چاۋشيەن مەركىزىي ئاخبارات ئاگېنتلىقىنىڭ 30-دېكابىردىكى خەۋىرىگە قارىغاندا، چاۋشيەن ئەمگەك پارتىيەسى مەركىزىي سىياسىي ئىدارىسىنىڭ ئەزاسى، چاۋشيەن ئالىي خەلق يىغىنىنىڭ ۋەكىلى، پارتىيە مەركىزىي كومىتېتىنىڭ شۇجىسى، بىرلىكسەپ بۆلۈمىنىڭ باشلىقى كىم ياڭگۇەن 29-دېكابىر سائەت 6:15 لەردە قاتناش ۋەقەسى سەۋەبىدىن 73 يېشىدا قازا قىلغان. چاۋشيەندە 31 –دېكابىر كىم ياڭگۇەن ئۈچۈن دۆلەتلىك دەپنە مۇراسىمى ئۆتكۈزۈلىدىكەن. چاۋشيەننىڭ ئالىي رەھبىرى كىم جۇڭئۇن دۆلەتلىك دەپنە كومىتېتىنىڭ باشلىقلىلىغا تەيىنلەنگەن.   خەۋەردە دېيىلىشىچە، كىم ياڭگۇەن كىم ئېرسېن بىلەن كىم جۇڭئىلنىڭ ساداقەتمەن ئىنقىلابىي جەڭچىسى بولۇپ، كىم جۇڭئۇننىڭ ئەڭ يېقىن دوستى، ئەڭ ئىشەنچلىك ئىنقىلابىي يولداش ئىكەن. كىم ياڭگۇەن بىرلىكسەپ بۆلۈمىنىڭ باشلىقى، پارتىيە مەركىزىي كومىتېتىنىڭ شۇجىسى بولۇش سۈپىتى بىلەن، ئېغىر ۋەزىپىنى زىممىسىگە ئېلىپ، چاۋشيەننىڭ تەرەققىياتى ئۈچۈن ئۈن-تىنسىز تۆھپە قوشقان. كىم ياڭگۇەننىڭ قازا قىلىشى چاۋشيەن ئەمگەك پارتىيەسى ۋە خەلقى ئۈچۈن غايەت زور يوقىتىش ھېسابلىنىدۇ.

     كىم ياڭگۇەن 1942-يىلى بىر نامرات ئائىلىدە تۇغۇلغان، كىم ئېرسېن ئۇنىۋېرسال ئۇنىۋېرسىتېتىنى پۈتكۈزگەن. 1997-يىلى، پارتىيە مەركىزىي كومىتېتى خەلقئارا بۆلۈمىنىڭ باشلىقى بولغان. 2007-يىلى، پارتىيە مەركىزىي كومىتېتى بىرلىكسەپ بۆلۈمىنىڭ باشلىقى بولغان. 2010-يىلى، پارتىيە مەركىزىي كومىتېتىنىڭ شۇجىلىقىغا، قوشۇمچە بىرلىكسەپ بۆلۈمىنىڭ باشلىقلىقىغا، پارتىيە مەركىزىي كومىتېتى سىياسىي ئىدارىسىنىڭ كاندىدات ئەزالىقىغا تەيىنلەنگەن. 2015-يىلى 2-ئايدا، پارتىيە مەركىزىي كومىتېتى سىياسىي ئىدارىسىنىڭ ئەزالىقىغا تەيىنلەنگەن. كىم ياڭگۇەن چاۋشيەندىكى ئالىي شەرەپ ئوردېنى ‹‹كىم ئېرسېن ئوردېنى›› ۋە ‹‹كىم جۇڭئىل ئوردېنى››غا ئېرىشكەن.