فىرانسىيە تاراتقۇلىرىنىڭ خەۋىرىگە قارىغاندا، سۈرىيە ئۆكتىچى قوراللىق كۈچلىرى 12-ئاينىڭ 9-كۈنىدىن باشلاپ ئۇلارنىڭ خومىس شەھەر رايونىدىكى ئەڭ ئاخىرقى ئىستىھكامىدىن چېكىنىشكە باشلىغان بولۇپ، بۇ سۈرىيە ھۆكۈمەت ئارمىيەسىنىڭ بۇ دۆلەتنىڭ ئۈچىنچى چوڭ شەھىرىنى قايتىدىن كونترول قىلغانلىقىدىن دېرەك بىرىدۇ.  خەۋەردە دېيىلىشچە، ھۆكۈمەت ئارمىيەسىنىڭ نازارىتى ئاستىدا 2000 نەپەر ئۆكتىچى قوراللىق تەشكىلاتنىڭ خادىملىرى ۋە ئۇلارنىڭ ئائىلە تاۋابىئاتلىرى شەھەردىن چېكىنىپ چىققان، خومىس شەھىرى ئۆكتىچى كۈچلەر باش كۆتۈرگەندىن باشلاپ ئۇلارنىڭ «پايتەختى»گە ئايلانغان، ئىككى تەرەپ بۇ شەھەرنى تالىشىش ئۈچۈن ئۇدا ئۈچ يىل قاتتىق ئۇرۇش قىلغان. ئۆكتىچى كۈچلەر ئەڭ ئاخىرقى قېتىم بۇ شەھەرنى ئىشغال قىلىشتىن بۇرۇن بۇ شەھەردە 300 مىڭ ئاھالە بار بولۇپ، لېكىن ھازىر پەقەت 75 مىڭ ئادەملا قالغان.

      خومىس شەھىرىدە 2011-يىلى ھۆكۈمەتكە قارشى كەڭ كۆلەملىك نامايىش پارتلىغان چاغدا، ئۆكتىچى تەشكىلاتلار قولىغا قورال ئېلىپ نامايىشنى باستۇرۇشقا ئورۇنغان ھۆكۈمەت ئارمىيەسى بىلەن ئۇرۇش قىلغان ھەمدە بۇ شەھەرنى تارتىۋالغان.