ئامېرىكىنىڭ نىيۇ يورك شەھىرى ئامېرىكىدا تاماكا چېكىشنى مەنئى قىلىشتا ئەڭ ئۈنۈمگە ئېرىشكەن چوڭ شەھەرلەرنىڭ بىرى. ھازىر نىيۇ يوركتىكى ئاممىۋى سورۇنلار ئالايلۇق: ئىشخانا، ئاشخانا، مەيخانا قاتارلىق ئۆي ئىچى سورۇنلىرىدا تاماكا چېكىلمەيدۇ؛ باغچە، مەيدان ، دېڭىز ساھىلى قاتارلىق جايلاردىمۇ شۇنداق. 2013-يىلى نىيۇ يوركتا قۇرامىغا يەتكەنلەرنىڭ تاماكا چېكىش نىسبىتى %16.1، ئامېرىكا بويىچە %18 تۆۋەنلىگەن. نيو يوركتا تاماكا چېكىشنى مەنئى قىلىشتا مۇھىم نۇقتا تاماكا چېكىشنى مەنئى قىلىش قانۇن بەلگىلىمىلىرىنى ئېلان قىلىش، تاماكىدىن ئېلىنىدىغان باجنى ئېغىرلىتىش بىلەن بىر ۋاقىتتا تەلىم تەربىيەنى كۈچەيتىش، كىشىلەرنى پۈتۈن جەمئىيەتتە تاماكا چېكىشكە قارشى تۇرۇش ئورتاق ئېڭىنى شەكىللەندۈرۈشكە يېتەكلەشكە قارىتىلدى.
نىيۇ يوركتا 1988-يىلى ئىشخانا ۋە كۆپلىگەن ئاشخانىلاردا تاماكا چېكىشنى مەنئى قىلىش قانۇنى تۈزۈلدى. 2003-يىلى ئامېرىكا بويىچە تۇنجى بولۇپ ئۆي ئىچى تاماكا چېكىشنى مەنئى قىلىش دائىرىسىنى ئىشخانىلاردىن تەدرىجىي ماگىزىن، ئاشخانا، مەيخانا قاتارلىق ئاممىۋى سورۇنلارغا كېڭەيتتى. 2009-يىلى ئۆي سىرتىدىكى ئاممىۋى سورۇنلىرىغا كېڭەيتتى.
2002-يىلى مېچىل بىلومبېرىگ نىيۇ يورك شەھىرىنىڭ باشلىقى بولۇپلا تاماكا چېكىشنى مەنئى قىلىش تەدبىرىنى ئىلگىرى سۈردى، تاماكا بېجىنى كۆپەيتىش ئۇنىڭ ئاساسلىق تەدبىرلىرىنىڭ بىرى بولدى. شۇ يىلى 7-ئايدا نىيۇ يوركتا تاماكا تىجارەت بېجى ھەر قاپ سىگارتنىڭ 0.08 ئامېرىكا دوللىرىدىن 1.5 ئامېرىكا دوللىرىغا كۆپەيتىلدى. تاماكىنىڭ پارچە سېتىلىش باھاسىمۇ %32 ئۆرلىدى.
شۇنىڭدىن باشلاپ نىيۇ يوركتا بەنگىلەرنىڭ نىسبىتى زور دەرىجىدە تۆۋەنلىدى. ئامېرىكا كېسەلنى تىزگىنلەش ۋە ئالدىنى ئېلىش مەركىزىنىڭ تەھلىلىدە تاماكا بېجىنى كۆپەيتىشتىن باشقا ، بەنگىلەرنىڭ ئازىيىشى تاماكا چېكىشنىڭ سالامەتلىككە زىيانلىق ئىكەنلىكىگە ئائىت تەشۋىقات ۋە تەلىم تەربىيەنى پائال قانات يايدۇرۇش بىلەن مۇناسىۋەتلىك ئىكەن. نىيۇ يورك شەھەرلىك ھۆكۈمەت ئاممىۋى تەلىم تەربىيەنى پائال قانات يايدۇرۇپ، تاماكا چېكىش ۋە ساغلاملىقنى تەكشۈرۈش دوكلاتى ۋە شەھەر بويىچە تاماكا چېكىش نىسبىتى مەلۇماتىنى قەرەللىك ئېلان قىلغان. 2004-يىلى نىيۇ يورك شەھىرىدە تاماكا چېكىش نىسبىتى %21.5 دىن %18.4 گە تۆۋەنلىگەن، 200 مىڭغا يېقىن بەنگە ئازايغان.
