«خاررىي پوتتېر» فىلىملىرىدە سنەيپ مۇئەللىمنىڭ رولىنى ئالغان ئارتېس ئالان رىكمان راك كېسىلى سەۋەبلىك 69 يېشىدا ۋاپات بولدى

      ئەنگىلىيە «كۈندىلىك پوچتا گېزىتى»نىڭ 14-يانۋار خەۋەر قىلىشىچە، «خاررىي پوتتېر» فىلىملىرىدە سنەيپ مۇئەللىمنىڭ رولىنى ئالغان ئارتېس ئالان رىكمان راك كېسىلى سەۋەبلىك 69 يېشىدا ۋاپات بولغان، ئالان رىكماننىڭ ئائىلىسىدىكىلەر ئەنگىلىيە تاراتقۇلىرىغا رىكماننىڭ راك كېسىلى سەۋەبلىك ئەنگىلىيە ۋاقتى 14-يانۋار لوندوندا ئالەمدىن ئۆتكەنلىكىنى جەزملەشتۈردى.

      ئالان سىدنېي پاترىك رىكمان 1946-يىلى 2-ئاينىڭ 21--كۈنى لوندوننىڭ خەممىرسىمىزدا تۇغۇلغان بولۇپ، ئەنگىلىيە خانلىق سەنئەت تىياتىر ئىنىستىتۇتىنىڭ مۇئاۋىن رەئىسى، تىياتىر ئارتېسى، تېلېۋىزىيە ئارتېسى، كىنو ئارتېسى، رېژىسسور، سىنارىيە يازغۇچىسى، باشقۇرغۇچى، ئاۋاز بەرگۈچى. ئەنگىلىيەدىكى ئەڭ تالانتلىق تىياتېر ئارتېسى ۋە كىنو ئارتېسلىرىنىڭ بىرى. 1991-يىلى «ھەقىقىي، ئەسەبىي، چوڭقۇر» ناملىق كىنودا رول ئېلىپ، تۇنجى قېتىم ئەنگىلىيە كىنو ئىنىستىتۇتى مۇكاپاتىنىڭ ئەڭ نادىر ئەر ئارتېس نامزاتى بولغان. 1995-يىلى «ئەقىل ۋە ھېسسىيات» ناملىق كىنودا براندون پولكوۋنىڭنىڭ رولىنى ئېلىپ، خەلقئارا كىنو سەھنىسىدە كىشىلەرنىڭ دىققىتىنى تارتقان. 2000-يىلىدىن باشلاپ «خاررىي پوتتېر» فىلىملىرىدە سىرلىق ھەم مەيۈس سېۋېرۇس سنەيپ مۇئەللىمنىڭ رولىنى ئېلىپ، كىشىلەرگە كەڭ تونۇلغان.