خېفېي شەھىرىدىكى ۋاڭ فامىلىلىك ئەر ھاراق ئىچكەندىن كېيىن ماشىنا ھەيدىگەن، يېرىم يولدا ئۇيقۇسى كېلىپ بەرداشلىق بېرەلمەي ئاسما كۆۋرۈكتىكى باغلىما يولدا ئۇخلاپ قالغان. مۇخبىرنىڭ لۇياڭ رايونلۇق سوت مەھكىمىسىدىن ئىگىلىشىچە، ۋاڭ فامىلىلىكنىڭ ھاراق ئىچىپ ماشىنا ھەيدىشى جىنايەت شەكىللەندۈرگەن بولۇپ، تۆت ئايلىق تۇتۇپ تۇرۇپ ئەمگەككە سېلىش جازاسى بەرگەن ھەمدە 10 مىڭ يۈەن جەرىمانە قويغان.

  بۇ يىل 6-ئاينىڭ مەلۇم بىر كۈنى، 30 نەچچە ياشلىق ۋاڭ فامىلىلىك دوستلىرى بىلەن يىغىلىپ ئولتۇرۇپ ھاراق ئىچكەن. ئۇ تاماقتىن كېيىن ئىككى سائەت ئولتۇرساملا ئۇيقۇم ئېچىلىپ كېتىدۇ دەپ ئويلاپ، چۈشتىن كېيىن سائەت 4:00 تە شۇاڭدۈن بازىرىدىن يولغا چىقىپ، كاڭياڭ يولى ئاسما كۆۋرۈكى ئۈستىدە شىمالدىن جەنۇبقا قاراپ شەھەر ئىچىگە قاراپ ماڭغان. يولدا ۋاڭ فامىلىلىكنىڭ قاتتىق ئۇيقۇسى كەلگەن، ئۇ لىنچۈەن يولىدىكى كۆۋرۈك ئاستىدىكى باغلىما يولغا كەلگەندە، ئۇ پەقەت چىدىيالماي ماشىنىنى توختىتىپ رولغا بېشىنى قويۇپ ئۇخلاپ قالغان.

  تەخمىنەن بىر سائەتتىن كېيىن، قاتتىق ئۇخلاۋاتقان ۋاڭ فامىلىلىك ساقچىلار تەرىپىدىن بايقىلىپ قالغان. نەق مەيداندا ۋاڭ فامىلىلىكنىڭ نەپەس ئەۋرىشكىسىنى تەكشۈرۈش ئارقىلىق، ئۇنىڭ قېنىدىكى ئىسپىرت مىقدارىنىڭ 123.3 mg/100ml ئىكەنلىكىنى، ئۇنىڭ ھاراق ئىچىپ موتورلۇق قاتناش ۋاسىتىسى ھەيدىگەنلىكىنى ئېنىقلىغان.

   تۈنۈگۈن، مۇخبىرنىڭ لۇياڭ رايونلۇق خەلق سوت مەھكىمىسىدىن ئىگىلىشىچە، ۋاڭ فامىلىلىك يول بىخەتەرلىك قائىدە نىزامنامىسىدا خىلاپلىق قىلىپ، ھاراق ئىچىپ ماشىنا ھەيدىگەنلىكى جىنايەت شەكىللەندۈرگەن ئىكەن. سوراق قىلىش جەريانىدا، ۋاڭ فامىلىلىك ئۆزىنىڭ ھاراق ئىچىپ ماشىنا ھەيدىگەن قىلمىشىدىن قاتتىق پۇشايمان قىلغانلىقىنى بىلدۈرگەن. ئاخىرىدا سوت مەھكىمىسى ۋاڭ فامىلىلىككە تۆت ئايلىق تۇتۇپ تۇرۇپ ئەمگەككە سېلىش جازاسى بېرىپ، سەككىز ئاي كېچىكتۈرۈپ ئىجرا قىلىشنى قارار قىلغان، شۇنداقلا 10 مىڭ يۈەن جەرىمانە قويغان.