ئاۋستىرالىيە تاراتقۇلىرىنىڭ خەۋەر قىلىشىچە، بىرلەشكەن دۆلەتلەر تەشكىلاتى يېقىندا «ئىنسانلار تەرەققىيات كۆرسەتكۈچى دوكلاتى»نى ئېلان قىلغان بولۇپ، دوكلاتتا دۇنيادىكى 188 دۆلەت ۋە رايوننىڭ ئىقتىسادىي، مائارىپى ۋە كىشىلەرنىڭ ئوتتۇرىچە ئۆمرى قاتارلىقلارغا قارىتا باھالاش ئېلىپ بېرىلغان ۋە رەتكە تىزىپ چىقىلغان. بۇ رەت-تەرتىپتە ئاۋستىرالىيە شىمالىي ياۋروپادىكى نورۋېگىيەدىن قالسىلا دۇنيا بويىچە 2-ئورۇندا تۇرغان.  خەۋەردە ئېيتىلىشىچە، ئاۋستىرالىيەنىڭ تەرەققىيات كۆرسەتكۈچى 0.935 نومۇر بولغان بولۇپ، تولۇق نومۇر بىر نومۇر قىلىپ بېكىتىلگەن. رەت-تەرتىپىدە نورۋېگىيە 1-ئورۇندا، شىۋىتسارىيە 3-ئورۇندا تۇرغان.

    بىرلەشكەن دۆلەتلەر تەشكىلاتىنىڭ ئالاقىدار ئەمەلدارىنىڭ بىلدۈرۈشىچە، ئىنسانلار تەرەققىيات كۆرسەتكۈچى ئۈچ تۈرلۈك ئەڭ ئاساسىي تەرەققىيات ئامىلىنى ئاساس قىلىپ تۇرۇپ ئۆلچىنىدىغان بولۇپ، بۇ ئۈچ ئامىل ئايرىم-ئايرىم شۇ دۆلەت كىشىلىرىنىڭ ئوتتۇرىچە ئۆمرى، مائارىپتىن بەھرىمەن بولۇش دەرىجىسى ۋە ئاھالىلەرنىڭ ئوتتۇرىچە كىرىمى قاتارلىقلاردىن ئىبارەت بولغان.

    دوكلاتتا ئېيتىلىشىچە، ئاۋستىرالىيىكلەرنىڭ ئوتتۇرىچە يېشى 82.5 ياش، كىشىلەرنىڭ ئوتتۇرىچە مائارىپتىن بەھرىمەن بولۇش ۋاقتى 13 يىل، كىشى بېشىغا توغرا كەلگەن يىللىق كىرىمى 58 مىڭ 618 ئاۋستىرالىيە دوللىرى بولغان. دىققەت قىلىشقا ئەرزىيدىغىنى شۇكى ئاۋستىرالىيە ئاياللىرىنىڭ ئوتتۇرىچە ئەرلەرنىڭ ئوتتۇرىچە يېشىدىن تۆت ياش يۇقىرى بولغان بولۇپ، مائارىپتىن بەھرىمەن بولۇش ۋاقتىمۇ ئەرلەرنىڭكىدىن ئۇزۇن بولغان. لىكىن ئاۋستىرالىيە ئەرلىرىنىڭ يىللىق ئوتتۇرىچە كىرىمى 70 مىڭ 620 ئاۋستىرالىيە دوللىرى بولغان، ئاياللارنىڭ يىللىق ئوتتۇرىچە كىرىمى بولسا ئارانلا 46 مىڭ 727 ئاۋستىرالىيە دوللىرى بولغان.

     ئاۋستىرالىيەگە سېلىشتۇرغاندا، 1-ئورۇندا تۇرغان نورۋېگىيەدە كىشىلەرنىڭ ئوتتۇرىچە يېشى 81.6 ياش بولۇپ ئاۋستىرالىيىدىن سەل تۆۋەن تۇرغان، كىشىلەرنىڭ ئوتتۇرىچە مائارىپتىن بەھرىمەن بولۇش ۋاقتىمۇ 12.6 ياش بولۇپ ئاۋستىرالىيەدىن سەل تۆۋەن بولغان، لېكىن نورۋېگىيەلىكلەرنىڭ كىشى بېشىغا توغرا كەلگەن ئوتتۇرىچە كىرىمى 64 مىڭ 992 ئامېرىكا دوللىرى (90مىڭ 148 ئاۋستىرالىيە دوللىرى) بولغان.

    دوكلاتتا ئېيتىلىشىچە، ئاۋستىرالىيەنىڭ ئىنسانلار تەرەققىيات كۆرسەتكۈچى 1990-يىلىدىن بۇيان مۇقىم قەدەمدە ئېشىۋاتقان بولۇپ، 2014-يىلىغا قەدەر جەمئىي 0.32 نومۇر ئاشقان. ئۇنىڭغا سېلىشتۇرغاندا قوشنا دۆلەت يېڭى زىنلاندىيەنىڭ ئىپادىسى ئانچە ياخشى بولمىغان بولۇپ، بۇلتۇرقى 7-ئورۇندىن بۇ يىل 9-ئورۇنغا چۈشۈپ قالغان. ئامېرىكىنىڭ بۇ يىللىق رەت-تەرتىپى 8-ئورۇندا، ئەنگلىيەنىڭ بولسا 14-ئورۇندا تۇرۇپ شىۋىتسىيە بىلەن بىر قاتارغا تىزىلغان.

    بىرلەشكەن دۆلەتلەر تەشكىلاتى تەرەققىيات پىلان كومىتىتىنىڭ مەسئۇلى كېلارك مۇنداق دېگەن: «بۇ يىللىق ئىنسانلار تەرەققىيات كۆرسەتكۈچى پۈتۈن دۇنياغا بىر جەڭ ئېلان قىلىش بولدى، ئۇ ھەرقايسى دۆلەتلەرگە قانداق قىلىپ خەلقنىڭ تۇرمۇش سۈپىتىنى يۇقىرى كۆتۈرۈش، قانداق قىلىپ ئۇلانىڭ مۇقىم خىزمەتكە ئىگە قىلىشنى كۆرسىتىپ بەردى. بىزنىڭ تۇرمۇش مۇھىتىمىز تېز سۈرئەتتە ئۆزگەرمەكتە، مەسىلە دەل بىزنىڭ قانداق قىلىپ بۇ ئۆزگىرىشكە ياخشى ماسلىشالىشىمىزدا بولۇپ قالدى.»