ۋېنسۇئېلادا ھۆكۈمەتكە قارشى نامايىش داۋاملاشماقتا

خەلقئارا لىنىيەسى خەۋىرى : 20-مارتقىچە ، ۋېنسۇئېلادا بىر ئايدىن بۇيان داۋاملىشىۋاتقان قالايمىقانچىلىقتا قازا قىلغانلارنىڭ سانى ئاز دېگەندە 31 غا يەتكەن ، 400 دىن ئارتۇق ئادەم يارىلانغان . ۋېنسۇئېلا ھۆكۈمىتى نامايىش ئەڭ كەسكىن ئېلىپ بېرىلغان رايوندا ئىككى نەپەر ئۆكتىچى شەھەر باشلىقىنى قولغا ئالغان .

ۋېنسۇئېلا باش تەپتىشىنىڭ شۇ جاي ۋاقتى 20-مارت بىلدۈرۈشىچە ، بۇ يىل 12-فېۋرالدىن باشلاپ دۆلەت ئىچىدە كۆپ قېتىم نامايىش پارتلاپ ، نامايىش سەۋەبلىك كېلىپ چىققان قالايمىقانچىلىقتا ئاز دېگەندە 31 ئادەم قازا قىلغان ، ئۇنىڭ ئىچىدە 25 ى ئادەتتىكى پۇقرا ، ئالتىسى بىخەتەرلىك خادىمى ياكى ھۆكۈمەت خىزمەتچىسى ئىكەن . ئۇنىڭدىن باشقا ، قالايمىقانچىلىقتا ئاز دېگەندىمۇ 461 ئادەم يارىلانغان . ئۇنىڭدىن باشقا 1854 ئادەم قولغا ئېلىنىپ ، ئەدلىيە تارماقلىرىنىڭ بىر تەرەپ قىلىشىغا تاپشۇرۇلغان .

12-فېۋرالدىن باشلاپ بۇ دۆلەتتىكى ئۆكتىچىلەر بىلەن ئوقۇغۇچىلار ھۆكۈمەتكە قارشى چوڭ كۆلەمدە نامايىش قوزغىغاندىن بۇيان ، ۋېنسۇئېلانىڭ ۋەزىيىتى قالايمىقانلىشىپ ، زوراۋانلىق ھەرىكەتلىرى كەينى-كەينىدىن يۈز بەرگەن . تەھلىل قىلىنىشىچە ، ۋېنسۇئېلادىكى نامايىشچىلارنىڭ ھەيۋىسى ھازىرقى ھۆكۈمەتنىڭ ھاكىميەت يۈرگۈزۈشىگە تەسىر كۆرسىتەلمىسىمۇ ، لېكىن ئۆكتىچىلەر ۋە ئۇلارنىڭ قوللىغۇچىلىرى قىسقا ۋاقىت ئىچىدە نامايىشنى توختاتمايدىغان بولغاچقا ، قالايمىقان ۋەزىيەت يەنە بىر مەزگىل داۋاملىشىشى مۇمكىنكەن .