يەر شارى خەۋەر تورى 6-ماي خەۋىرى؛ لەگلەك تورى تەرجىمىسى: ئافغانىستاننىڭ جەنۇبىدىكى زابۇل رايۇنىدا تالىبان بىلەن ئافغانىستان بىخەتەرلىك قىسىملىرى ئارىىسدا يۈز بەرگەن قوراللىق توقۇنۇشتا 35 نەپەر تالىبان قۇراللىقى ئۆلتۈرۈلدى. زابۇل رايۇنى ۋالىي ۋەكىلى ئەشرەف ناسىرى، ئافغانىستان قۇراللىق قىسىملىرىنىڭ تۈنۈگۈن شاھ جوي رايۇنىدا ھەرىكەت ئېلىپ بارغان جەرياندا تالىبان قۇراللىقلىرى بىلەن توقۇنۇشقانلىقىنى، توقۇنۇشنىڭ ھازىرمۇ داۋاملىشۋاتقانلىقىنى، توقۇنۇشتا ھازىرغا قەدەر 35 نەپەر تالىبان قۇراللىقىنىڭ ئېتىپ تاشلانغانلىقىنى ، 25 نەپىرىنىڭ يارىلانغانلىقىنى ئېيتتى. ناسىرى، توقۇنۇشتا 6 نەپەر تالىبان قۇماندانىنىڭ ئۆلتۈرۈلگەنلىكىنى تەكىتلەپ، ئافغانىستان قىسىملىرى ۋە پۇقرالارنىڭ ھېچقانداق زىيانغا ئۇچرىمىغانلىقىنى ئىلگىرى سۈردى. تالىبان ھەرىكىتى باياناتچىسى قارى يۈسۈف ئەھمەدى، 5 نەپەر تالىبان قۇراللىقىنىڭ يارىلانغانلىقىنى، 9 نەپەر ئافغانىستان ئەسكىرىنىڭ ئۆلتۈرۈلگەنلىكىنى ئىلگىرى سۈردى.
ئافغانىستاندا يەنە، غەزنە ۋىلايىتىنىڭ دەھ يەك رايۇنىدا يول بويىغا ئورۇنلاشتۇرۇلغان بومبا ئاپتۇبۇس ئۆتۈۋاتقاندا پارتىلاپ نەتىجىدە 2 بالا ھاياتىدىن ئايرىلغان، 4 كىشى يارىلانغان. ئافغانىستاندا يېقىنقى كۈنلەردە تالىبان ھەرىكىتى «باھار ھۇجۇمى» باشلىغاندىن بۇيان توقۇنۇش ۋە پارتلاش ۋەقەلىرى كۆپەيدى، ئافغانىستان دائىرلىرى تالىبانغا قارشى 13 رايۇندا ھەرىكەت ئېلىپ بېرىۋاتقانلىقىنى بىلدۈردى.