سونىي 2016-يىللىق CES يەرمەنكىسىدە گەرچە يېڭى يانفون ئېلان قىلمىغان بولسىمۇ، ئەمما ئۇنىڭ يېڭى نۇسخىدىكى يانفونى ئۇزۇنغا قالماي بازارغا سېلىنىشى مۇمكىن ئىكەن. تۈنۈگۈن، بىر تورداش ئۈندىداردا سونىي ماركىسىدىكى بىر سىرلىق يانفوننىڭ ئوغۇرلۇقچە تارتىلغان سۈرەتلىرىنى ئاشكارىلىغان، بۇ يانفونغا ئادەتتىكىدىن چوڭراق ئېكران سەپلەنگەن، رامكىسى دەرىجىدىن تاشقىرى تار لايىھەلەنگەن بولۇپ، Xperia C6 Ultra دەپ ئىسىم قويۇلىدىكەن. ئۇندىن باشقا، بۇ ئاساسلىقى ئوتتۇرا دەرىجىلىك ئىستېمال بازىرىنى نىشانلىغان يانفون بولۇپ، كېلەر ئاينىڭ ئاخىرى ئېچىلىدىغان MWC چوڭ يىغىنى مەزگىلىدە رەسمىي ئېلان قىلىنىدىكەن.

       سۈرەتكە قارىغاندا، بۇ يېڭى يانفون ئەتىرگۈل ئالتۇن رەڭلىك نۇسخىدا لايىھەلەنگەن بولۇپ، سىرتقى شەكلى سونىي ئىلگىرى بازارغا سالغان Xperia C5 Ultra بىلەن ئاز-تولا ئوخشىشىپ قالىدىكەن، شۇڭا، كىشىلەر بۇ يانفوننىڭ ئىسمى Xperia C6 Ultra بولۇشى مۇمكىن دېگەن.

      ئەپسۇسلىنارلىقى، ئۈندىداردا تارقالغان ئۇچۇردا بۇ يانفوننىڭ باشقا جەھەتتىكى تەپسىلاتى تىلغا ئېلىنمىغان. بەزىلەر بۇ يانفونغا ئەسلى ھالەتتىكى ئاندىرويىد سىستېمىسى قاچىلانغانلىقىغا ئاساسلىنىپ تۇرۇپ، ئۇنىڭ پات-ئارىدا ئېلان قىلىنمايدىغانلىقى، ئەڭ بالدۇر بولغاندىمۇ كېلەر ئاينىڭ ئاخىرى ئېچىلىدىغان MWC چوڭ يىغىنىدا ئاندىن ئۆزىنى ئاشكارىلايدىغانلىقىنى قىياس قىلغان.

      تىلغا ئېلىشقا ئەرزىيدىغىنى، دائىم ئىشەنچلىك ئۇچۇرلارنى ئاشكارىلايدىغان upleaks ئىسىملىك مىكرو بىلوگ ئابونتى سونىينىڭ بۇ يېڭى يانفونى ھەققىدە توختىلىپ، بۇ يانفوننىڭ ئىچكى قىسىمدا «Ukelele» دەپ ئاتىلىدىغانلىقى، ئۇنىڭغا لىيەنفاكې MT6755 تىپلىق بىر تەرەپ قىلغۇچ سەپلىنىدىغانلىقىنى تىلغا ئالغان. ئەگەر راستىنلا شۇنداق بولسا، ئۇنداقتا Xperia C6 بارلىق تورنى قوللاش ئىقتىدارىغا ئىگە بولىدىكەن. MT6755 بولسا لىيەنفاكې شىركىتى يېڭىدىن تەتقىق قىلىپ چىققان Helio P10 ناملىق بىر تەرەپ قىلغۇچ بولۇپ، ھازىر كۆلەملىك ئىشلەپچىقىرىش باسقۇچىغا كىرىپ بولغانىكەن. بۇ بىر تەرەپ قىلغۇچ +28nm HPC ھۈنەر-سەنئىتى بويىچە ياسالغان بولۇپ، ئېنېرگىيە سەرپىياتى بىر قەدەر تۆۋەن ئىكەن.