لى چۈنشيانىڭ ئاپتونوم رايونلۇق سودا – سانائەت مەمۇرىي باشقۇرۇش ئىدارىسىدىن ئىگىلىشىچە، ئاپتونوم رايونىمىزدا كاپىتالنى تىزىملىتىش تۈزۈمى ئىسلاھاتى يولغا قويۇلغان ئۈچ ئايدىن بۇيان يېڭىدىن تىزىملاتقان كارخانا 12 مىڭدىن ئېشىپ، بۇلتۇرقى ئوخشاش مەزگىلدىكىدىن ئالتە ھەسسىگە يېقىن كۆپىيىپ، ئىسلاھاتنىڭ ئۈنۈمى دەسلەپكى قەدەمدە نامايان بولغان.

ئاپتونوم رايون بۇ يىل 1 – مارتتىن باشلاپ كاپىتالنى تىزىملىتىش تۈزۈمى ئىسلاھاتىنى رەسمىي يولغا قويدى. ئاپتونوم رايونلۇق سودا – سانائەت مەمۇرىي باشقۇرۇش ئىدارىسىنىڭ ئىستاتىستىكىسىغا قارىغاندا، ئاپتونوم رايونىمىزدا 1 – مارتتىن 31 – مايغىچە 12 مىڭ 237 كارخانا يېڭىدىن تىزىملاتقان بولۇپ، بۇلتۇرقى ئوخشاش مەزگىلدىكىدىن %58.1 كۆپەيگەن؛ بۇنىڭ ئىچىدە يېڭىدىن تىزىملاتقان شىركەت 10 مىڭ 246 بولۇپ، بۇلتۇرقى ئوخشاش مەزگىلدىكىدىن %76.5 كۆپەيگەن. بۇ سانلىق مەلۇماتلار كاپىتالنى تىزىملىتىش تۈزۈمى ئىسلاھاتىنىڭ ئىجتىمائىي سېلىنما قىزغىنلىقىنى قوزغاپ، ئاپتونوم رايونىمىز ئىقتىسادىنىڭ تەرەققىياتىغا يېڭى ھاياتىي كۈچ قوشۇۋاتقانلىقىدىن دېرەك بېرىدۇ.

ئاپتونوم رايونلۇق سودا – سانائەت مەمۇرىي باشقۇرۇش ئىدارىسى كارخانىلارنى تىزىملاش، ئەنگە ئېلىش باشقارمىسىنىڭ مۇئاۋىن باشلىقى سۇڭ لىپىڭ ئانالىز قىلىپ مۇنداق دېدى: كاپىتالنى تىزىملىتىش تۈزۈمى ئىسلاھاتىدا ئەمەلىي كاپىتالنى رويىخەتكە ئالدۇرۇش تۈزۈمى ئېتىراپ قىلىنغان كاپىتالنى رويىخەتكە ئالدۇرۇش تۈزۈمىگە ئۆزگەرتىلىپ، رويىخەتكە ئالدۇرىدىغان كاپىتالنىڭ ئاز – كۆپلۈكىنى شىركەت پايچىلىرى بەلگىلىسىمۇ، ئەمما ئىسلاھاتتىن كېيىن يېڭىدىن تىزىملاتقان كارخانىلارنى ئانالىز قىلغاندا، مەبلەغ سالغۇچىلار كاپىتالىنى رويخەتكە ئالدۇرغاندا يەنىلا ئاقىلانىلىك بىلەن ئىش كۆرگەن.

بۇ ئۈچ ئايدا توققۇز كارخانا 500 مىليون يۈەندىن كۆپرەك كاپىتالنى رويىخەتكە ئالدۇرغان، ئۇلار ئاساسەن ياسىمىچىلىق ۋە توپ سېتىشتىن ئىبارەت كۆپرەك مەبلەغ كېتىدىغان ساھەلەرگە مەبلەغ سالغان؛ رويىخەتكە ئالدۇرغان ئەڭ ئاز كاپىتال 100 يۈەن بولۇپ، مۇلازىمەت كەسپىنى تاللىغان.

تىلغا ئېلىشقا ئەرزىيدىغىنى، كاپىتالنى رويىخەتكە ئالدۇرۇشتىكى ئەڭ تۆۋەن چەكنىڭ ئەمەلدىن قالدۇرۇلۇشى كاپىتالنى رويىخەتكە ئالدۇرۇپ تىزىملىتىش تۈزۈمى ئىسلاھاتىنىڭ يارقىن نۇقتىسى بولۇپ، بۇنىڭدىن كۆپلىگەن كارخانىلار نەپكە ئېرىشتى. ئىسلاھات يولغا قويۇلۇشتىن ئىلگىرى، شىركەتلەر رويىخەتكە ئالدۇرىدىغان كاپىتالنىڭ ئەڭ تۆۋەن چېكى بار ئىدى، مەسىلەن: چەكلىك شىركەت بولسا 30 مىڭ يۈەن، بىر كىشىدىن تەشكىللەنگەن چەكلىك شىركەت بولسا 100 مىڭ يۈەن دېگەندەك، ھازىر بۇلار ئەمەلدىن قالدۇرۇلدى. ئىگىلىشىمچە، بۇ ئۈچ ئايدا يېڭىدىن تىزىملاتقان شىركەتلەر ئىچىدە، رويىخەتكە ئالدۇرغان كاپىتالى 30 مىڭ يۈەندىن ئاز بولغان كارخانىدىن 175ى، 100 مىڭ يۈەندىن ئاز بولغان بىر كىشىلىك چەكلىك شىركەتتىن 823ى بار ئىكەن.

‹‹كېيىنكى قەدەمدە بازار سۇبيېكتلىرىنىڭ ئىناۋەتلىك ئۇچۇرلىرىنى ئاشكارىلاش سىستېمىسىنى يەنىمۇ مۇكەممەللەشتۈرۈپ، يىللىق مەلۇماتنى ئاشكارىلاش تۈزۈمى، تىجارىتى بىنورماللارنىڭ تىزىملىكى قاتارلىق ئىناۋەتكە چەك قويۇش مېخانىزملىرىنى يولغا قويىمىز. ئىسلاھاتنى داۋاملىق چوڭقۇرلاشتۇرۇپ، سودا – سانائەت مەمۇرىي باشقۇرۇش ئورۇنلىرىغا تىزىملىتىشتىن بۇرۇنقى تەكشۈرۈپ تەستىقلاشنى كېيىن تەكشۈرۈپ تەستىقلاشقا ئۆزگەرتىپ، <ئاۋۋال سېلىشتۇرۇپ، ئاندىن دەلىللەش> ئەندىزىسىنى تەدرىجىي ئىشقا ئاشۇرۇپ، ئاممىنىڭ سودا – سانائەت مەمۇرىي باشقۇرۇش تارماقلىرىغا تىزىملىتىشىغا قولايلىق يارىتىپ، رايونىمىزدىكى بازار سۇبيېكتلىرىنىڭ تېز تەرەققىياتىنى ئىلگىرى سۈرىمىز››، دېدى ئاپتونوم رايونلۇق سودا – سانائەت مەمۇرىي باشقۇرۇش ئىدارىسىنىڭ باشلىقى مەمتىمىن فېردوس.