جۇڭگو ئۇيغۇرچە رادىيو تورى 9-ئىيۇن بېيجىڭ خەۋىرى:
8-ئىيۇن چۈشتىن كېيىن سائەت بەشتە مەملىكەت بويىچە 27 ئۆلكە رايوندىكى ئالىي مەكتەپ ئىمتىھانى ئاياغلاشتى. جياڭسۇ، جېجياڭ، جياڭشى ۋە خەينەندىن ئىبارەت تۆت ئۆلكىنىڭ پەنلەر ئورۇنلاشتۇرۇلۇشى ئوخشاش بولمىغاچقا، ئوقۇغۇچىلار 9-ئىيۇن داۋاملىق ئىمتىھان بەردى. ئالىي مەكتەپ ئىمتىھانى ئىسلاھاتى لايىھەسىدىكى ئورۇنلاشتۇرۇشلارغا ئاساسەن، 31 ئۆلكە رايوندا تەڭ تولدۇرغان ئارزۇسى بويىچە قوبۇل قىلىپ ئارخىپ ئەۋەتىش ئومۇميۈزلۈك يولغا قويۇلىدۇ. تەڭ تولدۇرغان ئارزۇ دېگىنىمىز، مىسال قىلىپ ئېيتساق، مەلۇم بىر ئۆلكە رايون ئىمتىھان بەرگۈچىنى بىرىنچى تۈركۈمدە ئالتە ئارزۇ تولدۇرسا بولىدۇ، دەپ بېكىتكەن بولسا، بۇ ئالتە ئارزۇ تەڭلا بىرىنچى ئارزۇ بولىدۇ. بەلگىلىمە بويىچە، ئوقۇغۇچى ئۆزىنىڭ نەتىجىسىگە ئاساسەن ئاۋۋال تەڭ تولدۇرغان ئارزۇدىكى بىرىنچى مەكتەپكە تىزىلىدۇ، ناۋادا رەت تەرتىپى مەكتەپنىڭ ئوقۇغۇچى قوبۇل قىلىش پىلانىدىكى ئارخىپ ئەۋەتىش نىسبىتى ئىچىگە كىرەلىسە، ئارخىپى مۇشۇ مەكتەپكە ئەۋەتىلىپ مەخسۇس قوبۇل قىلىنىدۇ.
ناۋادا نەتىجىسىنىڭ رەت تەرتىپى بىرىنچى ئارزۇدىكى مەكتەپنىڭ ئارخىپ ئەۋەتىش نىسبىتى ئىچىگە كىرەلمىسە، ئوخشاش ئۇسۇل بىلەن ئىككىنچى ئارزۇدىكى مەكتەپكە تىزىلىدۇ ھەمدە مۇشۇ تەرتىپ بويىچە بولىدۇ. ناۋادا ئالدىدىكى مەكتەپلەر قوبۇل قىلسا، كەينىدىكىلىرى بىكار بولىدۇ. شۇڭا مۇتەخەسسىسلەر: ئارزۇ تولدۇرغاندا، ئوقۇغۇچىنىڭ ئوقۇش ئارزۇسى ئەڭ كۈچلۈك مەكتەپلەرنى ئالدىدا تاللاش كېرەك بولمىسا ئالدىدىكى مەكتەپلەر قوبۇل قىلسا، كەينىدىكى مەكتەپلەرگە كىرىش پۇرسىتى بولمايدۇ، دەپ ئەسكەرتتى.