1-ئاينىڭ 3-كۈنى خەۋىرى: سەنشى شاڭلودىكى 62 ياشلىق فاڭ ئۇستام باشقىلار تەرىپىدىن قەستكە ئۇچراپ ئۆلتۈرۈلگەندىن كېيىن، قاتىل فاڭ ئۇستامنىڭ جەسىتىنى ئۆيىنىڭ كەينىدىكى گەندە كۆلچىكىگە تاشلىۋەتكەن، مەزكۇر دېلودىكى قاتىل بولسا كەنت دوختۇرى-شۈ فامىلىلىكنىڭ كىچىك ئوغلى بولۇپ، نۆۋەتتە قاتىل شاڭلو ساقچىلىرى تەرىپىدىن قولغا ئېلىنغان، لېكىن ئىگەللىنىلىشىچە، مەزكۇر دېلودىكى قاتىلنىڭ ھەقىقەتەن روھىي كېسىلى بار ئىكەن.

    سەنشى ئۆلكىسى شاڭلو شەھىرى شاڭجۇ رايونىدا ئولتۇرۇشلۇق فاڭ ئۇستام يېقىنقى ئىككى كۈندىن بېرى ئىزچىل ھالدا ئۆيىدىكى ئاشلىقلارنى يېيىپ قۇرۇتۇش ئىشى بىلەن ئالدىراش بولۇپ كەلگەن، لېكىن نەچچە كۈن ئىلگىرى، فاڭ ئۇستام ئۆزلىرىنىڭ ھويلىسى ئالدىدا يوقاپ كەتكەن. ئۆلگۈچىنىڭ كۈيئوغلى مۇنداق دېدى:‹شۇ كۈنى دادام ئۆشنىسىگە ئاشلىق سېۋىتى يۈدىگەن ھالدا ئۆيدىن ئاشلىق يېيىپ قۇرۇتقىلى چىقىپ كەتكەن پېتى قايتىپ كەلمىدى›. ‹مەركىزىي شەھەر گېزىتى› مۇخبىرىنىڭ ئەھۋال ئىگەللىشىچە، فاڭ ئۇستاملارنىڭ ئۆيى بىلەن ئاشلىق يېيىپ قۇرۇتىدىغان مەيداننىڭ ئارلىقى پىيادە ماڭغاندا ئارانلا بەش مىنۇتلۇق يول بولۇپ، بوۋاينىڭ بىر كۈن يوقاپ كېتىشى ھەقىقەتەن نورمالسىز ئەھۋال ئىدى. فاڭ ئۇستام ئادەتتە ئۆيىدە يالغۇز تۇرىدىغان بولۇپ، فاڭ ئۇستامنىڭ دېلو يۈز بەرگەن كۈنى چۈشتە ئۆيگە تاماققا قايتىپ كەلمەسلىكى ئۇنىڭ ئاكىسىنىڭ گۇمانىنى قوزغاپ قويغان.

     ئۆلگۈچىنىڭ ئاكىسى مۇنداق دېدى:‹مەن ئىنىمنى بىر كۈن ئىزدەپمۇ ھېچيەردىن تاپالمىدىم، پەقەت ئۇنىڭ ئەتىگەندە ئۆشنىسىگە ئارتىپ چىقىپ كەتكەن سېۋىتىنىلا تاپالىدىم›. ئۆلگۈچىنىڭ ئاكىسىنىڭ مۇخبىرغا ئېيتىشىچە، ئۇ شۇ كۈنى فاڭ ئۇستامنى يېقىن ئەتراپتىن ھەر قانچە ئىزدەپمۇ تاپالمىغان. بۇنىڭدىن بىرەر شۇملۇقنى سەزگەن تۇغقانلار خاتىرجەمسىزلىنىشكە باشلىغان ھەم دەرھال پۈتۈن كەنتتىكىلەرنى سەپەرۋەرلىككە كەلتۈرۈپ فاڭ ئۇستامنى ئىزدەشكە باشلىغان، كۆپچىلىك فاڭ ئۇستامنىڭ سېۋىتى بايقالغان جايدىن ئون مېتىر نېرىسىدا يىپ ئۇچىنى بايقاپ قالغان.

     ئۆلگۈچىنىڭ ئاكىسى مۇنداق دېدى:‹ئەينى چاغدا بۇ يەرگە كېلىپ قولۇمدىكى ئېلىكتىر بىلەن يورۇتۇپ قارىغاندىن كېيىن يەردە بىر پارچە قان دېغىنىڭ تۇرغانلىقىنى بايقاپ قالدىم، تام تۈۋىدە يەنە ئىنىم چېكىدىغان تاماكىنى بايقىدۇق›. قان دېغى بايقالغان جاي دەل شۈ فامىلىلىك كەنت دوختۇرىنىڭ ئۆيى بولۇپ، كۆپچىلىك قان دېغىنى بويلاپ ئىزدەش ئارقىلىق ھويلىنىڭ ئارقا تەرىپىدىن ئاللىقاچان قەستكە ئۇچراپ قازا قىلغان فاڭ ئۇستامنى بايقىغان. ئۆلگۈچىنىڭ قىزى مۇنداق دېدى:‹قاتىل قولىغا ناھايىتى توم تاياقنى ئېلىپ دادامنىڭ بېشىغا كۈچەپ بىرنى ساپتۇ، دادامنىڭ بېشىمۇ يېرىلىپ، مېڭىسى چۇۋۇلۇپ كېتىپتۇ›.

    ‹مەركىزىي شەھەر گېزىتى› مۇخبىرىنىڭ ئەھۋال ئىگەللىشىچە، 62 ياشلىق فاڭ ئۇستام قەستكە ئۇچراپ ئۆلگەندىن كېيىن، قاتىل فاڭ ئۇستامنىڭ جەسىتىنى ئۆزلىرىنىڭ ھويلىسىنىڭ ئارقىسىدىكى گەندە كۆلچىكىگە تاشلىۋەتكەن بولۇپ، مەزكۇر دېلودىكى قاتىل بولسا كەنت دوختۇرى-شۈ فامىلىلىكنىڭ كىچىك ئوغلى ئىدى، نۆۋەتتە قاتىل شاڭلو ساقچىلىرى تەرىپىدىن قولغا ئېلىنغان بولۇپ، لېكىن  ئىگەللىنىلىشىچە، مەزكۇر دېلودىكى قاتىلنىڭ ھەقىقەتەن روھىي كېسىلى بار  ئىكەن.