ئادەم بەدىنىدىكى ئەزالارنىڭ ئۆزىنى ئۆزى ئەسلىگە كەلتۈرۈش ئىقتىدارى ئىنتايىن كۈچلۈك بولۇپ، ئۇلارنى چۈشىنىش ۋە مۇئەييەن ئۇسۇللارنى قوللىنىش ئارقىلىق بۇ ئەزالارنىڭ ئۆزىنى داۋالاش سۈرئىتىنى تېزلەتكىلى بولىدۇ.
ئارتېرىيە تومۇرى ئارتېرىيە تومۇرىدا قان توسۇلۇپ قالسا نورمال ئادەمنىڭ ئارتېرىيە تومۇرى ئەسلىدىكىدىن كېڭىيەلەيدۇ، ھەتتا يېڭى ئارتېرىيە قان تومۇرى شەكىللىنىپ قان ئايلىنىشىنى راۋانلاشتۇرىدۇ. بۇ جەريان قان تومۇرنىڭ قايتا شەكىللىنىشى دېيىلىدۇ. ئامېرىكا خارۋارد ئۇنىۋېرسىتېتى تېببىي ئىنستىتۇتىنىڭ تەتقىقاتچىلىرىنىڭ بايقىشىچە خولېستېرىننىڭ مىقدارىنى ئازايتىش قان تومۇرلارنىڭ قايتا شەكىللىنىشىگە پايدىلىق ئىكەن. ئۇنىڭدىن باشقا يۈگۈرۈش، سۇ ئۈزۈش ۋە ۋاسكېتبول ئويناش قاتارلىق قان ئايلىنىشقا ياردەم بېرىدىغان ھەرىكەتلەر بىلەن شۇغۇللىنىش ئارقىلىقمۇ قان تومۇرلارنىڭ قايتا شەكىللىنىشىنى ئىلگىرى سۈرگىلى بولىدىكەن.
سۆڭەك سۆڭەكنىڭ ھاياتلىق بۆلىكى )ئاساسىي ماددا ھۈجەيرىسى(نىڭ رول ئوينىشى بىلەن سۆڭەك سۇنغاندىن كېيىن بىرىكىش يۈز بېرىدۇ. ئاساسىي ماددا ھۈجەيرىسى بولسا ئادەم بەدىنىدىكى بۆلۈنۈش ئىقتىدارى ۋە قايتا شەكىللىنىش ئىقتىدارى كۈچلۈك بولغان ھۈجەيرە بولۇپ، سۆڭەك زەخىمگە ئۇچرىغاندىن كېيىن بۇ ھۈجەيرە رولىنى جارى قىلدۇرۇشقا باشلايدۇ. پالەك، چېچەككۆك قاتارلىق يېشىل يوپۇرماقلىق كۆكتاتلاردا ۋىتامىن K مول بولۇپ، سۆڭەك ھۈجەيرىلىرىنىڭ قايتىدىن شەكىللىنىشىگە ياردەم بېرىدۇ. سۆڭەك سۇنۇپ ئالتە ھەپتىدىن كېيىن يەڭگىل ھەرىكەتلەرنى ئىشلەپ بەرگەندە سۆڭەك ھۈجەيرىلىرىنىڭ شەكىللىنىشىگە ياردەم بېرىدۇ.
جىگەر جىگەردىن بىر قىسىم ئۆلگەن توقۇلمىلارنى چىقىرىپ تاشلىغاندا يېڭى توقۇلمىلار ئۆسۈپ چىقالايدۇ، ئەمما بۇنىڭ ئالدىنقى شەرتى جىگەر قېتىشىش دەرىجىسىگە بارمىغان بولۇشى كېرەك. ئۇزاق مۇددەت ھاراق ئىچىش ۋە كېچىسى ئۇخلىماسلىق جىگەرگە زىيان يەتكۈزىدۇ. مۇۋاپىق مىقداردا يوپۇرماق كىسلاتاسى ۋە مۇرەككەپ ۋىتامىن B ئىچىپ بەرگەندە گىلۇتاتىئون دەپ ئاتىلىدىغان خىمىيەلىك بىرىكمىنىڭ شەكىللىنىشىنى ئىلگىرى سۈرىدۇ، بۇ بىرىكمە جىگەر توقۇلمىلىرىنىڭ قايتىدىن ئۆسۈشىگە ياردەم بېرىدۇ.
