شەھىرىمىز 2015 - يىللىق كەپە ئۆي مەھەللىلىرىنى ئۆزگەرتىش ۋەزىپىسىنى پىلاندىن ئاشۇرۇپ ئورۇنداپ بولدى. شەھىرىمىزنىڭ بۇ يىللىق كەپە ئۆي مەھەللىلىرىنى ئۆزگەرتىش پىلانىدا 6000 يۈرۈش ئۆي قۇرۇلۇشىدا ئىش باشلاش پىلانلانغان بولۇپ، ئەمەلىيەتتە 7180 يۈرۈش ئۆي قۇرۇلۇشىدا ئىش باشلانغان.    مۇخبىرنىڭ شەھەرلىك كەپە ئۆي مەھەللىلىرىنى ئۆزگەرتىش ئىشخانىسىدىن ئىگىلىشىچە، شەھىرىمىز بۇ يىل كەپە ئۆي مەھەللىلىرىنى ئۆزگەرتىش پىلانى بويىچە كۆلىمى 600 مىڭ كىۋادرات مېتىردىن ئاشىدىغان 6000 يۈرۈش ئۆي سېلىشنى پىلانلىغان بولۇپ، ئەمەلىيەتتە ئىش باشلاش جەھەتتە ۋەزىپە %119.67 ئورۇندالغان. قۇرۇلۇش كۆلىمى 869 مىڭ 400 كىۋادرات مېتىرغا يېتىپ، يىللىق ئىش باشلانغان قۇرۇلۇش كۆلىمى پىلانىنىڭ %144.9 ى ئورۇندالغان. بۇ يىللىق كەپە ئۆي مەھەللىلىرىنى ئۆزگەرتىش پىلانى «تەڭرىتاغ» رايونىدىكى «بوستان» مەھەللىسى، بۇلاقتاغ رايونىدىكى تىك قۇدۇق مەھەللىسى قاتارلىق 17 تۈرنى ئۆز ئىچىگە ئالىدىغان بولۇپ، 35 ئېگىز قەۋەتلىك بىنا، 18 كۆپ قەۋەتلىك بىنا سېلىنىدىكەن.

     يېقىنقى يىللاردىن بۇيان، شەھىرىمىزنىڭ كەپە ئۆي مەھەللىلىرىنى ئۆزگەرتىش دائىرىسىدە يېڭىدىن سېلىنغان بىنالارنىڭ كۆپىنچىسى ئېگىز قەۋەتلىك بىنالار بولۇپ، ئاۋۋالقى يىللاردا قۇرۇلۇش باشلانغان ئېگىز قەۋەتلىك بىنالار ئىشلىتىشكە تاپشۇرۇلۇپ بولۇنغان. بۇلار سايباغ رايونىدىكى «شىخۇڭ» يولى مەھەللىسى، بۇلاقتاغ رايونىدىكى «يېكەنكۆل» شەرقىي ئايلانما مەھەللىسى، داۋانچىڭ تۇزكۆل خىمىيە سانائىتى زاۋۇتى مەھەللىسى قاتارلىق تۈرلەرنى ئۆز ئىچىگە ئالىدىكەن. ھەرقايسى كەپە ئۆي مەھەللىلىرىنى ئۆزگەرتىش تۈرلىرىدە ئەمەلىي ئەھۋالغا قاراپ ئاھالىلەر كۆچۈپ كېلىشكە ئورۇنلاشتۇرۇلغان.

    كەپە ئۆي مەھەللىلىرىدىكى ئاھالىلەرنىڭ تۇرمۇشىغا قولايلىق يارىتىش، كەپە ئۆي مەھەللىلىرىنى ئۆزگەرتىش جەريانىدا شەھەر يۈرۈشلۈك ئەسلىھەلىرى، ئاممىۋى مۇلازىمەت ئەسلىھەلىرى ۋە ماكانلاشتۇرۇش ئۆيىنى ماس قەدەمدە پۈتتۈرۈش ئۈچۈن، كەپە ئۆي مەھەللىلىرىدە شەھەر تەرەققىياتىغا ماس كېلىدىغان مەھەللە باشقۇرۇش تۈزۈلمىسى تەسىس قىلىنغان. ھازىرغىچە سېلىنغان يۈرۈشلەشكەن مەھەللە ئىشخانىسى، مەھەللە سەھىيە مۇلازىمەت مەركىزى، ساقچىخانا، يەسلى قاتارلىق ھەر خىل ئاممىۋى مۇلازىمەت ئەسلىھەلىرىنىڭ كۆلىمى 1 مىليون 150 مىڭ كىۋادرات مېتىرغا يەتكەن.(تامام)