ئامېرىكىلىق داڭلىق مۇخبىر، پۇلتىزىر مۇكاپاتىغا ئېرىشكۈچى سېيمور خىرىشنىڭ يېقىندا «لوندون تەقرىزى» تور بېكىتىدە ئېلان قىلغان بىر خەۋىرىدىكى «ئوباما ھۆكۈمىتى بېن لادىننى ئېتىپ ئۆلتۈرۈش ئىشىدا يالغان ئېيتقان» دېگەن سۆزى توردا ناھايىتى كۆپ چېكىلىپ، تور بېكىتىنى بىر مەھەل پالەچ ھالغا چۈشۈرۈپ قويدى. خەۋەردە، بېن لادىن ئامېرىكا ئېتىپ تاشلىغانلىقىنى جاكارلاشتىن بۇرۇن پاكىستان ھۆكۈمىتى تەرىپىدىن قولغا ئېلىنىپ بەش يىل نەزەربەند ئاستىدا تۇرغان؛ ئامېرىكا 25 مىليون ئامېرىكا دوللىرى خەجلەپ، پاكىستاننىڭ سابىق ئاخبارات ئەمەلدارى بىلەن سودىلاشقان ھەم پاكىستان بىلەن بىرلىشىپ بېن لادىننى ئۆلتۈرمەكچى بولغان؛ ئاتالمىش ئامېرىكا ئالاھىدە ئەسكەرلىرىنىڭ تۇيۇقسىز ھۇجۇم قىلىپ بېن لادىننى ئېتىپ ئۆلتۈرۈشتەك تارىخىي داستانغا ئوخشايدىغان ئەمەلىيەت ئويدۇرۇپ چىقىرىلغان دېيىلدى. ئامېرىكا ئاقسارىيى ۋە مەركىزىي ئاخبارات ئىدارىسىنىڭ باياناتچىسى 11-ماي خىرىشنىڭ خەۋىرى ئاغزىغا كەلگەننى جۆيلۈگەنلىك، ئۇنىڭ ھەر بىر سۆزى يالغان دېدى.

ئامېرىكىدىكى ئاساسلىق تاراتقۇلارمۇ ئارقا-ئارقىدىن خىرىشنىڭ خەۋىرىنىڭ راستلىقىغا بولغان گۇمانىنى ئوتتۇرىغا قويدى. 12-ماي كەچكىچە، پاكىستان ھۆكۈمىتى بۇ ئىشقا رەسمىي ئىنكاس قايتۇرمىدى. پاكىستان دىپلوماتىيە مىنىستىرلىقىنىڭ ئاخبارات باياناتچىسى خەلىلۇللا 12-ماي «يەر شارى ۋاقىت گېزىتى»نىڭ مەخسۇس زىيارىتىنى قوبۇل قىلغاندا، ھازىر بىز بۇ خەۋەرنى ئۇقتۇق، لېكىن بۇ ئىشقا تېخى ھېچقانداق ئىنكاس قايتۇرمىدۇق دېدى. مۇخبىر قايتا-قايتا سورىغانلىقتىن، خەلىلۇللا بىز 14-مايدىكى پاكىستان دىپلوماتىيە مىنىستىرلىقىنىڭ قەرەللىك ئاخبارات ئېلان قىلىش يىغىنىدا بۇنىڭغا ئىنكاس قايتۇرۇشىمىز مۇمكىن دېدى.

ئامېرىكا ھۆكۈمىتى دېڭىز يىلپىزى زەربىدارلار ئەترىتىنىڭ بېن لادىننى ئېتىپ ئۆلتۈرۈش ئىشىنى تارىخىي داستاندەك تەسۋىرلەپ، بۇ-ئامېرىكىنىڭ ئۆز ئالدىغا قوللانغان ھەرىكىتى دەپ كەلدى ھەم مەركىزىي ئاخبارات ئىدارىسى ئىز قوغلاش ئارقىلىق، بېن لادىننىڭ ئەببوتئابادتىكى يوشۇرۇنۇۋالغان جايىنى تېپىپ چىققان دېگەندە چىڭ تۇردى. ئەمما خىرىشنىڭ 10-ماي ئېلان قىلغان «بېن لادىننى ئۆلتۈرۈش» ناملىق تەكشۈرۈش دوكلاتىدىن ئايان بولۇشىچە، ئېتىپ ئۆلتۈرۈلگەن بېن لادىن پاكىستاندا بەش يىل نەزەربەند قىلىنغان. 2006-يىلى كىچىك بۇش ئامېرىكىنىڭ زۇڭتۇڭلۇقىنى ئۆتەۋاتقان چاغدىلا، پاكىستان بىلەن سەئۇدى ئەرەبىستانىنىڭ ھەربىي ئاخبارات تارماقلىرى بېن لادىننى ئەببوتئاباد ھەربىي بازىسىنىڭ ئەتراپىدىكى بىر بىخەتەر ئۆي، يەنى كېيىن ئامېرىكا ئارمىيەسى دېڭىز يىلپىزى زەربىدارلار ئەترىتى بېن لادىننى ئېتىپ ئۆلتۈرگەن قورۇدا ئوڭۇشلۇق تىزگىنلىگەن. 2009-يىلى ئوباما ئاقسارايغا كىرگەندىن كېيىن، ئامېرىكا ئارمىيەسى بۇ مەخپىيەتلىكنى بايقىغان ھەم دەرھال دىپلوماتىك مۇرەسسەنى باشلىغان.