ئۈچەي ماددا ئالماشتۇرۇشى ئەڭ تېز بولغان ئورگانىزم ئۈچەي، ئەمما ھاراقنى زىيادە كۆپ ئىچىش ۋە كاۋاپ تۈرىدىكى يېمەكلىكلەرنى كۆپ ئىستېمال قىلىش ئۈچەي ئىچكى دىۋارىنىڭ نېپىزلەپ كېتىشىنى كەلتۈرۈپ چىقىرىدۇ. يىرىك يېمەكلىكلەرنى كۆپ ئىستېمال قىلىش ئارقىلىق ئۈچەينىڭ يېڭىلىنىشىنى تېزلەتكىلى بولىدۇ. مەسىلەن: تاماققا قارا ئاشلىقنى قوشۇپ ئىستېمال قىلغاندا كونا ھۈجەيرىلەرنىڭ چىقىرىپ تاشلىنىپ يېڭى ھۈجەيرىلەرنىڭ شەكىللىنىشىگە ياردەم بېرىدۇ.
چوڭ مېڭە تېرە سۈرۈلۈپ كەتسە ئۆزلۈكىدىن ئەسلىگە كېلىپ ساقايغانغا ئوخشاش، چوڭ مېڭە ھەمىشە ئۆزىنى داۋالاپ ساقىيىشقا ئىنتىلىدۇ. تەتقىقاتلار شۇنى ئىسپاتلىدىكى ھەرىكەت قىلىش ئارقىلىق مېڭىنىڭ ئىككى ھالقىلىق بۆلىكىدىكى )ئەستە تۇتۇش ۋە ئۆگىنىش ئىقتىدارىنى كونترول قىلىدىغان تۆۋەنكى مېڭە دۆڭچىسى بىلەن پۇراش سەزگۈسىنى كونترول قىلىدىغان پۇراش شارچىسى( ھۈجەيرىلەرنىڭ شەكىللىنىشىنى ئىلگىرى سۈرگىلى بولىدۇ. مېڭىنىڭ ئۆزىنى داۋالاش ئىقتىدارىنى يۇقىرى كۆتۈرۈش ئۈچۈن ھەپتىدە ئىككى - ئۈچ كۈن ھەر قېتىمدا يېرىم سائەت ئەتراپىدا چېنىقىپ بېرىش كېرەك.
ئۆپكە ئۆپكە تۈكچىلىرى مەينەت نەرسىلەرنى ئۆپكە پۈۋەكچىسىدىن كانايغا سىقىپ چىقىرىدۇ. ئاندىن شىلىمشىق سۇيۇقلۇقلار بىلەن بىللە، تەن سىرتىغا چىقىرىپ تاشلايدۇ. گەرچە ئۆپكىنىڭ ئۆزىنى تازىلايدىغان ئايلانما سىستېمىسى بولسىمۇ، ئەمما ناچار ھاۋا نەپەسلىنىش سىستېمىسىنى توسۇۋېلىپ، ئۆپكىنىڭ ئۆزىنى تازىلاش ئىقتىدارىغا بۇزغۇنچىلىق قىلىدۇ. دائىم چېنىقىپ تۇرغاندا ئۆپكىنىڭ پاكىز تۇرۇشىغا ياردىمى بولىدۇ، سەۋزە، تاتلىقبەرەڭگى، ئەنبەھ قاتارلىقلارنىڭ تەركىبىدىكى ۋىتامىن A ئۆپكە پۈۋەكچىلىرىنىڭ ئىقتىدارىنى ئەسلىگە كەلتۈرۈشكە ياردەم بېرىدۇ، شۇڭا بۇ خىل يېمەكلىكلەرنى دائىم ئىستېمال قىلىپ تۇرۇش كېرەك.