ياپونىيەلىك تەتقىقاتچىلارنىڭ ئەڭ يېڭى دوكلاتىدا ئېيتىلىشىچە، ئۇلار بالىلارنىڭ سۈت چىشىدىن ئېلىنغان غول ھۈجەيرىدىن كۆپ مىقدارىدىكى جىگەر ھۈجەيرىسىنى يېتىشتۈرۈپ چىققان، بۇ ھۈجەيرىلەر جىگەر قېتىش كېسىلىگە گىرىپتار بولغان تەجرىبە چاشقىنىنىڭ كېسەللىك ئەھۋالىنى ياخشىلىغان. 

ئادەم بوۋاق ۋاقتىدا تەدرىجىي ھالدا 20 سۈت چىشى ئۆسۈپ چىقىدۇ، ئۇنىڭدىن كېيىن ئارقىمۇ ئارقا چۈشۈپ كېتىپ ئورنىغا تۇراقلىق چىش چىقىدۇ. يېقىنقى يىللاردىن بۇيان سۈت چىشى غول ھۈجەيرىسى قوللىنىش ئىستىقبالى كەڭ غول ھۈجەيرە سۈپىتىدە قارىلىپ تېخىمۇ كۆپ كىشىنىڭ دىققىتىنى تارتتى، چۈنكى بۇ ھۈجەيرىلەر سۆڭەك ھۈجەيرىسى قاتارلىق كۆپ خىل ھۈجەيرىلەرگە بۆلۈنەلەيدىغان بولۇپ، كىندىك قېنى غول ھۈجەيرىسىدىنمۇ «ئالاھىدە» دەپ قارالدى.

ياپونىيە كيۇشۇ ئۇنىۋېرسىتېتىنىڭ تەتقىقاتچى خادىملىرى يېقىندا ئۆتكۈزۈلگەن ياپونىيە قايتا يېتىلدۈرىدىغان داۋالاش ئىلمى جەمئىيىتىنىڭ دوكلاتىدا ئېيتىشىچە، ئۇلار قانۇنلۇق ھالدا ساغلام بالىنىڭ سۈت چىشىغا ئېرىشىپ، چىش يىلىكىدىن غول ھۈجەيرىنى ئايرىپ چىققان ھەمدە ئۇنىڭغا غول ھۈجەيرىنىڭ ئايرىلىشىنى ئىلگىرى سۈرىدىغان ئاقسىل قوشۇپ يېتىشتۈرگەندىن كېيىن ئەڭ ئاخىرىدا زور مىقداردىكى جىگەر غول ھۈجەيرىسىگە ئېرىشكەن. ئۇلار بۇ جىگەر ھۈجەيرىسىنى جىگەر قېتىش كېسىلىگە گىرىپتار بولغان تەجرىبە چاشقىنىنىڭ بەدىنىگە كۆچۈرگەندىن كېيىن تەجرىبە چاشقىنىنىڭ جىگەر كېسەللىك ئالامىتى ياخشىلانغان.

تەتقىقاتچى خادىملارنىڭ بىلدۈرۈشىچە، سۈت چىشى غول ھۈجەيرىسى چۈشۈپ كەتكەن سۈت چىشىدىن ئېلىنىدىغان بولۇپ، باشقا غول ھۈجەيرىلەردىن ئاسان ئېرىشكىلى بولىدىكەن، بۇنىڭدىن كېيىن تۇغما جىگەر ئىقتىدارى بىنورمال بولۇش قاتارلىق كېسەللىكلەرنى داۋالاشقا ئىشلىتىشتە ئۈمىد بار ئىكەن.