جۇڭگو ئاخبارات تورى خەۋىرى، نۇر تورى تەرجىمىسى:

روسىيە سۈنئىي ھەمراھ تورىنىڭ خەۋىرىگە قارىغاندا، روسىيە مەركىزى ھەربىي رايونىنىڭ ئاخبارات ئورنى 17-چېسلا ئاخبارات ئېلان قىلىپ مۇنداق دېگەن: بۇ ھەربىي رايوننىڭ يەنە 3 دانە تىپلىق بومباردىمانچى ئايروپىلانى سۈرىيەدىكى ھاۋا ئارمىيە بازىسىدىن ئۇچۇپ روسىيەدىكى ھاۋا ئارمىيە بازىسىغا قايتىپ كەلدى.

خەۋەردە ئېيتىلىشچە، بۇنىڭدىن بۇرۇن روسىيە ھاۋا ئارمىيەسىنىڭ باش قوماندانى «كوممۇنىستىك ياشلار ئىتتىپاقى ھەقىقەت گېزىتى» نىڭ زىيارىتىنى قوبۇل قىلغاندا، 2-3 كۈن ئىچىدە سۈرىيەدىن چېكىنىشنى تاماملاپ بولىدىغانلىقىنى بىلدۈرگەن.

ئۇقۇشلارغا قارىغاندا، روسىيە ئۇرۇش ئايروپىلانلىرىنىڭ سۈرىيەدىكى ھاۋا ئارمىيە بازىسىدىن روسىيەدىكى دائىملىق تۇرۇشلۇق ھاۋا ئارمىيە بازىسىغا قاراپ يىراق مۇساپىلىك ئۇچۇشى گۇرۇپپىلارغا بۆلۈنۈپ ئىجرا قىلىنىدىكەن. ھەر بىر گۇرۇپپىدا بىر دانە ھەربىي ئىشلار توشۇغۇچى ئايروپىلانى ۋە بىر نەچچە دانە ئۇرۇش ئايروپىلانى بولىدىكەن.

خەۋەردە كۆرسىتىلىشچە، روسىيەنىڭ سۈرىيەدىكى ھەربىي ھەرىكىتى 2015-يىلى 9-ئايدىن باشلانغان بولۇپ، 5 ئايدىن كۆپرەك ۋاقىت داۋاملاشقان. بۇ قېتىملىق ۋەزىپىنى ئۈستىگە ئالغىنى روسىيەنىڭ ھاۋا ئارمىيەسى بولۇپ، بۇ مەزگىل ئىچىدە، روسىيە ھاۋا ئارمىيەسى 9000 قېتىمدىن ئارتۇق ئۇرۇش ۋەزىپىسىنى تاماملاپ، تېررورلۇق تەشكىلات «ئىسلام دۆلىتى» نىڭ نۇرغۇنلىغان ئاساسى ئەسلىھەلىرىنى، نېفىت قېزىش، پىششىقلاپ ئىشلەش، توشۇش ئەسلىھەلىرىنى ۋەيران قىلىۋەتكەن. 3-ئاينىڭ 14-كۈنى روسىيە زۇڭتۇڭى پۇتىن روسىيە ئارمىيەسىنىڭ سۈرىيەدىكى ئاساسلىق قىسمىنى چېكىنىپ چىقىپ كېتىشكە بۇيرۇق قىلغان، چۈنكى روسىيە دۆلەت مۇداپىئە مىنىستىرلىقىنىڭ ۋەزىپىسى ئاللىقاچان تاماملىنىپ بولغان.