشىچە، پەقەت %22 ئەتراپىدىكى Verizon ئابونتى چەكسىز ئېقىم مىقدارىدىن بەھرىمەن بولىدىكەن، AT&T نىڭ بۇ نىسبىتى % 44 گە يېتىدىكەن، Sprint ۋە T-Mobile نىڭ بولسا %78 گە يېتىدىكەن.

AT&T ۋە Verizon شىركەتلىرى باشتىن ئاخىر ئىشلەتكەن ئېقىم مىقدارىغا ئاساسەن ھەق ھېساپلاش ئۇسۇلىنى قوللىنىپ كەلگەن. Verizon نىڭ دىيىشىچە، بۇ يىل ئىككىنچى ئايغا قەدەر، تەخمىنەن يېرىم ئۈلۈش رەقەملىك ئالاقە ئابونتى ئورتاق بەھىرلەنگىلى بولىدىغان ئېقىم مىقدارى مۇلازىمىتىنى ئىشلەتكەن.

كۆچمە خەۋەرلىشىش كەسپىدىكى يەنە بىر يۈزلىنىش بولسا، يانفوننىڭ ئەسلى تەننەرخى بىلەن ئالاقىلىشىش ھەققىنى ئايرىۋېتىش بولۇپ، بۇ ئارقىلىق ئابونتلارنىڭ تېخىمۇ ئەركىن ھالدا يانفون ئالماشتۇرىشىغا يېشىل يول ئېچىپ بەرگىلى بولىدىكەن.