خۇاچىياڭ ئېلېكترون كەسپى تەتقىقات ئورنى يانفون ۋە ئېلېكترون كەسپى ئانالىزچىسى فەن جىيۇتاڭنىڭ مۆلچەرلىشىچە، كېلەر يىلىدىن باشلاپ ئىچكى ساقلىغۇچ سىغىمى 6GB ھەتتا 8GB بولغان يانفونلار ئوتتۇرىغا چىقىشقا باشلايدىغان بولۇپ، بۇ جەھەتتە قىسىم كومپيۇتېرلارنى بېسىپ چۈشىدىكەن. يېڭى ئۇچۇرغا قارىغاندا، مەلۇم بىر چەتئەل كارخانىسى يىقىندا 8GB لىق ئىچكى ساقلىغۇچ ئىشلىتىلگەن يانفوننى ئېلان قىلىشقا تەييارلىنىۋاتقان بولۇپ، بۇ يانفون يەنە Windows 10 سىستېمىسىنىمۇ قوللايدىكەن.

       Nurve Technologiesناملىق بۇ شىركەتنىڭ ئەڭ يېڭى مەھسۇلاتى بولغان SyncPhone يانفونى يىقىندا indiegogo سۇپىسىدا مەبلەغ توپلاشنى باشلىغان، بۇ يانفون «دۇنيا بويىچە ئىقتىدارى ئەڭ تولۇق يانفون» دەپ تەرىپلەنگەن.

ئىگەللىنىشىچە، بۇ يانفوننىڭ ئۈچ خىل نۇسخىسى بولۇپ، 4GB لىق ئىچكى ساقلىغۇچ ئىشلىتىلگەن SyncPhone ۋە SyncPhone S نۇسخىسى شۇنداقلا 8GB لىق ئىچكى ساقلىغۇچ ئىشلىتىلگەن SyncPhone Pro ناملىق نۇسخىسىنى ئۆز ئىچىگە ئالىدىكەن، باھاسى ئايرىم-ئايرىم ھالدا 199، 299 ۋە 499 دوللار ئىكەن.

      بۇنىڭ ئىچىدە، SyncPhone、SyncPhone S يانفونلىرىغا ئىنتېل Atom X5-Z8300、Z8500 بىر تەرەپ قىلغۇچىسى سەپلەنگەن، SyncPhone Pro گە بولسا Atom X7-Z8700 تىپلىق بىر تەرەپ قىلغۇچ سەپلەنگەن. كامېرا ئېنىقلىقى 20 مىليون بولۇپ، ساقلىغۇچ سىغىمى 128GB گە يېتىدىكەن، micro SD كارتىسىنى قوللايدىكەن. ئۈچ خىل نۇسخىسىنىڭ ھەممىسىگە 5.4 دىيۇملۇق ئېكران ئىشلىتىلگەن بولۇپ، قوش كارتىنى تەڭ قوللايدىكەن. ئۇندىن باشقا، بۇ يانفونلارنىڭ ئاساس گەۋدىسى ئاليۇمىن قېتىشمىسىنى ماتىرىيال قىلغان بولۇپ، چەكمە قەلەممۇ سەپلەنگەن. ئەڭ يارقىن نۇقتىسىغا كەلسەك، ئاندىرويىدتىن باشقا، يەنە ئۈستەل يۈزى نۇسخىسىدىكى Windows 10 سىستېمىسى (Win10 Mobile ئەمەس) نىمۇ قوللايىدىكەن.

     مەسىلە شۇكى، 5.4 دىيۇملۇق ئېكران سەپلەنگەن يانفونغا Windows 10 سىستېمىسىنى قاچىلاشنىڭ زادى ئەھمىيىتى بارمۇ-يوق؟ ئاڭلاشلارغا قارىغاندا، مەبلەغ توپلاش مۇۋەپپەقىيەتلىك بولسا، ئۇنداقتا بۇ يانفون كېلەر يىلى 2-ئايدا رەسمىي مال چىقىرىشنى باشلايدىكەن.