قىزىلمۇچ پىششىقلاپ ئىشلەش زاۋۇتىنىڭ ئىشچىسى ليۇ ئەپەندى مۇنداق دېدى: ۋەقە يۈز بەرگەن بۇ ئاپتوموبىل خېنەندىن چېڭدۇغا مال توشۇيدۇ. ماشىنىغا 900 تاغاردىن ئارتۇق قىزىلمۇچ بېسىلغان، بۇ زاۋۇت 400 نەچچە تاغار قىزىلمۇچ زاكاس قىلغان. 9–چىسلا چۈشتىن بۇرۇن سائەت يەتتىلەر ئەتراپىدا، يۈك ئاپتوموبىلى ئامبارنىڭ ئالدىغا كېلىپ، سەككىزدىن 40 مىنۇت ئۆتكەنلەردە شوپۇر يۈك چۈشۈرۈشكە تەمشەلگەن. ئەينى ۋاقىتتا مەن ئامبار ئالدىدا ئۇنى ساقلاپ تۇرغان، ئۇ مال چۈشۈرمەي تۇرۇپلا، ئۆڭسۈلى ئۆچكىنىچە ئالدىمغا يۈگۈرۈپ كېلىپ، «چاتاق بولدى، ماشىنا ئۈستىدە بىر ئادەمنىڭ جەسىتى تۇرىدۇ، دېلو مەلۇم قىلايلى، دېدى». شوپۇر دېلو مەلۇم قىلغاندىن كېيىن، ساقچىلار شۇ ھامان نەق مەيدانغا يېتىپ كېلىشتى.    ليۇ ئەپەندى ئەھۋالنى تونۇشتۇرۇپ مۇنداق دېدى، بۇ ئەر بايقالغان ۋاقىتتا قىزىلمۇچ قاچىلانغان تاغارنىڭ ئۈستىدە يېتىپ قالغان، يېنىدا ھېچقانداق ئالاھىدە نەرسىلەر يوق. بۇ ئەر زادى قانداق ئۆلۈپ كەتتى؟ ئەتراپتىكى كىشىلەر بەس بەستە مۇنازىرە قىلىشتى، «ماشىنىدىكى تاغاردىن ئون نەچچىسى كەم تۇرىدۇ، بۇ چوقۇم بىر ئوغرى».

   ليۇ ئەپەندىنىڭ سىچۈەن ئاخبارات تورى مۇخبىرىغا دەلىللەپ بېرىشىچە، ئاپتوموبىلدا ھەقىقەتەن ئون نەچچە خالتا قىزىلمۇچ كەملەپ كەتكەن. ئۇ بۇرۇن ئاشۇ مال ئەۋەتكەن جايغا كوماندروپكىغا چىقىپ باققان. ئۇ يەردە ھەقىقەتەنمۇ ئالدىنئالا ئاپتوموبىلغا مۆكۈۋېلىش، ئاندىن بىر نەرسە ئوغرىلاش ئەھۋاللىرى مەۋجۇت ئىكەن. 9–چىسلا چۈشتىن كېيىن، قىزىلمۇچ زاۋۇتى ئىشچىلىرىنىڭ يېتەكلىشى بىلەن، مۇخبىر ئامبار ئەتراپىدىكى ماشىنا توختىتىش مەيدانىدا ھېلىقى ۋەقە چىققان ئاپتوموبىلنى كۆردى. ئاپتوموبىلدىكى قىزىلمۈچ تېخى چۈشۈرۈلمىگەن، ھېلىھەم رەخت بىلەن يېپىپ قويۇلغان، قارىماققا بۇ ئاپتوموبىلدا ھېچقانداق مەسىلە يوقتەك.

   سىچۈەن ئاخبارات تورى مۇخبىرىنىڭ جىنيۈ رايونلۇق ساقچى تەرەپتىن ئېگىلىشىچە، بۈگۈن چۈشتىن بۇرۇن ساقچىلار ئادەم ئۆلگەنلىكىگە دائىر بىر پارچە دېلو مەلۇماتى تاپشۇرۇپ ئالغان، ساقچىلار ھازىر بۇ دېلونى تەكشۈرۈۋېتىپتۇ.