يېقىندا ئامېرىكىنىڭ چاۋشيەنگە قاراتقان ئىقتىسادى جازانى كۈچەيتكەنلىكى ھەمدە بىرلەشكەن دۆلەتلەر تەشكىلاتىنىڭ چاۋشيەننىڭ كىشىلىك ھوقۇق مەسىلىسىنى تەنقىد قىلغانلىقى توغرىسىدا، چاۋشيەن يەنە بىر قېتىم ئاگاھلاندۇرۇش بەردى. چاۋشيەن مەركىزى ئاگېنتلىقى 19-دېكابىر بايانات ئېلان قىلىپ مۇنۇلارنى بىلدۈرۈپ: چاۋشيەن ئاللىقاچان ئامېرىكا تۇپرىقىغا توغرا زەربە بېرەلەيدىغان ئىقتىدارغا ئىگە بولدى، دېدى. ئامېرىكا گوۋۇيۈەنىنىڭ ئەمەلدارى شۇ كۈنى مۇنۇلارنى بىلدۈرۈپ: چاۋشيەن پەقەت يادرو قورالى ياساش پىلانىدىن ۋاز كەچسىلا، بىز بارلىق ساھەلەردە چاۋشيەن بىلەن سۆھبەتلىشىشكە رازى، دېدى.  چاۋشيەن مەركىزى ئاگېنتلىقى 19-دېكابىر مۇنداق دېدى: چاۋشيەننىڭ ئالدى بىلەن ئارمىيەنى تەرەققىي قىلدۇرۇش ۋە كۈچلۈك بولغان ئۆزىنى قوغداش ئىقتىدارىگە ئىگە يادرو قورال كۈچى سىستېمىسىنى قۇرۇپ چىقىش يولى ئىنتايىن توغرا. ئامېرىكىنىڭ يادرو قورال جەھەتتىن تەھدىت سېلىشى چاۋشيەننى ئۆزىنى قوغداش ئۈچۈن يادرو قورال ياساپ چىقىشقا مەجبۇر قىلدى، غالجىرانە باشقۇرۇلىدىغان يادرو بومبا تەھدىتى چاۋشيەننىڭ ئىستراتېگىيەلىك ئۇرۇش تاكتىكىسىغا ئىگە كۈچلۈك زەربە بېرىش قورالىنى سەپلەشكە ئىلھاملاندۇردى. ئامېرىكىنىڭ چاۋشيەنگە ئالدى بىلەن زەربە بېرىش پىلانى ناھايىتى بۇرۇنلا يولغا قويۇلغان. ئامېرىكا «جەڭ پىلانى 5029» «جەڭ پىلانى 5030» قاتارلىق ھەرخىل تىپتىكى چاۋشيەنگە قارشى جەڭ پىلانلىرىنى تۈزۈپ چىقتى ۋە ھەمدە ئامېرىكا نەچچە 10 يىلدىن بۇيان ھەر يىلى «ھالقىلىق قارار»، «تاز قاغا»، «ئەركىن قوغدىغۇچىلار» قاتارلىق شەكلى ئۆزگەرگەن لېكىن خاراكتېرى ئۆزگەرمىگەن بىرلەشمە ھەربىي مانېۋىرلارنى ئېلىپ باردى. ھەتتا، ئامېرىكا چاۋشيەننى «قەبىھلىكنىڭ مەركىزى» تىزىملىكىدىن ئالدى بىلەن يادرو زەربىسى بېرىش تىزىملىكىگە كىرگۈزدى، ئامېرىكىنىڭ بۇ قىلمىشلىرى چاۋشيەنگە بولغان دۈشمەنلىك غەرزىنىڭ ئۆزگەرمىگەنلىكىنى بىلدۈرىدۇ.

    ئامېرىكا ئاقساراي دۆلەت خەۋپسىزلىك كومىتېتىنىڭ ئاسىيا ئىشلىرىغا مەسئۇل ئەمەلدارى كاندا مۇنداق دېدى: ئەگەر چاۋشيەن يادرو پىلانىدىن ۋاز كېچىش جەھەتتە سەمىمىيىتىنى ئىپادىلىسە، ئۇ ھالدا بىز بارلىق ساھەلەردە چاۋشيەن بىلەن سۆھبەتلىشىشكە رازى. ئامېرىكا تەرەپنىڭ يېقىندىكى ھەرىكەتلىرى پەقەتلا چاۋشيەننىڭ يادرو قورالىغا ئىگە بولۇش ئىمكانىيىتىنى چەكلەش ئۈچۈنلا خالاس، ئامېرىكا چاۋشيەن رەھبەرلىرىگە شۇنى بىلدۈرۈپ قويماقچى يەنى يادرو قورالىدىن ۋاز كېچىش چاۋشيەننىڭ بىردىنبىر تاللىشى.

     ئامېرىكا دۆلەت ئىشلىرى كاتىپى كېررىنىڭ ب د ت نىڭ يىغىنىدا چاۋشيەننىڭ كىشىلىك ھوقۇققا خىلاپلىق قىلغانلىق قارارىنى ماقۇللۇقتىن ئۆتكۈزگەنلىكىنى قارشى ئالغانلىقىغا قارتا، چاۋشيەن تاراتقۇلىرى مۇنداق دېدى: ئەگەر كېررىنىڭ ئىككى پۇتى يەنىلا ساق بولسا، قارىغۇ ياكى گاس بولۇپ قالمىغان بولسا، ئۇ ھالدا ئۆزى چاۋشيەنگە كېلىپ كىشىلىك ھوقۇق ئەھۋالىنى ئۆز كۆزى بىلەن كۆرۈپ باقسۇن.