جاھان ئاگېنتلىقى 10-ماي خەۋىرى؛ لەگلەك تورى تەرجىمىسى: تۈركىيەدىكى 1980-يىلى 12-سىنتەبىر ھەربىي ئۆزگىرىشنى قوزغىغان 7-نۆۋەتلىك پرېزىدېنت كەنئان ئەۋرەن ۋاپات بولدى، كەنئان ئەۋرەن ھەربىي ئۆزگىرىش قىلغانلىقى تۈپەيلىدىن سوتلانغان ئىدى، ئۇ بۇ يىل 98 ياشقا كىرگەن. تۈركىيەنىڭ 7-نۆۋەتلىك پرېزىدېنتى ۋە پىنسىيەگە چىققان گېنىرال كەنئان ئەۋرەن ئەنقەرە گۈلخانە ھەربىي مىدىتسىنا ئاكادىمىيسىدە داۋالىنىۋاتقان بولۇپ، شەنبە كۈنى ئاخشىمى ھاياتىدىن ئايرىلدى.
كەنئان ئەۋرەن 1917-يىلى مانىسانىڭ ئالاشەھىر رايۇنىدا تۇغۇلغان بولۇپ، باشلانغۇچ ۋە ئوتتۇرا مەكتەپنى ئالاشەھىردە تاماملىغان. ئەۋرەن مالتەپە ھەربىي تولۇق ئوتتۇرا مەكتىپىدە ئوقۇش پۈتتۈرگەن بولۇپ، 1938-يىلى قۇرۇقلۇق ئارمىيە مەكتىپىنى، 1949-يىلى جەڭ ئاكادىمىيسىنى پۈتتۈرگەن. ئەۋرەن توپچى قىسىم ئوفىتسېرى ۋە شىتاب ئوفىتسىىرى بولۇپ قۇراللىق ئارمىيەدە ۋەزىپە ئۆتىگەن بولۇپ، تۈركىيە 9-قىسىم ئەترىتىدە ھەربىي تەربىيە مۇدىرى، كېيىن شىتاب باشلىقى بولغان. ئەۋرەن ئارمىيە قۇماندانلىقى شىتابى ۋە قۇرۇقلۇق ئارمىيە قۇماندانلىق شىتابىدا ۋەزىپە ئۆتىگەندىن كېيىن، 1978-يىلى 7-مارتتا تۈركىيە ئارمىيسىى باش شىتاب باشلىقى بولۇپ تەيىنلەندى. ئەۋرەن 1980-يىلى 12-سىنتەبىردە ھەربىي ئۆزگىرىش قوزغاپ ھاكىمىيەتكە چىقتى، ۋە سىياسىي پارتىيەلەرنى تاقىۋەتتى، ئەۋرەن ھەربىي ئۆزگىرىش ئارقىلىق مىللىي بىخەتەرلىك قۇرۇلتىيى باشلىقى ۋە تۈركىيە پرېزىدېنتى بولدى. ئەۋرەن 1982-يىلى 7-نويابىردا ئاۋاز قويۇش ئارقىلىق ماقۇللانغان ئاساسى قانۇن بىلەن رەسمى ھالدا تۈركىيەنىڭ 7-نۆۋەتلىك پرېزىدېنتى بولۇپ ۋەزىپىگە ئولتۇردى. 1989-يىلى 9-نويابىردا ۋەزىپە ئۆتەش مۇددىتى ئاخىرلىشىپ ئۇنىڭ ئورنىغا تۇرغۇت ئۆزەل پرېزىدېنتى بولدى. ئەۋرەن 1944-يىلى سەكىنە خانىم بىلەن ئۆيلەنگەن بولۇپ، ئۈچ پەرزەنتى بار.
كەنئان ئەۋرەن 1980-يىلى 12-سىنتەبىردىكى ھەربىي سىياسىي ئۆزگىرىش سەۋەبىدىن ھەربىي ئۆزگىرىشنىڭ باشلامچىلىرىدىن تاھسىن شاھىنكايا بىلەن بىرلىكتە سوتقا تارتىلغان بولۇپ مۇددەتسىز قاماق جازاسىغا ھۆكۈم قىلىنغان بولۇپ، سوتنىڭ ھۆكۈمى ئاقلاش ئورنىغا ئىلتىماس قىلىنىۋاتقان ئىدى.