2005-يىلى نىيۇ يوركتا تاماكا چېكىش نىسبىتىدە يەنە تۆۋەنلەش ئالامىتى كۆرۈلمىگەن. 2006-يىلىدىن باشلاپ ھەر يىلى بىر ئاي تاماكا چېكىشنى مەنئى قىلىش تەشۋىقات پائالىيىتى قانات يايدۇرۇلۇپ، تېلېۋىزىيە، تور قاتارلىق تاراتقۇلاردا تاماكا چېكىشنى مەنئى قىلىش ئېلانلىرى بېرىلگەن. بۇنىڭ ئىچىدە تېلېۋىزور ئېلانلىرىنى كۆرۈش نىسبىتى ئادەتتىكى ئېلاندىن زور دەرىجىدە يۇقىرىلىغان بولۇپ، تاماكا چېكىشنىڭ ئۆپكە، قان تومۇر ۋە چوڭ مېڭىگە تەسىر كۆرسىتىدىغانلىقىغا ئائىت سۈرەتلەر كۆرسىتىلگەن ۋە تاماكا چېكىش بىلەن كېسەللىك، ئۆلۈمنىڭ مۇناسىۋەتلىك ئىكەنلىكى؛ تاماكا چېكىشنىڭ بالىلارنىڭ ساغلاملىقىغا تەسىر يەتكۈزىدىغانلىقى بايان قىلىنغان. شۇ يىلى بۇنىڭ ئۈنۈمى كۆرۈلۈپ بەنگىلەرنىڭ سانى بىر ئاز ئازايغان.
ئۇندىن باشقا نىيۇ يورك قانۇن چىقىرىپ تاماكا تىجارىتىنى قېلىپلاشتۇرۇشنى چىڭىتتى. جۈملىدىن تاماكا ئېلانلىرىنى مەنئى قىلدى. تاماكا قېپىغا ساغلاملىققا زىيانلىق دېگەن خەتنى بېسىشنى تەلەپ قىلدى. ئاپتوماتىك مال سېتىش ماشىنىسىدا تاماكا سېتىش مەنئى قىلىندى ھەمدە 21 ياشتىن تۆۋەن ياش ئۆسمۈرلەرگە تاماكا سېتىش مەنئى قىلىندى. شەھەرلىك سەھىيە ئىدارىسى يەنە تاماكا تاشلاش تېلېفونى تەسىس قىلىپ،تاماكا تاشلاشقا مەسلىھەت بەردى ۋە ھەقسىز بۇيۇملار بىلەن تەمىنلىدى. ھەمدە مۇتەخەسسىسلەرنى ئوتتۇرا مەكتەپلەردە تاماكا تاشلاشقا ئالاقىدار لېكسىيە سۆزلەشكە قەرەللىك ئۇيۇشتۇردى.
تاماكا چېكىشنى مەنئى قىلىش قانۇن بەلگىلىمىلىرىنىڭ ئالاھىدىلىكى ساقچى قاتارلىق ھۆكۈمەتنىڭ قانۇن ئىجرا قىلىش خادىملىرىنىڭ مەجبۇرى ئىجرا قىلىشىغا باغلىق بولمايلا قالماستىن، ئەل ئارىسىدىكى كۈچلەرمۇ نىيۇ يوركتا تاماكا چېكىشنى مەنئى قىلىشتا مۇھىم رول ئوينىغان. نىيۇ يوركتا باغچە قاتارلىق ئاممىۋى سورۇنلاردا تاماكا چەكسە 300 ئامېرىكا دوللىرى جەرىمانە قويۇلىدۇ.
بۇ خىل ئەھۋالدا ئالدىنقى ئەسىرنىڭ كېيىنكى مەزگىلدىن باشلاپ، ئامېرىكىنىڭ ھەر قايسى جايلىرىدا تاماكا چېكىشكە قارشى ئەل ئىچى تەشكىلاتلىرى ۋە ئۇنىڭ جايلاردىكى شۆبىلىرى بارلىققا كەلدى. ئۇلار تەشۋىقات ۋە تەلىم تەربىيەدىن ئاممىۋى سورۇنلاردا تاماكا چېكىشنى مەنئى قىلىش قانۇنىنى چىقىرىش ئۈستىدە تەدرىجىي ئىزدەندى. ئالايلۇق، تاماكا چەكمەيدىغانلارنىڭ ھوقۇقى تەشكىلاتى نىيۇ يوركتا ئۆي ئىچىدە تاماكا ئىسى بولماسلىق پائالىيىتى ۋە ياش ئۆسمۈرلەرنىڭ تاماكا چېكىشىنى مەنئى قىلىش تەربىيەسىنى پائال قانات يايدۇردى. مەھەللىلەردە قانداق قىلغاندا ئۇچۇردىن پايدىلىنىپ تاماكا چېكىشنى مەنئى قىلىش ھەققىدە تەربىيەلەش كۇرسلىرىنى ئاچتى.