6-دېكابىر قەھرىتان قىش مەزگىلى ھېسابلىنىدۇ، ئۈرۈمچى شەھىرىدە يولنىڭ ئىككى تەرىپىدىكى دەرەخلەرنىڭ يوپۇرماقلىرى ئاللىقاچان تۆكۈلۈپ بولىدۇ، لېكىن «13-نۆۋەتلىك مەملىكەتلىك قىشلىق تەنھەرىكەت مۇسابىقىسى» مەيدان-سارايلىرىنىڭ ئەتراپى يېشىللىققا چۆمگەن بولۇپ، شەمشاد ۋە ئارچىنىڭ ياپيېشىل شاخلىرىغا قار گۈللىرى قونۇپ، ئۆزگىچە گۈزەل مەنزىرىنى ھاسىل قىلدى.

       شەھەرلىك ئورمانچىلىق ئىدارىسى (باغ ئورمان باشقۇرۇش ئىدارىسى) پىلان ۋە قۇرۇلۇش باشقارمىسىنىڭ مۇئاۋىن باشلىقى لى زىجاڭ مۇنداق دېدى، قىش پەسلى تىلغا ئېلىنسىلا، كىشىلەر ئەڭ ئاۋۋال ئاق رەڭنى ئويلايدۇ، بۇ قېتىم «13-نۆۋەتلىك مەملىكەتلىك قىشلىق تەنھەرىكەت مۇسابىقىسى» مەيدان-سارايلىرى ئەتراپىنى كۆكەرتىشتە ئەسلىدىكى ئىدىيەدە بۆسۈش ھاسىل قىلىنىپ، كۆپ مىقداردا شەمشاد، ئارچا ۋە قىزىل مېۋىلىك كورنا تىكىلدى. شەمشاد، ئارچا يىل بويى ياشىرىپ تۇرىدۇ، قىش پەسلىدىمۇ يېشىللىقنى نامايان قىلىدۇ، قىزىل مېۋىلىك كورنا تۆت پەسىلنىڭ ھەممىسىدە قېنىق قىزىل رەڭدە بولۇپ، ئاپئاق قار بىلەن قوشۇلغاندا ئۈنۈمى تېخىمۇ ياخشى بولىدۇ.

      ئىگىلىنىشىچە، كۆكەرتىش بەلبېغىدا يەنە مەخسۇس مۇز ھەيكەل ئورنى قويۇلغان بولۇپ، تېمپېراتۇرا تېخىمۇ تۆۋەنلىگەندە باش تېمىلىق مۇز ھەيكەللەرنى ياساشقا بولىدىكەن.

     13-نۆۋەتلىك مەملىكەتلىك قىشلىق تەنھەرىكەت مۇسابىقىسى مۇز ئۈستى تەنتەربىيە مەركىزىنىڭ كۆكەرتىش مەنزىرە قۇرۇلۇشىغا 20 مىليون 38 مىڭ يۈەندىن ئارتۇق مەبلەغ سېلىنغان بولۇپ، كۆكەرتىش ئومۇمىي كۆلىمى 13.33 گېكتارغا يەتكەن.(تامام)