چەتئەل تاراتقۇلىرىنىڭ خەۋىرىگە قارىغاندا، ئەنگلىيە ئالىملىرى مۇناسىۋەتلىك نازارەت تارماقلىرىنىڭ ئىنسان تۆرەلمە گېنىنى ئۆزگەرتىش تەتقىقاتى ئىجازىتىگە ئېرىشكەن.

     ئىنسانلارنىڭ تۆرەلمە گېنىنى ئۆزگەرتىش ئېغىر تالاش-تارتىش ساقلانغان ساھە بولۇپ، نۇرغۇنلىغان ئالىملار ئىنسانلارنىڭ تۆرەلمىسىدىكى DNA نى ئۆزگەرتىش، ئەڭ ئاخىردا ئىنسانلارنىڭ بوۋاقنى لايىھەلىشىگە يول ئېچىپ بېرىدۇ، دەپ قاراپ كەلگەن.

بىراق ئالىملارنىڭ قارىشىچە، بۇ خىل تەتقىقات ئالىملارنىڭ ئىنسانلار ھاياتىنىڭ دەسلەپكى مەزگىلىدىكى ئەھۋالىنى تېخىمۇ چوڭقۇر چۈشىنىش ئىمكانىيىتىگە ئىگە قىلىدىكەن.

لوندوندىكى فىرانسىس كۇراك تەتقىقات ئورنىنىڭ ئالىملىرى ھازىر ئەنگلىيەدىكى ھامىلىدار بولۇش ۋە تۆرەلمەشۇناسلىقنى باشقۇرۇش ئىدارىسىنىڭ ئىجازىتىگە ئېرىشىپ بولغان،  تەتقىقات ئورنىدىكىلەر ھامىلىدارلىقنىڭ بېشىدىكى يەتتە كۈندە تۆرەلمىنىڭ گېنىنى ئۆزگەرتىش تەجرىبىسى ئىشلەپ، بويىدىن ئاجراپ كېتىشنىڭ سەۋەبىنى چۈشەندۈرمەكچى ئىكەن.

بىراق، قانۇندا بۇنداق تۆرەلمىنى ئانا تېنىگە كۆچۈرۈش چەكلەنگەن.

ئەنگلىيەدىكى ھامىلىدارلىقىنى ۋە تۆرەلمەشۇناسلىقنى باشقۇرۇش ئىدارىسىگە ئىلمىي تەجرىبە ئىلتىماسى سۇنغان فىرانسىس كۇراك تەتقىقات ئورنىنىڭ تەتقىقاتچىسى دوكتور نىئاكان:«ئالىملار ئىنسان تۆرەلمىسىنىڭ مۇۋەپپەقىيەتلىك ھالدا بىر ساغلام بوۋاققا تەرەققىي قىلىش جەريانىدىكى گېن تەلىپىنى چۈشىنىپ بېقىشقا ئېھتىياجلىق»دېگەن.

ئۇ يەنە:«بۇ ئىنتايىن مۇھىم تەتقىقات. ھازىر بويىدىن ئاجراپ كېتىش بىلەن ھامىلىدار بولالماسلىق ئەھۋالى ئىنتايىن ئېغىر، ئەمما بىزنىڭ بۇ توغرىلىق بىلىدىغانلىرىمىز بەكلا ئاز»دېگەن.

ئىستاتىستىكىغا قارىغاندا، ھامىلىدىكى ھەر يۈز دانە تۇخۇمىنىڭ ئىچىدە پەقەت 50 دانىگە يەتمىگەن تۇخۇم يېتىلىپ خالتىلىق تۆرەلمە باسقۇچىغا بارالايدىكەن، ئەمما مۇشۇنداق تۇخۇمدىن 25 دانىسى بالىياتقۇغا كۆچۈرۈلگەندىن كېيىن، پەقەت 13 دانىسىلا ئۈچ ئايدىن يۇقىرى ۋاقىتقىچە ياشىيالايدىكەن.

لوندون فىرانسىس كۇراك تەتقىقات ئورنىنىڭ باشلىقى پائول نورس:«مەن دوكتور نىئاكاننىڭ ئىلتىماسىنىڭ ھامىلىدارلىق ۋە تۆرەلمەشۇناسلىقنى باشقۇرۇش ئىدارىسىنىڭ تەستىقىغا ئېرىشكەنلىكىدىن خۇشالمەن»دېگەن.

ئۇ يەنە:«دوكتور نىئاكاننىڭ تەتقىقات پىلانى ئىنسان تۆرەلمىسىنىڭ ساغلام تەرەققىي قىلىشى ئۈچۈن ناھايىتى مۇھىم، بۇ تۈرلۈك تەتقىقات بەدەن سىرتىدا سۈنئىي ئۇرۇقلاندۇرۇشنىڭ مۇۋەپپەقىيەتلىك بولۇش نىسبىتىنى يۇقىرى كۆتۈرىدۇ»دېگەن.

دوكتور نىئاكان ئالدىنقى 10 يىل مەزگىلدە ئۇدا ئىنسانلار تۆرەلمىسىنىڭ يېتىلىش جەريانىنى تەتقىق قىلغان، ئۇ كېيىنكى باسقۇچتا بارلىق كۈچىنى ئىنسان تۆرەلمىسىنىڭ دەسلەپكى يەتتە كۈنلۈك تەرەققىياتىنى كۆزىتىشكە مەركەزلەشتۈرىدىكەن.