ئالما شىركىتى ئۈچۈن ئېيتقاندا، ئايفون ئۇنىڭ ئۈچۈن «بىر تىللا تۆكۈلىدىغان دەرەخ» بولۇپ ھېسابلىنىدۇ، «ئالما شىركىتىنىڭ بايلىقى بىر دۆلەتنىڭ بايلىقىغا تەڭلىشىدۇ» دېيىش ھەرگىزمۇ ئوينىشىپ ئېيتىلغان گەپ ئەمەس.

    ئالما شىركىتىنىڭ سېتىش سوممىسى يىقىندا يەنە بىر قېتىم رېكوردنى بۇزۇۋەتكەن. گەرچە ھازىر ئايفوننىڭ مال چىقىرىش مىقدارىنىڭ ئېشىش نىسبىتى تارىختىكى ئەڭ تۆۋەن نۇقتىغا چۈشكەن بولسىمۇ، ئەمما ئۇنىڭ سېتىلىش مىقدارى يەنىلا يۇقىرى بولۇپ، بۇلتۇر جەمئىي 74.8 مىليون دانە ئايفون سېتىلغان. ئىستاتىستىكا قىلىنىشىچە، ئالما شىركىتى 2015-يىلى ئايفون كەسپىدىن ياراتقان كىرىم 155 مىليارد دوللارغا يەتكەن. ئىستاتىستىكا ئورگانلىرى ئىلگىرى مۇنداق ھېسابلاپ كۆرگەن، يەنى ئەگەر ئالما شىركىتىنىڭ ئايفون كەسپىنى بىر دۆلەت (ياكى مۇستەقىل ئىقتىسادىي گەۋدە) دەپ قارىساق، ئۇنداقتا ئۇنىڭ بايلىقى دۇنيا بويىچە 57-ئورۇندا تۇرىدىكەن.

بۇ دېگەنلىك، ئايفوندىن ئىبارەت بۇ «دۆلەت» نىڭ بايلىقى دۇنيادىكى نۇرغۇنلىغان دۆلەتلەردىن ئېشىپ كېتىدىكەن. دۇنيا بانكىسى ئېلان قىلغان GDP سانلىق مەلۇماتىغا ئاساسلانغاندا، ئالما ئايفون تارمىقىنىڭ بايلىقى ئوتتۇرا شەرقتىكى نېفىت دۆلىتى كۇۋەيتتىنلا كىيىن تۇرىدىغان بولۇپ، ئانگولا، ۋېنگرىيە ۋە ئۇكرائىنا دېگەندەك دۆلەتلەرنىڭ ئالدىدا تۇرىدىكەن.

ئەگەر ئالما شىركىتىنىڭ 2015-يىللىق ئومومىي كىرىمىنى قوشساق، ئۇنداقتا ئۇنىڭ بايلىقى پورتۇگالىيە بىلەن گرېتسىيەنىڭ ئوتتۇرىسىدا تۇرالايدىكەن (ئەڭ يېڭى GDP غا ئاساسلانغاندا). ۋېيفېڭ تورى ئىلگىرى ئېلان قىلغان بىر تۈرلۈك خەۋەردە دېيىلىشىچە، ئالما ئايفون كەسپىنىڭ 2015-يىللىق كىرىمى 155 مىليارد دوللار بولۇپ، بۇ S&P 500 كۆرسەتكۈچىسىدىكى بارلىق شىركەتلەردىن يۇقىرى تۇرىدىكەن، ھەتتا ئامازون، گۇگېلنىڭ ئانا شىركىتى ئالفابېت، مىكروسوفت ۋە فېيسبۇك قاتارلىق تېخنىكا ساھەسىدىكى گىگانت كارخانىلارنىڭ ھىچقايسىسى كىرىم جەھەتتە ئالما شىركىتىنىڭ ئايفون كەسپىگە تەڭلىشەلمەيدىكەن.

مالىيە دوكلاتىدىكى سان-سىپىرلارغا قارىغاندا، Mac ۋە iPad دىن ئىبارەت ئىككى مەھسۇلات لىنىيەسىنىڭ مال چىقىرىش مىقدارى تۆۋەنلەپ كەتكەن بولسىمۇ، ئەمما بۇ ئالما شىركىتىنىڭ كىرىمىگە تەسىر كۆرسەتمىگەن. كۇكنىڭ سۆزى بويىچە ئېيتقاندا، ئالما شىركىتىنىڭ بۇ پەسىلدىكى مالىيە دوكلاتى «ئالما تارىخىدىكى ئەڭ كۈچلۈك» نەتىجىنى نامايەن قىلىپ بەرگەن. ئۇنىڭ ئۈستىگە، ئالما شىركىتىنىڭ قولىدا 216 مىليارد دوللار نەق پۇل زاپىسى بار بولۇپ، بۇ پۇلغا كۆپ ساندىكى تېخنىكا شىركەتلىرىنى سېتىۋالالايدىكەن.